Read Chol Exodo 33 Bible Online

Exodo 33 - Chol bible

Exodo 33

¹Lac Yum tsi' sube Moisés: Cucu, letsen ilayi, jatet yic'ot ili tejclum tsa' bʌ a loc'sa ti' lumal Egipto. Cucu ba'an jini lum tsa' bʌ c wʌn sube Abraham yic'ot Isaac yic'ot Jacob che' tsac subeyob: “Mi caj cʌq'uen la' p'olbal jini lum”, cho'on.

²Joñon mi caj c chocbeñetla majlel jini ángel ti ñaxan ti la' tojlel. Mi caj c loc'sʌbeñetla jini cananeojob, yic'ot amorreojob, yic'ot hetejob, yic'ot fereseojob, yic'ot heveojob, yic'ot jebuseojob.

³Mi caj c pʌyetla ochel ti jini lum ba' yujil colel pejtelel pʌc'ʌbʌl, pero joñon ma'anic mi caj c tem letsel la' wic'ot, come wen tsʌtsob jax i pusic'al jini israelob, ame mic junyajlel jisañetla ya' ti bij, che'en.

⁴Che' bʌ tsi' yubiyob ili t'an winicob x'ixicob, wen ch'ijiyem tsa' cʌleyob. Ma'anic majqui lʌpbil i ch'ʌjlil come

⁵lac Yum tsa'ix i sube Moisés: Yom ma' subeñob jini israelob: “Wen tsʌts la' pusic'al. Muq'uic c majlel quic'otetla ti bij mic jisañetla ti ora jach. Wʌle loc'san la' ch'ʌjlil cha'an mic ña'tan chuqui mi caj c melbeñetla”, che'en.

⁶Jini israelob tsi' laj loc'sayob i ch'ʌjlil ya' ti wits i c'aba' Horeb.

⁷Baqui jach tsa' c'otiyob Moisés tsi' wa'choco jini Tabernáculo ti' junwejlel tejclum tac. Ñajt tsi' ch'ʌmʌ tac majlel. Tsi' yotsʌbe i c'aba', Jini Tabernáculo ba' mi lac Tempan lac bʌ yic'ot Dios, che'en. Majqui jach mi' sʌclan lac Yum mi' majlel ti' junwejlel tejclum ba' mi' tempañob i bʌ.

⁸Che' baqui ora tsa' majli Moisés ya' ti Tabernáculo, ti' pejtelelob jini winicob tsa' wa'leyob ti jujuntiquil ya' ti' ti'ob i yotot cha'an mi' q'uelob Moisés jinto tsa' c'ʌlʌ ochi ya' ti Tabernáculo.

⁹Che' wolix ti ochel Moisés ya' ti otot, tsa' jubi ti wa'tʌl ya' ti' tojel i ti' jini Tabernáculo, jump'ejl wa'al bʌ Tocal, cha'an mi' pejcañob i bʌ lac Yum yic'ot Moisés.

¹⁰Che' jini pejtelel jini winicob tsi' q'ueleyob jini wa'al bʌ Tocal ya' bʌ an ti' jini Tabernáculo. Ti pejtelel ora che' mi' q'uelob jini, mi' tejchelob ti' ti' i yotot cha'an mi' ch'ujutesañob lac Yum.

¹¹Lac Yum tsi' pejca Moisés ti' wut che' bajche' juntiquil winic mi' pejcan jini cʌñʌl bʌ i cha'an. Che' jini tsa' cha' sujti Moisés ya' ti tejclum. Pero jini ch'iton Josué (i yalobil Nun), jini x'e'tel i cha'an, ma'anic tsa' sujti. Ya' tsa' cʌle ti Tabernáculo.

¹²Moisés tsi' sube lac Yum: Awilan jatet ma' subeñon: “Pʌyʌ majlel ili winicob x'ixicob”, che'et. Pero maxto anic tsa' subeyon majqui mi' majlel quic'ot. Jatet ma' wʌl: “Jatet cʌmbilet c cha'an. Wolix j q'uelet ti' yutslel c pusic'al”, che'et.

¹³Awilan, mi tsac taja i yutslel a pusic'al, mij c'ajtibeñet cha'an ma' pʌsbeñon a bijlel, cha'an mij cʌñet, cha'an mic taj i yutslel a pusic'al ti pejtelel ora. Ña'tan ja'el jini tejclum a cha'añʌch, che'en Moisés.

¹⁴Lac Yum tsi' jac'ʌ: Joñon mi caj c majlel a wic'ot cha'an ma' c'aj a wo, che'en.

¹⁵Moisés tsi' yʌlʌ: Mi ma'anic mi caj a majlel quic'ot, mach a loc'sañon lojon ilayi.

¹⁶Mi ma'anic tsa' majliyet quic'ot lojon, ¿bajche' mi caj i ña'tañob yaño' bʌ mi tsa' pʌsbeyon lojon i yutslel a pusic'al? Mi tsa' majliyon lojon a wic'ot, che' jini tsiquil mach lajalonic lojon che' bajche' yambʌ winicob x'ixicob ti pañimil, che'en.

¹⁷Lac Yum tsi' sube Moisés: Mi caj c mel ja'el ili tsa' bʌ a subeyon, come tsa'ix c pʌsbeyet i yutslel c pusic'al. Mij cʌñet ti a c'aba', che'en.

¹⁸Moisés tsi' sube: Pʌsbeñon a ñuclel, che'en.

¹⁹Lac Yum tsi' jac'ʌ: Pejtelel cutslel mi caj i tsictiyel ti a wut. Mi caj c tsictesan j C'aba' ti a tojlel, Joñoñʌch a Yumon. Mi caj c p'untan majqui com c p'untan. Uts mi caj j q'uel jini com bʌ j q'uel ti uts'at.

²⁰Mach mejlic a q'uel c wut, come ma'anic mi mejlel i q'uelon winic. Mi tsi' q'ueleyon juntiquil mux i chʌmel, che'en.

²¹Tsi' yʌlʌ ja'el: Q'uele jump'ejl ajñibʌl tic tojlel. Jatet mi caj a wajñel ya' ti' pam xajlel tic t'ejl.

²²Che' mi' c'axel c ñuclel, joñon mi caj cambeñet jini xajlel. Mi caj c moset tij c'ʌb c'ʌlʌl jinto mic ñumel.

²³Ti wi'il mi caj c loc'san j c'ʌb. Mi caj a q'uel c pat, pero ma'anic mi caj a q'uel c wut, che'en jini lac Yum Dios.