Read Chol Exodo 11 Bible Online

Exodo 11 - Chol bible

Exodo 11

¹Lac Yum tsi' sube Moisés: An to yom junyajl mic tic'lan Faraón yic'ot egiptojob. Ti wi'il mi caj i choquetla majlel. Che' mi' choquetla majlel, mi caj i wets'etla loq'uel ti junyajlel.

²Subeñob pejtel israelob cha'an mi' c'ajtibeñob i pi'ʌlob ti chumtʌl, winicob yic'ot x'ixicob ja'el, i ch'ʌjlib melbil bʌ ti plata yic'ot oro, cha'an mi' ch'ʌmob majlel, che'en.

³Lac Yum tsi' nijcʌbeyob i pusic'al egiptojob cha'an mi' pʌsbeñob i yutslel i pusic'al jini hebreojob. Wen ñuc tsi' q'ueleyob pejtel egiptojob. Wen ñuc ti' wutob i winicob Faraón yic'ot ti' wutob pejtel egiptojob.

⁴Moisés tsi' sube Faraón: Lac Yum woli' yʌl: “Che' ti yojlil ac'ʌlel mi caj c ñumel ti Egipto.

⁵Pejtel ascuñulo' bʌ ti Egipto mi caj i chʌmelob c'ʌlʌl ti ascuñʌl bʌ i yalobil Faraón c'ʌlʌl ti ascuñʌl bʌ i yalobil jini mozojob woliyo' bʌ ti e'tel ti molino, yic'ot ja'el pejtel ñaxan bʌ alʌc'ʌl.

⁶Mi caj i tejchel c'am bʌ uq'uel ti pejtelel a lumal. Ma'anic ba' tsa' ujti ti yambʌ ora. Ma'anic mi caj i cha' ujtel lajal bajche' jini.

⁷Pero ma'anic chuqui mi caj i tumbentelob israelob, mi winic, mi bʌte'el. Ma'anic mi caj i wis wojiñob ts'i'. Che' jini mi caj la' ña'tan mach lajalobic mij q'uel egiptojob che' bajche' israelob”. Che' woli yʌl lac Yum.

⁸Pejtelel a pi'ʌlob ti e'tel mi caj i tilelob ba' añon. Mi caj i c'uchchocoñob i bʌ tic tojlel. Mi caj i yʌlob: “Loq'uen tic tojlel lojon yic'ot pejtel a pi'ʌlob mu' bʌ i tsajcañetob”. Che' jini mi caj c loq'uel, che'en Moisés. Wen mich'atax tsa' loq'ui Moisés ti' tojlel Faraón.

⁹Lac Yum tsi' sube Moisés: Faraón ma'anic mi caj i jac'beñet jinto mic laj pʌs bʌbʌq'uen tac bʌ c p'ʌtʌlel ti Egipto, che'en.

¹⁰Moisés yic'ot Aarón tsi' pʌsʌyob pejtel ili bʌbʌq'uen tac bʌ i p'ʌtʌlel ti' tojlel Faraón. Lac Yum tsi' tsʌts'esʌbe i pusic'al Faraón. Ma'anic tsi' choco loq'uel israelob ti' lumal.