Read Chol Exodo 22 Bible Online

Exodo 22 - Chol bible

Exodo 22

¹Majqui jach mi' xujch'in mi wacax mi tiñʌme', mi tsi' tsʌnsa, mi tsi' choño, wersa mi' q'uextʌben i yum jo'cojt wacax mi chʌncojt tiñʌme'.

²Che' mi' tajtʌl xujch' woli bʌ i yochel ti' yotot yambʌ winic che' ñup'ul otot, mi tsa' lojwi, mi tsa' chʌmi, ma'anic i mul jini tsa' bʌ i lowo.

³Mi tsa' ujti che' ti q'uiñil an i mul jini mu' bʌ i tsʌnsan. Che' mi' tajtʌl xujch' mi caj i sutq'uin jini tsa' bʌ i ch'ʌmʌ. Mi mach mejlic, mi caj i chojñel ti to'ol e'tel cha'an mi' tojbentel i yum.

⁴Mi tsa' tajle yic'ot i xujch' mi cuxul to jini wacax, mi burro, mi tiñʌme', cha'yajl mi caj i tojben i yum.

⁵Majqui jach mi' yotsan i yʌlac' ti buc'bal mi ti jamil mi ti ts'usubil ti' tojlel i pi'ʌl, mi tsi' colo ti xʌmbal i yʌlac', wersa mi caj i toj. Mi caj i yʌq'uen i pi'ʌl i q'uexol pejtel chuqui tsi' jisa.

⁶Mi an majqui mi' pul cholel, mi tsa' c'axi c'ajc ti' lum yambʌ winic, mi tsa' puli jini much'quibil bʌ jam am bʌ i wut yic'ot jini wa'al to bʌ jam, wersa mi caj i toj.

⁷Che' an chuqui ma' wʌq'uen a pi'ʌl cha'an mi' cʌntʌbeñet mi taq'uin mi a wʌlac', mi tsa' xujch'ibenti loq'uel ya' ba' lotol, mi tsa' tajle jini xujch', wersa mi' toj cha'yajl.

⁸Mi ma'anic tsa' tajle jini xujch' wersa mi' pʌjyel majlel a pi'ʌl ba' mi' cha'leñob meloñel cha'an mi' tsictiyel mi jini tsi' ch'ʌmʌ.

⁹Che' an chuqui sajtem, mi wacax, mi burro, mi tiñʌme', mi pisil, mi yambʌ, mi tsi' cha' taja i yum che' ya'an yic'ot yambʌ winic mach bʌ yomic i sutq'uiben, che' jini mi caj i majlelob jini cha'tiquilob ba' mi' melob i bʌ. Jini tsa' bʌ tajle i mul ti' tojlel xmeloñel mi caj i q'uextʌben cha'yajl.

¹⁰Che' an chuqui ma' wʌq'uen yambʌ winic cha'an mi' cʌntʌbeñet, mi burro mi wacax mi tiñʌme' mi alʌc'ʌl, mi tsa' chʌmi, mi tsa' lojwi, mi tsa' sajti che' ma'anic majqui woli' q'uel,

¹¹wersa mi la' majlel la' mel la' bʌ ba' mi' yujtel meloñel cha'an mi' tsictiyel mi tsi' chilbeyet a chubʌ'an. Mi ma'anic tsi xujch'i, la' i sub ti' tojlel Dios. Wersa mi caj a ñopben i t'an. Ma'anic mi caj i yʌq'ueñet i tojol.

¹²Pero mi tsi' xujch'i jini alʌc'ʌl, wersa mi caj i yʌq'ueñet i tojol.

¹³Mi tsi' c'uxu bʌte'el, la' i ch'ʌmbeñet tilel i colojbal cha'an mi' tsictesan. Che' jini ma'anic mi caj i toj.

¹⁴Majqui jach mi' majñan alʌc'ʌl ti' tojlel i pi'ʌl, wersa mi caj i tojben i yum mi tsa' lojwi, o mi tsa' chʌmi che' mach ya'ic an i yum.

¹⁵Mi ya'ʌch an i yum alʌc'ʌl, ma'anic mi caj i toj. Che' ja'el mi tsi' yʌq'ue taq'uin cha'an mi' poj c'ʌn ti e'tel, jasʌl jach.

¹⁶Mi an juntiquil winic mu' bʌ i lotin xch'oc, mi tsa' wʌyi yic'ot, wersa mi caj i yʌc' i tojol ñujpuñijel. Wersa mi caj i pʌy cha'an i yijñam anquese ma'anic tsi' c'ajti.

¹⁷Mi mach yomic i sijin i tat jini xch'oc, mux i to'ol toj ñujpunijel jini winic.

¹⁸Yom mi' tsʌnsʌntel xwujt.

¹⁹Mi an mu' bʌ i pi'len alʌc'ʌl wersa mi' tsʌnsʌntel.

²⁰Wersa mi' tsʌnsʌntel jini mu' bʌ i yʌq'uen i majtan dioste'. Cojach lac Yum mi' yʌq'uentel i majtan.

²¹Mach ma' lotin jini mach bʌ a pi'ʌlic ch'oyol bʌ ti yambʌ lum, come parte ba' ch'oyoletla che' bʌ ya' añetla ti Egipto.

²²Mach mi la' tic'lan meba' x'ixic yic'ot meba' alʌl.

²³Mi tsa' la' tic'la, mi c'am tsi' pejcayon, mi caj cubiben i t'an.

²⁴Mi caj c wen mich'an, mi caj c tsʌnsañetla ti espada. La' wijñam yic'ot la' walobilob mi caj i yochelob ti meba'.

²⁵Che' ma' wʌq'ueñob taq'uin ti majan c cha'año' bʌ cha'an pobrejob, mach ma' ch'ʌmben i jol che' bajche' xp'ojlesa taq'uiñob.

²⁶Mi tsa' ch'ʌmbe i pislel jini p'ump'un bʌ i wenta prenda, yom ma' cha' aq'uen che' mi' yic'an.

²⁷Come jini pisil lʌpbil bʌ i cha'an jiñʌch i mosil che' ti ac'ʌlel. Mi ma'anic ma' sutq'uiben, ¿bajche' mi' caj ti wʌyel? Che' c'am mi' pejcañon mi caj cubiben i t'an, come cujil c'uxbiya.

²⁸Mach ma' p'aj Dios mi jinic am bʌ i ye'tel.

²⁹Che' i yorajlelix c'ajbal mach mi' jal'an c majtan mu' bʌ caj a wʌq'ueñon, i diezmojlel tac pejtel i wut lum. Aq'ueñon ja'el jini ascuñʌl bʌ a walobilob.

³⁰Aq'ueñon ja'el i yʌx'al a wacax yic'ot a tiñʌme'. Wucp'ejl q'uin mi' cʌytʌl yic'ot i ña'. Ti waxʌcp'ejlel q'uin mi caj a wʌq'ueñon.

³¹Yom mi la' wajñel ti ch'ujul. Mi tsi' c'uxu a wʌlac' jini bʌte'el mach mi la' c'ux i colojbal i we'el che' mi la' taj ti jamil. Yom mi la' chocben ts'i'.