Read Chol Exodo 2 Bible Online

Exodo 2 - Chol bible

Exodo 2

¹Juntiquil i p'olbal Leví tsi' pʌyʌ xch'oc bʌ i pi'ʌl.

²Jini x'ixic tsa' caji' cʌntan i yalobil. Tsi' yʌc'ʌ ti pañimil ch'iton. Che' bʌ tsi' q'uele i t'ojol jax jini ch'iton, tsi' mucu uxp'ejl uw.

³Che' bʌ ma'anix tsa' mejli i chʌn muc i yalobil, tsi' chajpa chiquib melbil bʌ ti amʌy. Tsi' boño ti asfalto[1] yic'ot i yetsel te'. Tsi' yotsa i yalobil ti' mal. Tsi yʌc'ʌ jini chiquib ti' yojlil amʌyol am bʌ ti' ti' ja'.

⁴I chich tsa' caji i ñajtʌ q'uel chuqui mi' caj ti ujtel.

⁵Jini xch'oc bʌ i yalobil Faraón tsa' c'oti i cha'len ts'ʌmel ya' ti ja'. Jini xch'oc bʌ i pi'ʌlob tsi' cha'leyob xʌmbal ti' ti' ja'. I yalobil Faraón tsi' q'uele jini chiquib ti' mal jini amʌyol. Tsi' sube juntiquil i pi'ʌl cha'an mi' ch'ʌmben tilel.

⁶Che' bʌ tsi' jamʌ jini chiquib tsi' q'uele alʌl. Woli ti uq'uel jini ch'iton. Tsi' p'unta. Tsi' yʌlʌ: Jiñʌch juntiquil hebreo, che'en.

⁷Tsa' tili i chich jini alʌl. Che' jini i chich tsi' sube i yalobil Faraón: ¿A wom ba mic majlel c pʌybeñet tilel xmec' alʌl ti' tojlel hebreojob cha'an mi' tsu'san jini alʌl? che'en.

⁸I yalobil Faraón tsi' sube: Yomcu, che'en. Jini xch'oc tsa' majli i pʌy tilel i ña' jini alʌl.

⁹I yalobil Faraón tsi' sube: Pʌyʌ majlel ili alʌl cha'an ma' cʌntʌbeñon. Mi caj cʌq'ueñet a tojol, che'en. Jini x'ixic tsi' pʌyʌ majlel i yalobil cha'an mi' cosan.

¹⁰Tsa' coli jini alʌl. I ña' tsi' cha' pʌyʌ tilel ba'an i yalobil Faraón. Tsa' ochi ti' yalobil. Tsi' yotsʌbe i c'aba' Moisés, come tsi' yʌlʌ: Tsac loc'sa ti ja', che'en.

¹¹Che' ñuquix Moisés tsa' majli ti xʌmbal ti' tojlel i pi'ʌlob. Tsi' q'uele woliyob ti wocol cha'an al i cuch. Tsi' q'uele woli' jajts'el juntiquil hebreo i pi'ʌl bʌ cha'an juntiquil egipto.

¹²Moisés tsi' joy q'uele pañimil. Che' ma'anic majqui woli' q'uele', tsi' tsʌnsa jini egipto. Tsi' mucu ti ji'lum.

¹³Che' ti yijc'ʌlal tsa' cha' loq'ui ti xʌmbal. Awilan, woli' jats'ob i bʌ cha'tiquil hebreojob. Moisés tsi' sube jini am bʌ i mul: ¿Chucoch wola' jats' a pi'ʌl? che'en.

¹⁴Tsi' jac'ʌ: ¿Majqui tsi' wa'chocoyet ti yumʌl tic tojlel lojon cha'an ma' cha'len meloñel? ¿A wom ba a tsʌnsañon lojon che' bajche' tsa' tsʌnsa jini egipto? che'en. Moisés tsa' caji ti bʌq'uen. Tsi' ña'ta: Tsiquilix jini tsa' bʌ c cha'le. Che' tsi' ña'ta.

¹⁵Che' bʌ tsi' yubi Faraón jini tsa' bʌ i mele Moisés, tsi' ña'ta i tsʌnsan. Moisés tsa' puts'i ti' tojlel Faraón. Tsa' ajni ti' lumal Madián.

¹⁶Ya' tsa' buchle ti' ti' pozo. An wuctiquil xch'oc bʌ i yalobilob jini motomaj ti Madián. Tsa' tiliyob ti luch ja' jini xch'ocob. Tsi' but'uyob i yajñib ja' cha'an mi' japob jini tiñʌme' i cha'an i tat.

¹⁷Tsa' tiliyob xcʌnta tiñʌme'ob. Tsa' caji' wets'ob jini xch'ocob. Pero Moisés tsi' colta jini xch'ocob. Tsi' yʌq'ueyob i jap ja' jini tiñʌme' i cha'añob.

¹⁸Tsa' sujtiyob ti' yotot ba'an i tat i c'aba' Reuel. I tat tsi' subeyob: Ora jach tsa' sujtiyetla wʌle. ¿Chucoch? che'en.

¹⁹Tsi' jac'ʌyob: Juntiquil winic ch'oyol bʌ ti Egipto tsi' coltayon lojon. Jini cha'an ma'anic tsi' mʌctayonla jini xcʌnta tiñʌme'ob. Jini winic tsi' luchbeyon lojon ja'. Tsi' yʌq'ue i jap la cʌlac', che'ob.

²⁰Reuel tsi' sube i yalobilob: ¿Bacan jini winic? ¿Chucoch tsa' la' cʌyʌ? Pʌyʌla tilel cha'an mi' c'ux waj, che'en.

²¹Moisés tsi' jac'ʌ majlel ya' ti' yotot Reuel. Ya'ix tsa' cʌle. Jini winic tsi' yʌq'ue Moisés xch'oc bʌ i yalobil i c'aba' Séfora cha'an i yijñam.

²²Tsi' yʌc'ʌ ti pañimil i yalobil. Moisés tsi' yotsʌbe i c'aba' Gersón, come tsi' yʌlʌ: Ch'oyolon ti ñajtʌl. Mach c lumalic ilayi, che'en.

²³Che' bʌ tsa' ñumi cabʌl q'uin, tsa' chʌmi jini rey ti Egipto. Jini hebreojob año' bʌ ti Egipto tsi' cha'leyob ajcʌn yic'ot uq'uel cha'an tsʌts bʌ e'tel. Dios tsi' yubi jini ajcʌn cha'an cabʌl i wocol ti' wenta i yumob.

²⁴Tsi' ña'ta jini xuc'ul bʌ t'an tsa' bʌ i yʌq'ue Abraham yic'ot Isaac yic'ot Jacob.

²⁵Dios tsi' q'uele jini israelob ti' yutslel i pusic'al. Tsi' ch'ʌmʌyob ti' wenta.