Read Chol Ester 7 Bible Online

Ester 7 - Chol bible

Ester 7

¹Jini cha'an tsa' ochi jini rey yic'ot Amán ti c'ux waj yic'ot Ester, i yijñam rey.

²Jiñʌch i cha'p'ejlel q'uin che' woli' japob vino ti q'uiñijel. Tsa' caji' yʌl jini rey: ¿Chuqui a wom a c'ajtibeñon, j co' Ester? Mi caj a wʌq'uentel. ¿Chuqui a wom? Mi caj a taj anquese lamital c yumʌntel, che'en.

³I yijñam rey tsi' sube: Mi uts'at ma' q'uelon, c rey, mi a wom a pʌsbeñon i yutslel a pusic'al, a wocolic mij c'ajtibeñet la' colicon ti chʌmel. La' colicob c pi'ʌlob ja'el, a wocolic.

⁴Come chombilonix lojon, joñon quic'ot c pi'ʌlob jini judíojob, cha'an mic chʌmel lojon. Mux c tsʌnsʌntel lojon. Mux c junyajlel jilel lojon. Tsa'ic jach i choñoyon lojon ti majtan e'tel cha'an mi cubin lojon wocol quic'ot pejtel c pi'ʌlob, ma'anic chuqui tsaj c'ajtibeyet, come mi mejlel j cuch lojon. Pero jatet ja'el mi caj a wubin wocol mi tsa' jiliyob judíojob, che'en.

⁵Jini rey Asuero tsi' sube: ¿Majqui jini winic am bʌ i mul? ¿Baqui an jini mu' bʌ i chañ'esan i bʌ cha'an mi' mel che' bajche' jini? che'en.

⁶Ester tsi' jac'ʌ: Umba'an laj contra yom bʌ i jisañonla, jiñʌch Amán, che'en. Wen tsiltsilña Amán ti' tojlel jini rey yic'ot i pi'ʌl rey.

⁷Mich'atax jini rey, tsi' cʌyʌ jini mesa. Tsa' majli ti pʌc'ʌbʌl ti' pam i yotot. Amán tsa' cʌle cha'an mi' c'ajtiben Ester ti wocol t'an cha'an mi' coltan, come tsi' q'uele mux caj i yʌjq'uel ti toj mulil ti' tojlel jini rey.

⁸Jini rey tsi' cʌyʌ pʌc'ʌbʌl. Tsa' sujti ti mal otot ba' tsi' cha'leyob q'uiñijel. Tsi' q'uele woli ti yajlel Amán ti' yoc jini ch'ac ba' ñʌcʌl Ester. Tsi' yʌlʌ jini rey: ¿Yom ba i pi'len c pi'ʌl tic tojlel ti cotot? che'en. Che' bʌ woli to ti t'an rey, jini x'e'telob tsi' mosbeyob i wut Amán.

⁹Harbona, juntiquil eunuco tsa' bʌ i melbe i ye'tel rey tsa' caji' yʌl: Q'uele jini chan bʌ te' tsa' bʌ i chajpa Amán cha'an mi' yʌc' ti chʌmel Mardoqueo, i yaj coltaya rey. Ya'ʌch wa'al ti pam i yotot Amán, lajchʌmp'ejl ti jajl i chanlel, che'en.

¹⁰Jini rey tsi' yʌlʌ: Jich'i ya'i, che'en. Jini cha'an tsa' jijch'i Amán ya' ti wa'al bʌ te' chajpʌbil bʌ i cha'an, ba' tsi' ña'ta i tsʌnsan Mardoqueo. Che' jini tsa' caji ti lajmel i mich'lel rey.