Read Chol Exodo 1 Bible Online

Exodo 1 - Chol bible

Exodo 1

¹Jiñobʌch i c'aba' jini israelob tsa' bʌ c'otiyob ti Egipto yic'ot Jacob. Ti jujuntiquil tsa' c'otiyob yic'ot i pi'ʌlob:

²Rubén, Simeón, Leví, Judá,

³Isacar, Zabulón, Benjamín,

⁴Dan, Neftalí, Gad, Aser.

⁵An lujuntiquil i chʌnc'al i p'olbal Jacob ti pejtelel. Ya'an José ti Egipto.

⁶Tsa' chʌmiyob José yic'ot i yerañob yic'ot pejtel i pi'ʌlob.

⁷Tsa' wen p'ojliyob jini israelob. Wen cabʌlob. Wen p'ʌtʌlob. Ma'anix jochol bʌ lum ba'añob.

⁸Ti jim bʌ ora juntiquil rey tsa' ochi ti' ye'tel ti Egipto. Ma'anic tsi' cʌñʌ José. Tsa' caji' pejcan winicob x'ixicob:

⁹Awilan, ñumen ñuc jini israelob bajche' joñonla. Ñumen p'ʌtʌlob.

¹⁰La' lac p'ʌtesan lac bʌ ti' contra cha'an ma'anix mi' chʌn p'ojlelob. Mi tsa' tejchi guerra mi caj i coltañob laj contrajob. Che' jini mi caj i contrajiñonla. Mi caj i loq'uelob ti lac lum, che'en.

¹¹Jini cha'an tsi' wa'choco mayordomojob cha'an mi' tic'lañob ti al bʌ i cuch. Jini israelob tsi' melbeyob Faraón jini tejclum tac i c'aba' Pitón yic'ot Ramesés ba' mi' much'quiñob trigo.

¹²Anquese tsa' wen tic'lʌntiyob jini israelob ñumen tsa' p'ojliyob. Tsa' wen oñ'ayob ti jini lum. Jini cha'an jini egiptojob tsi' bʌc'ñayob jini israelob.

¹³Tsi' tic'layob ti majtan e'tel, wen wocol bʌ.

¹⁴Tsi' yʌq'ueyob i ch'ijiyemlel i pusic'al cha'an tsʌts bʌ e'tel ti ladrillo yic'ot mezcla, yic'ot pejtel yambʌ e'tel ti cholel. Tsi' wersa ac'ʌyob ti wocol bʌ e'tel.

¹⁵Jini rey am bʌ ti Egipto tsi' subeyob i co'ob hebreojob (i c'aba' juntiquil jiñʌch Sifra, i c'aba' yambʌ jiñʌch Fúa):

¹⁶Che' mi' q'uelob pañimil i yalobilob hebreojob, mi ch'iton, yom mi la' tsʌnsan. Mi xch'oc, la' colic, che'en.

¹⁷Pero jini co'ʌlob tsi' bʌc'ñayob Dios. Ma'anic tsi' meleyob che' bajche' tsi' yʌq'ueyob mandar i rey Egipto. Ma'anic tsi' tsʌnsayob jini ch'itoño' bʌ.

¹⁸Jini rey tsi' pʌyʌ tilel co'ʌlob. Tsi' c'ajtibeyob: ¿Chucoch tsa' la' mele che' bajche' jini? ¿Chucoch ma'anic tsa' la' tsʌnsa jini ch'itoñob? che'en.

¹⁹Jini co'ʌlob tsi' subeyob Faraón: Mach lajalobic c pi'ʌlob lojon bajche' x'ixicob ti Egipto, come ch'ejlob. Che' maxto julemonic lojon mi' yilañob pañimil i yalobilob, che'ob.

²⁰Jini cha'an Dios uts'at tsi' q'uele jini co'ʌlob. Jini winicob tsa' wen p'ojliyob. Tsa' wen p'ʌtayob.

²¹Dios tsi' yʌq'ueyob i yalobilob jini co'ʌlob, come tsi' bʌc'ñayob Dios.

²²Che' jini Faraón tsi' yʌq'ue mandar pejtelel winicob x'ixicob ti' lumal: Che' mi' yilan pañimil ch'iton ti' tojlel hebreojob, chocola ti colem ja', pero la' cuxtiyic jini xch'oc tacob, che'en.