Read Chol Exodo 3 Bible Online

Exodo 3 - Chol bible

Exodo 3

¹Moisés tsa' caji' cʌntʌben i yʌlac' i nij'al i c'aba' Jetro. Jiñʌch motomaj am bʌ ti Madián. Tsi' pʌyʌ majlel jini tiñʌme' ba'an colem bʌ i tiquiñal pañimil ya' ba' mi' bʌjlel q'uin. Tsa' c'oti ya' ti Horeb jini wits yajcʌbil bʌ i cha'an Dios.

²I yAngel lac Yum tsi' pʌsʌ i bʌ ba'an Moisés ya' ba' woli ti lejmel c'ajc ba' wa'al alʌ te'. Tsi' q'uele woli ti lejmel jini alʌ te', pero ma'anic woli' jilel.

³Moisés tsi' yʌlʌ: Mi caj c poj majlel j q'uel ili bʌbʌq'uen bʌ. ¿Chucoch ma'anic tsa' puli jini alʌ te'? che'en.

⁴Che' bʌ lac Yum tsi' q'uele woli' majlel Moisés cha'an mi' q'uele', Dios tsi' pejca ti jini alʌ te': Moisés, Moisés, che'en. Tsi' jac'ʌ: Wʌ' añon, che'en.

⁵Dios tsi' yʌlʌ: Mach a ñochtan. Loc'san a warach ti a woc, come ch'ujul jini lum ba' wa'alet, che'en.

⁶Tsi' yʌlʌ: Joñon i Dioson a tat, i Dioson Abraham, i Dioson Isaac, i Dioson Jacob, che'en. Moisés tsi' mʌcʌ i wut come mach yomic i q'uel Dios cha'an bʌq'uen.

⁷Lac Yum tsi' yʌlʌ: Tsa'ix j q'uelbe i wocol c winicob x'ixicob ti Egipto. Tsa'ix cubibe i yoñel cha'an jini xic' e'telob. Cʌmbil c cha'an i wocol.

⁸Tsa'ix jubiyon tilel cha'an mic loc'sañob ti jini lum cha'an mic pʌyob ochel ti wen bʌ lum ba'an cabʌl lech yic'ot chab. Jiñʌch i lumal cananeojob, yic'ot heteojob, yic'ot amorreojob, yic'ot ferezeojob, yic'ot heveojob yic'ot jebuseojob.

⁹Wʌle tsa'ix cubibe i yoñel israelob. Tsa'ix j q'uele bajche' woli' tic'lañob israelob jini egiptojob.

¹⁰La', mi caj c choquet majlel ba'an Faraón cha'an ma' pʌy loq'uel ti Egipto jini israelob, come c cha'añob, che'en.

¹¹Pero Moisés tsi' sube Dios: ¿Chuqui to j cʌjñibal? Ma'anic cabʌl c ña'tʌbal. ¿Mu' ba mejlel c majlel joñon ba'an Faraón cha'an mic pʌy loq'uel ti Egipto jini israelob? Mach mejlicon, che'en.

¹²Pero Dios tsi' yʌlʌ: Mi caj cajñel awic'ot. Mi caj c pʌs c p'ʌtʌlel ti a tojlel cha'an mi' tsictiyel wa'chocobilet c cha'an. Che' bʌ tsa'ix a pʌyʌ loq'uel ti Egipto jini winicob x'ixicob, mi caj la' ch'ujutesañon ti ili wits, che'en.

¹³Moisés tsi' sube: Che' mij c'otel ba'an israelob, che' mic subeñob: “Tsa'ix i chocoyon tilel i Dios la' tat”, mi caj i yʌlob: “¿Chuqui i c'aba'?” Mi che'ob, ¿bajche' yom mic jac'beñob? che'en.

¹⁴Dios tsi' sube Moisés: J c'aba'ʌch Añon, che'en. Tsi' yʌlʌ: Subeñob israelob: “Jini mu' bʌ i sub i bʌ ti Añon tsa'ix i chocoyon tilel ba' añetla”. Che' yom ma' subeñob, che'en Dios.

¹⁵Dios tsi' sube ja'el: Subeñob israelob: “Lac Yum, i Dios lac tat, Abraham, Isaac, yic'ot Jacob, tsa'ix i chocoyon tilel ba' añetla”. Che'ʌch yom ma' subeñob. Jiñʌch j c'aba' ti pejtelel ora. Che' yom mic pejcʌntel ti pejtelel ora.

¹⁶Cucu. Tempan jini ñoxobix bʌ israelob. Subeñob: “Jini lac Yum, i Dios la' tat, i Dios Abraham, i Dios Isaac, i Dios Jacob, tsa'ix i pʌsʌ i bʌ ba' añon. Tsi' subeyon: Julemonix cha'an mic pejcañetla. Tsa'ix j q'uele chuqui woli la' wubin ti Egipto.

¹⁷Mi cʌq'ueñetla c t'an. Mi caj c loc'sañetla ti Egipto ba' woliyetla ti wocol. Mi caj c pʌyetla ochel ti yambʌ lum, i lumal cananeojob yic'ot heteojob yic'ot amorreojob yic'ot ferezeojob yic'ot heveojob yic'ot jebuseojob, ba'an cabʌl lech yic'ot chab”, che'en. Che' yom ma' subeñob, che'en Dios.

¹⁸Mi caj i jac'ob a t'an. Jatet yic'ot jini ñoxo' bʌ israelob mi caj la' majlel ba'an jini rey ti Egipto. Mi caj la' suben: “C Yum lojon, i Dios hebreojob, tsa'ix tili i pejcañon lojon. Jini cha'an mij c'ajtibeñet lojon ti wocol t'an: La' majlicon lojon uxp'ejl q'uin ya' ti colem bʌ i tiquiñal pañimil cha'an mic ch'ujutesan lojon c Yum Dios”. Che' yom mi la' suben.

¹⁹Cujil ma'anic mi caj i yʌc' permiso jini rey jinto tsa'ix c pʌsbe c p'ʌtʌlel.

²⁰Jini cha'an mi caj c pʌsben i p'ʌtʌlel j c'ʌb. Mi caj cʌq'ueñob wocol jini egiptojob. Mi caj c pʌsbeñob c p'ʌtʌlel ti ñuc tac bʌ c melbal. Ti wi'il mi caj i choquetla majlel.

²¹Mi caj c ñijcʌbeñob i pusic'al jini egiptojob cha'an mi' q'ueletla ti uts'at, cha'an mi' yʌq'ueñet la' majtan. Che' mi la' majlel, mach to'ol che'ic jach mi caj la' majlel.

²²Jini x'ixicob ti jujuntiquilob mi caj i c'ajtibeñob i majtan ti' tojlel i pi'ʌlob ti chumtʌl, yic'ot i jula' am bʌ ti' yotot. Mi caj i yʌq'uentelob pisil yic'ot i ch'ʌjlil melbil bʌ ti plata yic'ot oro. Mi caj la' xojbeñob la' walobilob. Che' jini pobrejob mi caj i cʌytʌlob jini egiptojob, che'en Dios.