Read Chol Exodo 40 Bible Online

Exodo 40 - Chol bible

Exodo 40

¹Che' jini lac Yum tsi' pejca Moisés: Ti ñaxan bʌ q'uin ti jini ñaxan bʌ tsic yom ma' wa'chocon jini Tabernáculo ba' mi lac tempan lac bʌ.

³Yom ma' wʌc' jini Arca cha'an lujump'ejl mandar. Yom ma' wʌc' jini joc'ol bʌ pisil cha'an mi' mʌctan jini Arca.

⁴Yom ma' wotsan jini mesa. Yom ma' wʌc' ya' ti mesa jini mu' bʌ i c'ʌjñel tac. Yom ma' wotsan ja'el jini lámpara. Yom ma' tsuc'ben i c'ʌc'al.

⁵Yom ma' wʌc' jini pulʌntib melbil bʌ ti oro cha'an jini pom ti' tojel jini Arca. Yom ma' joc'chocon jini pisil ba' mi' yochelob ti Tabernáculo.

⁶Che' jini yom ma' wa'chocon jini pulʌntib cha'an bʌ majtañʌl ti' tojel ba' mi' yochelob ti Tabernáculo.

⁷Ti wi'il yom ma' wʌc' i yajñib ja' ti' yojlil jini Tabernáculo yic'ot i pulʌntib majtañʌl. Yom ma' wotsan ja' ya'i.

⁸Yom ma' mel jini patio ti' joytʌlel ti pisil. Yom ma' joc'chocon jini pisil ya' ti' ti' jini patio.

⁹Yom ma' ch'ʌm jini aceite cha'an bʌ bojñibʌl. Yom ma' bon jini Tabernáculo yic'ot pejtelel chuqui tac an ya'i. Yom ma' laj sʌq'uesan pejtelel chuqui tac mi' c'ʌjñel cha'an ch'ujul mi' yajñel ti' pejtelel.

¹⁰Yom ma' bon ja'el jini pulʌntib cha'an pulbil bʌ c majtan yic'ot pejtelel chuqui tac mi' c'ʌjñel. Yom ma' sʌq'uesan cha'an c'ax ch'ujul mi' yajñel.

¹¹Che' ja'el yom ma' bon *i yajñib ja', yic'ot i buchlib cha'an ch'ujul mi' yajñel ja'el.

¹²Yom ma' pʌy majlel Aarón yic'ot i yalobilob ba'an i ti' Tabernáculo. Yom ma' pocob yic'ot jini ja'.

¹³Yom ma' lʌpben ch'ujul bʌ i bujc Aarón. Yom ma' bon. Yom ma' sʌq'uesan cha'an mi' melbeñoñob que'tel ti motomaj.

¹⁴Ti wi'il yom ma' pʌy tilel i yalobilob cha'an ma' lʌpben i pislelob ja'el.

¹⁵Yom ma' bon ja'el che' bajche' tsa' mele i tat, cha'an mi' melbeñoñob que'tel ti motomaj. Che'ʌch yom mi' bojñelob jini motomajob ti' tojlel i p'olbalob c'ʌlʌl ti pejtelel ora, che'en lac Yum.

¹⁶Moisés tsi' laj mele che' bajche' tsi' sube lac Yum.

¹⁷Tsi' wa'choco jini Tabernáculo ti ñaxan bʌ q'uin ti ñaxan bʌ uw, ti' cha'p'ejlel bʌ jab che' tsa' loq'uiyob ti Egipto.

¹⁸Moisés tsi' wa'choco jini Tabernáculo. Tsi' buchchocobe i c'ʌclib tac. Tsi' yʌq'ue i tablajlel tac. Tsi' yʌq'ue i te'el tac. Tsi' wa'chocobeyob i yoyel tac.

¹⁹Tsi' tich'iyob jini pisil tac ti' pam jini Tabernáculo. Tsi' yʌc'ʌ yambʌ junlajm jini pisil ti' pam che'ʌch bajche' lac Yum tsi' sube.

²⁰Tsi' yotsa jini lujump'ejl mandar ya' ti Arca. Tsi' yotsa ja'el jini bara tac ya' ti Arca. Tsi' yʌc'ʌ ya' ti pam jini Arca i majc, jiñʌch ba' mi' ñusʌntel mulil.

²¹Ti wi'il tsi' yotsa jini Arca ti' mal jini Tabernáculo. Tsi' lich'i jini colem bʌ pisil cha'an mi' mʌctan jini Arca cha'an i T'an lac Yum che' bajche' tsi' sube lac Yum.

²²Tsi' yʌc'ʌ jini mesa ya' ti Tabernáculo baqui mi' tempañob i bʌ ti' tojel norte ya' baqui an jini pisil bʌ tsalʌl ti' jumpatlel jini joc'ol bʌ pisil.

²³Ya'i Moisés tsi' yʌc'ʌ tac jini waj che' bajche' yom ti' tojlel lac Yum, che' bajche' lac Yum tsi' sube.

²⁴Tsi' yʌc'ʌ ja'el i ts'ʌjbib c'ajc ya' ti' mal jini Tabernáculo ti' tojel jini mesa ti' tojel sur.

²⁵Tsi' ts'ʌbʌ jini c'ajc ti' tojlel lac Yum che' bajche' lac Yum tsi' sube.

²⁶Moisés tsi' yʌc'ʌ ja'el jini pulʌntib melbil bʌ ti oro ya' ti Tabernáculo ti' tojel jini joc'ol bʌ pisil.

²⁷Tsi' pulu ti pulʌntib jini xojocña bʌ pom che' bajche' lac Yum tsi' sube.

²⁸Tsi' joc'choco jini pisil ya' baqui mi' yochelob ti Tabernáculo.

²⁹Moisés tsi' yʌc'ʌ ja'el jini pulʌntib cha'an pulbil bʌ i majtan Dios ti' tojel ba' mi' yochelob ya' ti Tabernáculo. Tsi' yʌc'ʌyob jini pulbil bʌ majtañʌl tac yic'ot majtañʌl melbil bʌ ti juch'bil bʌ harina che' bajche' lac Yum tsi' sube.

³⁰Tsi' yʌc'ʌ ja'el i yajñib ja' ya' ti Tabernáculo. Tsi' yotsa ja' ya'i cha'an mi' c'ʌñob.

³¹Ya'i tsi' pocoyob i c'ʌb yic'ot i yoc jini Moisés yic'ot Aarón yic'ot i yalobilob jini Aarón.

³²Che' baqui ora mi' yochelob ya' ti Tabernáculo, che' baqui ora mi' lʌc'tesañob i bʌ ya' ti pulʌntib, wersa mi' ñaxan pocob i bʌ che' bajche' lac Yum tsi' sube Moisés.

³³Tsi' tich'iyob i pislel patio ti' joytʌlel jini Tabernáculo yic'ot ya' ti pulʌntib. Tsi' yʌc'ʌ jini pisil ti' tojel ba' mi' yochelob ya' ti patio. Che'i tsa' ujti i mel Moisés pejtelel jini e'tel.

³⁴Jini Tocal tsa' ajni yic'otob. Tsi' moso jini otot ba' mi' tempañob i bʌ. I ñuclel lac Yum tsa' bujt'i ti jini otot.

³⁵Ma'anix tsa' mejli ti ochel Moisés ya' ti otot ba' mi' tempañob i bʌ, come jini Tocal tsi' moso. Tsa' bujt'i ti' ñuclel lac Yum.

³⁶Che' bʌ jini Tocal tsa' cha' letsi ya' ti Tabernáculo, jini israelob tsi' cha' techeyob i xʌmbal.

³⁷Pero che' maxto anic tsa' cha' letsi jini Tocal, ma'anic tsi' ñijcayob i bʌ ya' ba' añob jinto che' tsa' cha' letsi jini Tocal.

³⁸Come i Tocal lac Yum ya'an che' ti q'uiñil ya' ti otot. Jini c'ajc an ti Tocal che' ti ac'ʌlel cha'an mi' q'uelob pejtelel israelob baqui jach mi' majlelob.