Read Chol Exodo 23 Bible Online

Exodo 23 - Chol bible

Exodo 23

¹Mach ma' p'ojlesan t'an che' mach a wujilic mi isujm. Mach ma' cha'len lot cha'an ma' mucben i mul xjontolil.

²Anquese cabʌlob mu' bʌ i cha'leñob jontolil, mach ma' tsajcañob majlel ti jontolil. Mach ma' cha'len lot ti' tojlel am bʌ i ye'tel cha'an ma' taj a c'uxbintel ti' tojlel a pi'ʌlob.

³Mi an i mul juntiquil pobre bʌ, mux i toj anquese ma'anic i chubʌ'an. Mach jelchojquic jach mi caj a c'uxbin.

⁴Che' ma' tajben i yʌlac' a contra che' sajtem, yom ma' cha' pʌsben i yum.

⁵Mi tsa' taja burro tsa' bʌ yajli yic'ot i cuch, mach ma' to'ol ñusan. Anquese i cha'an a contra mu' bʌ i ts'a'leñet, yom ma' coltan.

⁶Mach ma' coltan jini rico ti' contra jini pobre, come che' jini mi' sojquel meloñel.

⁷Mach ma' jop'ben i mul yambʌ. Mach ma' wʌc' ti tsʌnsʌntel jini mach bʌ anic i mul, come ma'anic mi caj c ñusʌbeñet a mul che' jini.

⁸Mach ma' mucul ch'ʌm a majtan, come che' mi' ch'ʌm i majtan jini am bʌ i ña'tʌbal, mi' jac' i lotintel. Che' jini, mi' yubin wocol jini toj bʌ winic ti' tojlel xmeloñel.

⁹Mach yomic ma' tic'lan jini ch'oyol bʌ ti yambʌ lum. La' wujil bajche' yubil che' añetla ti yambʌ lum, come tsa' ajniyetla ti Egipto.

¹⁰Wʌcp'ejl jab mi caj la' cha'len pac' yic'ot c'ajbal ila ti lum.

¹¹Che' tsa'ix ts'ʌctiyi wʌcp'ejl jab yom ma' poj aq'uen i c'aj i yo jini lum jump'ejl jab. Jini a pʌc'ʌb mu' bʌ i yʌc' i wut la' i c'uxob jini p'ump'uño' bʌ. Mi tsa' to cʌle la' i c'ux bʌte'el. Che'ʌch yom mi' yujtel ja'el ti a ts'usubil yic'ot olivojil.

¹²Wʌcp'ejl q'uin mi caj a cha'len e'tel. Ti wucp'ejlel q'uin mi caj a c'aj a wo yic'ot a wacax yic'ot a burro. Che' jini mi mejlel i c'aj i yo i yalobil xe'tel a cha'an yic'ot a jula' ch'oyol bʌ ti yambʌ lum.

¹³Ch'ʌmʌla ti la' wenta pejtelel chuqui tsac subeyetla. Mach la' pejcan dioste' tac. Mach yomic mi' yubintel i c'aba' dioste' tac ti la' tojlel.

¹⁴Uxyajl mi caj la' melbeñon q'uiñijel ti jujump'ejl jab.

¹⁵Yom mi la' mel jini q'uiñijel cha'an waj mach bʌ anic i levadurajlel. Wucp'ejl q'uin mi caj la' c'ux waj mach bʌ anic i levadurajlel che' bajche' tsac subeyetla ti mandar. Yom mi la' mel jini q'uiñijel che' ti marzo, come ti ili ora tsa' loq'uiyetla ti Egipto. Ti jujuntiquiletla yom mi la' wʌq'ueñon c majtan.

¹⁶An i q'uiñilel c'ajbal ja'el che' mi la' wʌq'ueñon ñaxan bʌ i wut pʌc'ʌbʌl. Che' ti' jilibal jujump'ejl jab an q'uiñijel ja'el cha'an i wut pejtelel pʌc'ʌbʌl, che' bʌ tsa'ix la' tuc'u ochel pejtelel i wut pʌc'ʌbʌl.

¹⁷Uxyajl ti jujump'ejl jab wersa mi la' pʌs la' bʌ tic tojlel ti la' pejtelel.

¹⁸Mach mejlic la' wʌq'ueñon i ch'ich'el c majtan yic'ot waj am bʌ i levadurajlel. I lewil jini we'elʌl mach mejlic la' lot c'ʌlʌl che' ti sʌc'ajel.

¹⁹Yom mi la' tuc' ochel ti cotot jini ñaxan bʌ i wut la' pʌc'ʌb, jini yajcʌbil bʌ. Mach mejlic la' ch'ʌx alʌ tiñʌme' mi chivo ti' ya'lel i chu' i ña'.

²⁰Awilan wolic chocbeñetla majlel jini cAngel ti la' tojlel cha'an mi' cʌntañetla majlel. Mi caj i pʌyetla majlel ti la' wajñib chajpʌbil bʌ c cha'an.

²¹P'isi ti la' wenta. Jac'benla i t'an. Mach la' ñusʌben i t'an, come ma'anic mi caj i ñusʌbeñet la' mul. Mi caj c tsictesan c bʌ ti la' tojlel quic'ot cAngel.

²²Mi uts'at mi la' jac'ben i t'an, cha'an mi la' mel che' bajche' tsi' subeyetla, mi caj j contrajin la' contrajob. Mi caj c tic'lan jini mu' bʌ i tic'lañetla.

²³Come jini cAngel ñaxan mi caj i majlel ti' tojel la' wut cha'an mi' pʌyetla majlel ti' lumal amorreojob yic'ot heteojob yic'ot ferezeojob yic'ot cananeojob yic'ot heveojob yic'ot jebuseojob. Mi caj c jisañob ti pejtelel.

²⁴Mach yomic mi la' ch'ujutesan i dioste' tac. Mach yomic mi la' cha'libeñob i ye'tel. Mach yomic mi la' mel che' bajche' i melbalob. Yom mi la' jisañob ti pejtelelob. Yom mi la' jem pejtelel i dioste' tac.

²⁵Joñon a Yumon a Dioson. Yom mi la' melbeñon que'tel. Mi caj cʌq'ueñetla cabʌl i bʌl la' ñʌc yic'ot ja'. Mi caj c lajmesʌbeñetla la' c'amʌjel.

²⁶Ma'anic mi caj i puts'el i yalobil mi juntiquilic x'ixic. Mux i cʌntañob i yalobilob pejtelel x'ixicob. Mi caj c ts'ʌctesan la' jabilel.

²⁷Mi caj c bʌc'tesan la' contrajob. Mi caj i toj sajtelob i pusic'al pejtelel winicob x'ixicob ba' mi caj la' c'otel. Mi caj c puts'tesan pejtelel la' contrajob.

²⁸Mi caj c choc tilel jini bʌbʌq'uen bʌ lajal bʌ bajche' xux ti' tojlel la' contrajob. Mi caj i puts'elob loq'uel ti la' tojlel jini heveojob yic'ot cananeojob yic'ot heteojob.

²⁹Ma'anic mi caj c chocob loq'uel ti la' tojlel ti jump'ejl jach jab cha'an jochol mi' cʌytʌl jini lum, ame che'ic mi' wen p'ojlel jini bʌte'el ti jamil.

³⁰C'unte' jach mi caj c choc loq'uel ti la' tojlel, jinto mi la' wen p'ojlel cha'an mi la' ch'ʌm ti la' wenta jini lum.

³¹Ya' jaxʌl la' lum ti Chʌchʌc bʌ Najb, yic'ot ya' ti colem ñajb ba'an filisteojob, yic'ot ba'an tiquin bʌ lum c'ʌlʌl ti colem ja' i c'aba' Eufrates, come mi caj cʌc' ti la' wenta pejtelel winicob x'ixicob año' bʌ ti jini lum. Jatetla mi caj la' chocob loq'uel.

³²Mach mi la' mel trato yic'otob. Mach yomic mi la' pejcan i dioste' tac.

³³Mach yomic temel mi' yajñelob la' wic'ot ti la' lumal, ame mi' pʌyetob ti mulil tij contra. Mi mux la' ch'ujutesan i dioste' tac, mi caj la' yajlel ti' p'ʌtʌlel cha'an mi la' cʌyon”, che'en.