Read Chol Ester 9 Bible Online

Ester 9 - Chol bible

Ester 9

¹Che' ti 28 de febrero, che' i yorajlelix mi' yujtel bajche' ts'ijbubil ti' mandar rey, ti jini jach bʌ q'uin che' bʌ tsi' ña'tayob i t'uchtan judíojob jini i contrajob, ma'anic tsa' mejliyob. Jini judíojob tsi' t'uchtayob i contrajob.

²Ti jini jach bʌ q'uin tsi' tempayob i bʌ judíojob ti jujump'ejl xchumtʌl yic'ot colem tejclum tac ba' woli ti yumʌntel jini rey Asuero. Chajpʌbilob cha'an mi' chucob pejtel i contrajob yomo' bʌ i jisañob. Ma'anic majch tsa' mejli i contrajiñob come pejtel xchumtʌlob tsa' caji i bʌc'ñañob.

³Tsi' coltayob judíojob pejtel yumʌlob ti colem tejclum tac yic'ot gobernadorob yic'ot año' bʌ i ye'tel ti' wenta rey, come tsi' bʌc'ñayob Mardoqueo.

⁴Come wen ñuc Mardoqueo ti' yotot rey. Tsa' caji ti cʌjñel ti ñajtʌl, come tsa' utsi p'ojli i p'ʌtʌlel.

⁵Jini cha'an jini judíojob tsi' tsʌnsayob pejtel i contrajob yomo' bʌ i jisañob.

⁶Ya' ti Susa jini judíojob tsi' tsʌnsayob jo'c'al i cha'bajc' (500) winicob. Tsi' laj jisayob.

⁷Tsi' tsʌnsayob Parsandata, Dalfón, Aspata, Porata, Adalía, Aridata, Parmasta, Arisai, Aridai yic'ot Vaizata.

¹⁰Jini lujuntiquil winicob i yalobilobʌch Amán (i yalobil bʌ Hamedata) i contrajʌch judíojob. Jini judíojob tsi' laj jisayob i contrajob, pero ma'anic tsi' ch'ʌmbeyob i lum yic'ot i chubʌ'an.

¹¹Ti jini jach bʌ q'uin tsa' caji' yubin jini rey bajche' c'amel tsa' chʌmiyob ya' ti Susa i tejclum rey.

¹²Jini rey tsa' caji' suben jini co'ʌl Ester: Wʌ' ti Susa i tejclum rey, jini judíojob tsa'ix i tsʌnsayob jo'c'al i cha'bajc' (500) winicob. Tsi' tsʌnsayob ja'el jini lujuntiquil winic bʌ i yalobilob Amán. ¡Bajche' c'amel tsi' tsʌnsayob winicob ti yan tac bʌ colem tejclum tic yumʌntel! ¿Anto ba chuqui a wom? C'ajtibeñon. Mux caj a wʌq'uentel. Subeñon mi anto yom melol. Mi' caj ti ujtel. Che'ʌch tsi' cha'le t'an jini rey.

¹³Tsa' caji' yʌl Ester: Mi che'ʌch yom a pusic'al aq'ueñob permiso judíojob wʌ' ti Susa che' bajche' ts'ijbubil ti jini mandar cha'an mi' cha' melob ijc'ʌl che' bajche' sajmʌl. La' i ts'ʌy cʌchob jini lujuntiquil bʌ i yalobilob Amán, che'en Ester.

¹⁴Jini cha'an jini rey tsi' cha'le mandar cha'an mi' melob ti Susa che' bajche' tsi' yʌlʌ Ester. Jini cha'an tsi' ts'ʌy cʌchʌyob jini lujuntiquil i yalobilob Amán ya' ti te' ti pam i yotot Amán.

¹⁵Jini judíojob año' bʌ ti Susa tsi' cha' tempayob i bʌ ti' yijc'ʌlal. Tsi' tsʌnsayob jo'lujunc'al (300) winicob ti Susa, pero ma'anic tsi' ch'ʌmbeyob i lum mi i chubʌ'an.

¹⁶Jini judíojob pam pujquemo' bʌ ti yan tac bʌ colem tejclum ba' woli ti yumʌntel rey, tsi' tempayob i bʌ ja'el cha'an mi' coltañob i bʌ. Tsi' t'uchtayob i contrajob. Tsi' tsʌnsayob jo'lujump'ejl i chʌnc'al mil (75,000) winicob yomo' bʌ i jisañob, pero ma'anic tsi' ch'ʌmbeyob i lum mi i chubʌ'an.

¹⁷Jini tsa' ujti che' ti 28 de febrero. Che' ti yijc'ʌlal tsi' c'ajayob i yo. Tsi' cha'leyob q'uiñijel cha'an tijicñayob i pusic'al.

¹⁸Cha'p'ejl q'uin tsi' tempayob i bʌ jini año' bʌ ti Susa. Ti' yuxp'ejlel q'uin tsi' c'ajayob i yo. Jini cha'an tsi' cha'leyob q'uiñijel ti yuxp'ejlel q'uin, tijicñayob i pusic'al.

¹⁹Jini cha'an jini judíojob pam pujquemo' bʌ ti xchumtʌl tac mi' cha'leñob q'uiñijel cha'p'ejl q'uin. Tijicñayob i pusic'al mi' to'ol ñusañob q'uin. Mi' chocbeñob majlel i pi'ʌlob chuqui tac sumuc ti c'uxol.

²⁰Mardoqueo tsi' laj otsa ti jun chuqui tsa' ujti. Tsi' chocbeyob majlel jun pejtel judíojob, jini chumulo' bʌ ti lʌc'ʌl yic'ot chumulo' bʌ ti ñajtʌl, ti jujump'ejl colem tejclum tac ba' woli ti yumʌntel jini rey Asuero.

²¹Tsi' subeyob cha'an mi' chʌn ña'tañob jini cojix bʌ q'uin tac ti febrero ti jujump'ejl jab.

²²Come jini q'uin tac i yorajlelʌch i coltʌntel che' bʌ tsi' t'uchtayob i contrajob. Ti jini q'uin tsa' lajmi i ch'ijiyemlel i pusic'al. Tsa' q'uextiyi ti tijicña bʌ. Tsi' cʌyʌyob i yuq'uel cha'an mi' to'ol ñusañob q'uin. Jini cha'an la' i cha'leñob q'uiñijel che' bajche' yom cha'an tijicñayob i pusic'al. La' i chocbeñob majlel i pi'ʌlob chuqui tac sumuc ti c'uxol. La' i yʌq'ueñob i majtan jini p'ump'uño' bʌ, che'en.

²³Jini cha'an jini judíojob tsa' caji' melob che' bajche' tsi' subeyob Mardoqueo ti' ts'ijbujel,

²⁴come Amán (i yalobil Hamedata i p'olbal bʌ Agag), tsi' ñopo i tsʌnsañob. I contrajʌch judíojob ti pejtelel. Tsi' cha'le yajcaya ti alas cha'an mi' ña'tan baqui bʌ q'uin yom mi' yʌc'ob ti tsʌnsʌntel cha'an mi' junyajlel jisañob.

²⁵Ma'anic tsa' mejli come tsa' ochi Ester ti' tojlel rey. Jini rey tsi' yʌc'ʌ ti ts'ijbuntel mandar cha'an mi' junyajlel jilel chuqui tsi' ñopo i mel Amán. Jini cha'an jini jontolil tsa' bʌ i ña'ta i mel Amán ti' tojlel judíojob tsa' cha' c'oti ti' tojlel. Tsa' laj ts'ʌy cʌjchiyob Amán yic'ot i yalobilob ti jich'oñib.

²⁶Jini cha'an jini judíojob tsi' yotsʌbeyob i c'aba' Purim jini cha'p'ejl q'uin, come yajcʌbil jini q'uin ti alas, i c'aba' Pur. Tsi' yʌc'ʌyob i bʌ ti' melol q'uin cha'an mi' chʌn ña'tañob pejtel chuqui tsa' ujti ti' tojlelob cha'an i juñilel Amán. Pero tsa' q'uextiyi jini ch'ijiyem bʌ i pusic'al cha'an tijicña bʌ.

²⁷Jini cha'an tsi' cha'leyob mandar cha'an mi' chʌn melob ili q'uin i p'olbal judíojob ti pejtelel ora cha'an mi' chʌn ña'tañob chuqui tsa' ujti ti' tojlel i tatob. Wersa mi' melob q'uin cha'p'ejl q'uin ti jini jach bʌ tsic ti jujump'ejl jab che' bajche' ts'ijbubil. Mach yomic mi' cʌyob i mel.

²⁸Wersa mi' chʌn ña'tañob jini q'uin ti pejtelel ora cha'an mi' melob q'uin jini tatʌlob yic'ot i yalobilob ti jujump'ejl xchumtʌl yic'ot ti jujump'ejl tejclum, mi colem, mi ch'o'ch'oc. Mach yomic mi' cʌyob i mel q'uin mi jump'ejlic jab ame sajtic ti' pusic'al judíojob, ame i junyajlel cʌyob i yalobilob.

²⁹Jini co'ʌl Ester (i yalobil bʌ Abihail) yic'ot Mardoqueo, jini judío, tsi' meleyob yambʌ jun, jini cha'p'ejlel bʌ, ba' tsi' yʌc'ʌyob ti' wenta judíojob cha'an mi' melob jini q'uin Purim che' bajche' ts'ijbubil.

³⁰Tsi' chocbeyob majlel jun pejtel judíojob año bʌ ti jini wucp'ejl i wucc'al colem tejclum ba' woli ti yumʌntel Asuero cha'an mi' ñuq'uesʌbeñob i pusic'al cha'an i ña'tʌntel jini tsa' bʌ ujti ti isujm.

³¹Jini cha'an mi' melob q'uin, i c'aba' Purim, ti jini jach bʌ tsic ti jujump'ejl jab che' bajche' tsi' subeyob Mardoqueo yic'ot Ester i yijñam rey. Mi' melob q'uin che' bajche' cʌntesʌbilob ti' tatob cha'an mi' ña'tañob bajche' tsa' lajmi ch'ajb yic'ot uq'uel.

³²I mandar jini co'ʌl Ester tsi' ñʌmtesayob ti' melol q'uin, i c'aba' Purim, cha'an mi' chʌn melob ti pejtelel ora. Tsa' chujqui ti jun bajche' yom melol cha'an mi' ña'tʌntel ti pejtelel ora.