Read Chol Exodo 8 Bible Online

Exodo 8 - Chol bible

Exodo 8

¹Lac Yum tsi' sube Moisés: Cucu ba'an Faraón. Suben: “Lac Yum woli' yʌl: La' majlicob winicob x'ixicob c cha'año' bʌ cha'an mi' ch'ujutesañoñob.

²Mi ma'anic ma' wʌq'ueñob permiso cha'an mi' majlelob, mi caj c tic'lan pejtel a lumal ti xpequejc.

³Wen p'ulucña mi caj i yajñel xpequejc ti Nilo. Mi caj i yochel ti a wotot yic'ot ba' ma' wʌyel, yic'ot ti' yotot tac a mozojob, yic'ot ti' yotot pejtel año' bʌ ti Egipto. Mi caj i yochelob ti horno yic'ot ya' ba' ma' mel a waj.

⁴Jini xpequejc mi caj i letsel tac ti a cuctal yic'ot ti' cuctal a pi'ʌlob”. Che' yom ma' suben Faraón, che'en lac Yum.

⁵Lac Yum tsi' sube Moisés: Suben Aarón: “Sʌts'ʌ a te' ti' pam jini ja' yic'ot i xʌc' tac ja' yic'ot ti' pam lʌmʌl tac bʌ ja'. Pʌyʌ tilel xpequejc ti pejtelel i lumal Egipto”, che'en.

⁶Che' jini Aarón tsi' sʌts'ʌ i c'ʌb ti' pam ja' am bʌ ti Egipto. Tsa' pam p'ojli xpequejc ti' lumal Egipto.

⁷Pero lajal tsi' meleyob xwujtob yic'ot mucul bʌ i ña'tʌbal. Tsi' pʌyʌyob tilel xpequejc ti' lumal Egipto.

⁸Faraón tsi' pʌyʌ tilel Moisés yic'ot Aarón. Tsi' subeyob: C'ajtiben la' Yum cha'an mi' cha' loc'san jini xpequejc tic tojlel lojon. Mux caj c choc loq'uel a pi'ʌlob cha'an mi' majlelob i yʌq'uen tsʌnsʌbil bʌ i majtan la' Yum, che'en.

⁹Moisés tsi' sube Faraón: Yom ma' sub baqui ora a wom mi' tijq'uel ili wocol. Mux caj j c'ajtiben Dios cha'an mi' jisan jini xpequejc ti la' tojlel yic'ot ti la' wotot. Ya'ix mi caj i yajñel ti Nilo, che'en Moisés.

¹⁰Faraón tsi' yʌlʌ: Ijc'ʌl to yom, che'en. Moisés tsi' yʌlʌ: La' ujtic che' bajche' ma' wʌl cha'an ma' ña'tan ma'anic majqui lajal bajche' lac Yum Dios.

¹¹Jini xpequejc mi caj i cʌyet, mi caj i loq'uel ti a wotot tac yic'ot ti' tojlelob a winicob yic'ot a pi'ʌlob ti Egipto. Ya'ix mi caj i yajñel ti Nilo, che'en.

¹²Moisés yic'ot Aarón tsa' loq'uiyob ti' tojlel Faraón. Moisés tsi' pejca lac Yum ti wocol t'an cha'an mi' lajmel jini wocol cha'an xpequejc che' bajche' tsi' sube Faraón.

¹³Lac Yum tsi' mele che' bajche' tsi' yʌlʌ Moisés. Tsa' chʌmi tac jini xpequejc ya' ti' yotot tac yic'ot ti cholel tac.

¹⁴Tsi' much'quiyob. Tsa' wen tuw'a pañimil.

¹⁵Che' bʌ tsi' q'uele Faraón lajmenix wocol, tsa' cha' tsʌts'a i pusic'al. Ma'anic tsi' jac'beyob. Tsa' ujti che' bajche' tsi' yʌlʌ lac Yum.

¹⁶Lac Yum tsi' sube Moisés: Suben Aarón: “Sʌts'ʌ a te'. Jats'ʌ i ts'ubeñal lum cha'an mi' pʌntiyel ti uch' ti pejtelel i lumal Egipto”. Che' yom ma' suben Aarón, che'en lac Yum.

¹⁷Che'ʌch tsi' meleyob. Aarón tsi' sʌts'ʌ jini te'. Tsi' jats'ʌ i ts'ubeñal lum cha'an mi' pʌntiyel ti uch'. Tsa' caji' tic'lan winicob yic'ot alʌc'ʌl jini uch'. I ts'ubeñal lum ya' ti Egipto tsa' pʌntiyi ti uch'.

¹⁸Jini xwujtob tsa' caji' ñopob i mel ti mucul tac bʌ i ña'tibal, pero ma'anic tsa' mejliyob. Tsa' ajni uch' ti' tojlel winicob yic'ot alʌc'ʌl.

¹⁹Jini xwujtob tsi' subeyob Faraón: Jiñʌch i c'ʌb Dios, che'ob. Pero tsa' tsʌts'a i pusic'al Faraón. Ma'anic tsi' jac'beyob. Tsa' ujti che' bajche' tsi' yʌlʌ lac Yum.

²⁰Lac Yum tsi' sube Moisés: Ch'ojyen ti sʌc'ajel. Cucu pejcan Faraón che' mi' majlel ti ja'. Suben: “Lac Yum woli yʌl: La' majlicob jini winicob x'ixicob c cha'año' bʌ cha'an mi' ch'ujutesañoñob.

²¹Awilan, mi ma'anic ma' chocob majlel mi caj c choc tilel jaj ti a tojlel yic'ot ti' tojlel pejtel egiptojob. Jomjomña mi caj i yochel ti la' wotot. Mi caj i pam pujquel ti lum. Mi caj i tic'lan pejtel cuxul tac bʌ.

²²Ti jim bʌ ora ma'anic mi caj i tic'lʌntelob c cha'año' bʌ chumulo' bʌ ti' lumal Gosén. Ma'anic mi caj i yajñel jaj ya'i. Che' jini mi caj a ña'tan joñon Yumʌlon ti pañimil.

²³Mach lajalic mi caj j q'ueletla che' bajche' c cha'año' bʌ. Ijc'ʌl mi caj a q'uel”. Che' yom ma' suben Faraón, che'en lac Yum.

²⁴Che'ʌch tsi' cha'le lac Yum. Jomjomña tsa' c'oti jaj ti' yotot Faraón yic'ot ti' yotot tac i winicob. Tsa' asiyi i lumal egiptojob cha'an jini jaj.

²⁵Faraón tsi' pʌyʌ tilel Moisés yic'ot Aarón. Tsi' subeyob: Cucula, aq'uenla Dios tsʌnsʌbil bʌ i majtan pero wʌ' jach yom ti ili lum, che'en.

²⁶Pero tsi' yʌlʌ Moisés: Mach che'ic yom mic mel lojon, come che' jini mi caj i ts'a'leñon lojon egiptojob che' mi cʌq'uen lojon c Yum Dios tsʌnsʌbil bʌ i majtan. Che' mi cʌq'uen lojon Dios tsʌnsʌbil bʌ i majtan mu' bʌ i ts'a'leñob egiptojob, ¿mach ba muq'uic i julon lojon ti xajlel che' mi' q'uelon lojon?

²⁷Wersa mic majlel lojon uxp'ejl q'uin xʌmbal ti colem bʌ i tiquiñal lum cha'an mi cʌq'uen lojon tsʌnsʌbil bʌ i majtan c Yum lojon Dios che' bajche' mi caj i subeñon lojon, che'en.

²⁸Faraón tsi' yʌlʌ: Mi caj c choquetla majlel cha'an mi la' wʌq'uen tsʌnsʌbil bʌ i majtan la' Yum Dios ya' ti tiquin bʌ lum. Pero mach ñajtic yom. C'ajtibenla Dios cha'an mi' lajmel jini wocol tic tojlel, che'en.

²⁹Moisés tsi' yʌlʌ: Che' mic loq'uel ti a tojlel, mi caj j c'ajtiben lac Yum cha'an ijc'ʌl mi' cʌyet jini jaj, cha'an mi' cʌy i tic'lan a pi'ʌlob ja'el. Mach yomic ma' cha'len lot. Yom ma' choc loq'uel c pi'ʌlob cha'an mi' yʌq'ueñob tsʌnsʌbil bʌ i majtan c Yum lojon, che'en.

³⁰Moisés tsa' loq'ui ti' tojlel Faraón. Tsi' pejca lac Yum ti oración.

³¹Lac Yum tsi' mele che' bajche' tsi' c'ajtibe Moisés. Tsi' loc'sa jaj ti' tojlel Faraón yic'ot ti' tojlel pejtel egiptojob. Ma'anic tsa' cʌle mi juncojtic.

³²Pero ti ili ora Faraón tsi' cha' tsʌts'esa i pusic'al. Ma'anic tsi' choco majlel jini winicob x'ixicob.