Read Chol Exodo 38 Bible Online

Exodo 38 - Chol bible

Exodo 38

¹Tsi' c'ʌñʌ acaciate' cha'an tsi' mele jini pulʌntib cha'an pulbil bʌ i majtan tac lac Yum. Lajal i tamlel ti chʌnxujc'ubʌyel, ojlil i yuxp'ejl metro che' ti jujunwejl. I chanlel jiñʌch ojlil i cha'p'ejl metro.

²Tsi' melbe i xulub ti' chʌmp'ejlel i xujc, ya' jach tsa' tem loq'ui i xulub ya' ti pulʌntib. Laj tep'bil ti bronce.

³Tsi' mele ti bronce ja'el poc' tac, yic'ot wechel tac bʌ e'tijibʌl cha'an mi' jopob loq'uel jini tan. Tsi' mele ja'el jini taza tac yic'ot pejtelel yan tac bʌ mu' bʌ i c'ʌjñel.

⁴Tsi' mele chim ti bronce. Tsi' yʌc'ʌ ti yebal ya' ba' joy mʌcbil jini pulʌntib. Jini chim an ti yojlil jini pulʌntib.

⁵Ya' ti' ti' jini chim tsi' yʌc'ʌ chʌmp'ejl xotol bʌ tsucu taq'uin melbil bʌ ti bronce cha'an mi' yochel jini bara tac.

⁶Tsi' c'ʌñʌ acaciate' ti' melol jini bara tac. Tsi' tep'e ti bronce.

⁷Tsi' yotsa jini bara tac ba' xotol jini tsucu taq'uin cha'an mi' mejlel i ch'uyob majlel. Tocol i mal jini pulʌntib.

⁸Tsi' c'ʌñʌ bronce ti' melol i yajñib ja' yic'ot i buchlib. Tsa' loq'ui jini bronce ti espejo tac tsa' bʌ i yʌc'ʌyob jini x'ixicob tsa' bʌ i tempayob i bʌ ya' ti' ti' jini Tabernáculo, come ti wajali puro bronce i yespejo tac.

⁹Tsi' mele jini patio. Ya' ti sur tsi' joc'choco wen jalbil bʌ lino. I tamlel jiñʌch lujump'ejl i yuxc'al (50) metro.

¹⁰Cʌchʌl jini cortina ti junc'al i te'el am bʌ junc'al i c'ʌclib melbil bʌ ti bronce. Melbil i joc'lib ti plata.

¹¹Che' ja'el ti norte tsi' joc'choco yambʌ cortina. I tamlel jiñʌch lujump'ejl i yuxc'al metro. An junc'al i te'el melbil bʌ ti bronce, yic'ot junc'al i c'ʌclib i te'el melbil ti puro bronce. Melbil i joc'lib tac ti plata.

¹²I tamlel jini patio ti' tojel i bʌjlibal q'uin jiñʌch jo'p'ejl i cha'c'al (25) metro. An lujunts'ijt i te'el tac yic'ot lujump'ejl i c'ʌclib. Melbil i joc'lib tac ti plata.

¹³I tamlel jini patio ti' tojel i pasibal q'uin jiñʌch jo'p'ejl i cha'c'al metro. Jini cortina ti jujunwejl ba' mi' yochelob ya' ti Tabernáculo jiñʌch wucp'ejl metro. An uxts'ijt i te'el yic'ot i c'ʌclib tac ti jujunwejl.

¹⁶Pejtelel jini cortina tac cha'an patio melbil ti wen jalbil bʌ lino.

¹⁷Melbil ti bronce i c'ʌclib tac i te'el. Melbil ti plata i joc'lib tac yic'ot jini xotol tac bʌ. Tep'bil ti plata i pam i jol i postejlel jini patio. Jini i te'el tac cʌchbil ti plata.

¹⁸I mʌjquil jini patio jiñʌch cortina am bʌ lujump'ejl metro i tamlel, ojlil i yuxp'ejl metro i xujc, melbil bʌ ti yʌjyʌx bʌ pisil, yic'ot chʌccojan bʌ, yic'ot chʌchʌc bʌ, wen jalbil bʌ lino.

¹⁹An chʌnts'ijt i te'el tac yic'ot chʌmp'ejl i c'ʌclib melbil ti bronce. Melbil ti plata i joc'lib tac, yic'ot jini xotol tac bʌ, yic'ot i te'el tac. Tsi' yʌq'ueyob plata ya' ti' ni' tac cha'an ma'anic mi' jilel.

²⁰Melbil ti bronce i ñejtil jini Tabernáculo yic'ot i ñejtil tac i patiojlel.

²¹Jiñʌch iliyi che' bajche' melbil jini Tabernáculo ba' mi' yotsañob jini Arca, ba' mi mejlel i melob i ye'tel jini levíjob. Tsi' yʌc'ʌ mandar Moisés che' bajche' yom melol. Tsi' q'uele jini e'tel i yalobil jini motomaj Aarón jiñʌch Itamar.

²²Bezaleel tsi' laj mele pejtelel chuqui tac tsi' yʌlʌ lac Yum ti' tojlel Moisés. Bezaleel i yalobilʌch Uri, i buts Ur loq'uem ti' p'olbal Judá.

²³Aholiab tsi' cha'le e'tel yic'ot Bezaleel. Jini Aholiab i yalobilʌch Ahisamac loq'uem bʌ ti' p'olbal Dan, wen yujil i ts'ijbuntel xajlel yic'ot yan tac bʌ chuqui tac yom melol, yic'ot joch'bil tac bʌ pisil, melbil bʌ ti yʌjyʌx, yic'ot ti chʌccojan bʌ, yic'ot chʌchʌc tac bʌ yic'ot fino bʌ lino.

²⁴Jini oro tsa' bʌ c'ʌjni cha'an i yotot Dios an i yalel che' bajche' 1,400 kilo.

²⁵Jini plata tsa' bʌ i yʌc'ʌyob winicob jiñʌch 4,350 kilo. I yonlel pejtelel jini winicob jiñʌch 603,550.

²⁷Tsa' c'ʌjni che' bajche' 4,300 kilo jini plata ti' melol i c'ʌclib tac i te'el jini Tabernáculo, yic'ot ti' melol jini joc'ol bʌ pisil. Tsa' c'ʌjni uxp'ejl i yuxc'al (43) kilo ti jujump'ejl i c'ʌclib.

²⁸Jini plata tsa' bʌ colojbaji tsa' c'ʌjni cha'an i te'el tac. Tsi' tep'eyob pejtelel i chañelal. Tsi' laj cʌchʌyob ja'el.

²⁹Jini bronce tsa' bʌ i yʌc'ʌyob jiñʌch che' bajche' 3,400 kilo.

³⁰Tsa' c'ʌjni bronce ti' melol i c'ʌclib tac i te'el i puertajlel Tabernáculo, yic'ot jini pulʌntib, yic'ot jini chim, yic'ot pejtelel chuqui tac yom c'ʌñol ya' ti pulʌntib.

³¹Tsa' c'ʌjni jini bronce ja'el cha'an i c'ʌclib tac am bʌ ti patio, yic'ot i c'ʌclib tac jini puerta, yic'ot pejtelel jini e'tijibʌl tac i wentajlel lawux.