Read Chol Exodo 27 Bible Online

Exodo 27 - Chol bible

Exodo 27

¹Yom mi la' c'ʌn acaciate' cha'an mi la' mel jini pulʌntib*. Lajal yom i tamlel ti chʌnxujc'ubʌyel, ojlil i yuxp'ejl metro i tamlel ti jujunwejl. I chanlel jiñʌch ojlil i cha'p'ejl metro.

²Yom mi la' melben i xulup ti' chʌmp'ejlel i xujc jini pulʌntib. Laj tep'bil yom ti bronce. Wen tsuyul yom ya' ti xujc tac.

³Yom mi la' mel ja'el poc' tac, yic'ot pala tac, yic'ot wechel tac bʌ e'tijibʌl cha'an mi la' c'ʌn la' jop loq'uel jini tan. Yom taza tac ja'el yic'ot pejtelel yan tac bʌ mu' bʌ i c'ʌjñel. Laj melbil yom ti bronce.

⁴Che' ja'el yom mi la' mel chincholtic bʌ ti bronce. Ya' ti' ti' jini chincholtic bʌ yom mi la' wʌc' chʌmp'ejl xotol tac bʌ tsucu taq'uin melbil bʌ ti bronce.

⁵Yom mi la' wʌc' ya' ti yebal ba' mʌcbil jini pulʌntib. Yom wen an ti' yojlil jini pulʌntib jini chincholtic bʌ.

⁶Che' ja'el yom mi la' c'ʌn jini acaciate' cha'an mi la' mel bara tac cha'an jini pulʌntib. Yom tep'bil ti bronce.

⁷Yom mi' yochel jini bara ba' xotol jini tsucu taq'uin tac. Yom laj bʌ ñumen i ni' ti jujunwejl jini pulʌntib.

⁸Tocol yom i mal jini pulʌntib. Ti tabla yom mi la' mel che' lajal bajche' tsac pʌsbeyet ya' ti wits.

⁹Yom mi la' melben i patiojlel jini Tabernáculo. Ya' ti sur yom mi la' joc'chocon jini wen jalbil bʌ lino. I tamlel jiñʌch lujump'ejl i yuxc'al (50) metro. Yom junc'al i postejlel yic'ot junc'al i c'ʌclib ti bronce. Melbil yom ti plata i joc'lib tac, yic'ot jini xotol tac bʌ.

¹¹Che' ja'el ti norte yom mi la' joc'chocon jini pisil. I tamlel jiñʌch lujump'ejl i yuxc'al metro. Yom junc'al i postejlel yic'ot junc'al i c'ʌclib. Melbil yom ti plata i joc'lib tac yic'ot jini xotol tac bʌ.

¹²Jini i tamlel jini patio ti' tojel i bʌjlibal q'uin yom jo'p'ejl i cha'c'al (25) metro. Yom lujunts'ijt i postejlel yic'ot lujump'ejl i c'ʌclib tac.

¹³I tamlel jini patio ba' mi' pasel q'uin jiñʌch jo'p'ejl i cha'c'al metro.

¹⁴Jini cortina ti' tojel ba' mi la cochel yom ojlil i waxʌcp'ejl metro. Yom uxts'ijt i te'el yic'ot i c'ʌclib tac, che' ja'el ti yambʌ junwejl ba' mi la cochel.

¹⁶I mʌjquil jini patio jiñʌch cortina am bʌ lujump'ejl metro i tamlel, wen joch'bil bʌ ti yʌjyʌx bʌ, ti chʌccojan bʌ, yic'ot ti chʌchʌc bʌ, wen jalbil ti lino. Yom chʌnts'ijt i te'el yic'ot i buchlib tac.

¹⁷Yom cʌchbil tac ti plata pejtelel i te'el ti' joytʌlel jini patio. Yom melbil ti plata ja'el i joc'lib yic'ot i c'ʌclib tac melbil ti bronce.

¹⁸I tamlel jini patio yom lujump'ejl i yuxc'al metro. I xujc yom jo'p'ejl i cha'c'al metro. I chanlel jini cortina tac jiñʌch ojlil i yuxp'ejl metro. Jini cortina tac wen jalbil yom ti pino bʌ lino. Melbil yom ti bronce i c'ʌclib tac.

¹⁹Yom laj melbil ti bronce pejtelel mu' bʌ i c'ʌjñel ti melol jini Tabernáculo, yic'ot i joc'lib tac.

²⁰Yom ma' subeñob jini israelob cha'an mi' ch'ʌmbeñetob tilel i ya'lel olivote' che' cujbilix cha'an i c'ʌc'al Tabernáculo, cha'an mi' lejmel ti pejtelel ora jini c'ajc.

²¹Yom mi la' wʌc' jini c'ajc ti Ch'ujul bʌ Ajñibʌl. Yom ma' wa'chocon Aarón yic'ot i p'olbalob cha'an mi' chʌcʌ q'uelob jini c'ajc ti ic'ajel yic'ot ti sʌc'ajel. Jiñʌch jump'ejl mandar yom bʌ ti' tojlel israelob ti pejtelel ora.