Read Chol Job 1 Bible Online

Job 1 - Chol bible

Job 1

¹Tsa' chumle ti lum i c'aba' Uz juntiquil winic uts'at bʌ i pusic'al, i c'aba' Job. Tsi' c'uxbi Dios. Tsi' cʌnta i bʌ cha'an ma'anic mi' taj mulil.

²An i cha'an Job wuctiquil ch'iton bʌ i yalobilob yic'ot uxtiquil xch'oc bʌ i yalobilob.

³An i cha'an cabʌl i yʌlac' ja'el, wucp'ejl mil tiñʌme', uxp'ejl mil camello, jo'c'al i yuxbajc' (1,000) tat wacax yic'ot jo'c'al i cha'bajc' (500) i ña'al burro. An cabʌl i winicob ja'el. Ma'anic ñuc bʌ winic lajal bajche' Job ti pejtelel lum ya' ba' mi' pasel q'uin.

⁴I tilelʌch mi' melob q'uin jini ch'iton bʌ i yalobilob che' mi' ts'ʌctiyelob i jabilel. Tsi' tempayob i bʌ ti' yotot jini woli bʌ ti q'uiñijel. Junlajal tsi' meleyob jini q'uin ti' yotot tac ti jujuntiquil. Tsi' pʌyʌyob i yijti'añob i c'uxob waj yic'otob.

⁵Tsa' jal'ayob ti q'uiñijel. Che' bʌ tsa' xojt'i q'uin, Job tsi' pʌyʌ tilel i yalobilob cha'an mi' sʌq'uesañob ti' tojlel Dios. Tsa' seb ch'ojyi Job cha'an mi' yʌq'uen Dios cotol tac bʌ i majtan. Tsi' pulu lujuncojt, jujuncojt ti jujuntiquil. Tic'ʌl mi tsi' cha'leyob mulil calobilob, che'en Job. Tic'ʌl mi tsa'ix i ts'a'leyob Dios ti' pusic'al. Che'ʌch tsi' ña'ta Job ti' pusic'al. Ma'anic tsa' lujba i mel bajche' jini.

⁶Ti jump'ejl q'uin tsa' tiliyob ángelob. Tsa' wa'leyob ti' tojlel Dios. Tsi' xin otsa i bʌ Satanás.

⁷¿Baqui tsajñiyet? che'en lac Yum. Tsi' jac'ʌ Satanás: Tsajñiyon ti pañimil. Tsac cha'le xʌmbal ñumel ti lum, che'en.

⁸Lac Yum tsi' c'ajtibe: ¿Tsa' ba a wen q'uele c winic Job? Ma'anic yambʌ ti pañimil mu' bʌ i c'uxbin Dios bajche' jini. Mi' cʌntan i bʌ cha'an mach mi' taj mulil, che'en Dios.

⁹Satanás tsi' sube: Mach lolomic mi' c'uxbin Dios jini Job.

¹⁰Wen q'uelel a cha'an jini Job yic'ot pejtel i pi'ʌlob yic'ot pejtel i chubʌ'an. Ma'anic i tic'lʌntel. Tijicña mi' ñusan q'uin. Ma' coltan ti' ye'tel. Ma' p'ojlesʌben i yʌlac' ti' joytilel.

¹¹Pero sʌts'ʌx a c'ʌb a chilben i chubʌ'an. Che' jini mux caj a q'uel mi caj i p'ajet Job ti' tojel a wut, che'en Satanás.

¹²Lac Yum tsi' sube: Wolix cʌq'ueñet pejtel chuqui an i cha'an Job. Lu' an ti a p'ʌtʌlel cha'an ma' tic'lan. Cojach jini c winic mach mejlic a tʌl, che'en Dios. Che' jini tsa' majli Satanás. Tsa' loq'ui ti' tojlel lac Yum.

¹³Mach jalix temel añob i yalobilob Job ti' yotot jini ascuñʌl bʌ. Woliyob ti we'el ti uch'el.

¹⁴Tsa' tili winic i suben Job: Tsaj q'uele woliyob ti top' lum tat wacax. Woliyob ti buc'bal jini burro ya' ti' t'ejl.

¹⁵Tsa' tiliyob sabeojob ti leto. Tsi' laj xujch'iyob majlel. Tsi' tsʌnsayob a winicob ti machit. Joñon jach tsa' mejliyon ti put'sel. Tsa' tili c subeñet, che'en.

¹⁶Che' bʌ woli to ti t'an tsa' tili yambʌ winic tsa' bʌ i yʌlʌ: Tsa' tojmi chajc ti lum chocbil tilel ti Dios. Tsi' lu' pulu jini tiñʌme' yic'ot a winicob woli bʌ i cʌntañob. Joñon jach tsa' mejliyon ti puts'el. Tsa' tili c subeñet, che'en.

¹⁷Che' bʌ woli to ti t'an tsa' tili yambʌ winic. Tsi' yʌlʌ: Tsa' tiliyob uxmojt caldeojob. Tsi' xujch'iyob jini camello tac. Tsi' laj pʌyʌyob majlel. Tsi' tsʌnsayob a winicob ti machit. Joñon jach tsa' mejliyon ti puts'el. Tsa' tili c subeñet, che'en.

¹⁸Che' bʌ woli to ti t'an tsa' tili yambʌ. Tsi' sube: Tsaj q'uele a walobilob tempʌbilob ti' yotot jini ascuñʌl bʌ. Woliyob ti we'el ti uch'el.

¹⁹Tsa' tili sutujt ic' loq'uem bʌ ti jochol bʌ lum. Tsi' buchu jini otot ya' ba' añob. Tsi' laj choco tac jini oy ti chʌnwejlel i xujc. Tsa' laj chʌmiyob a walobilob. Joñon jach tsa' mejliyon ti puts'el. Tsa' tili c subeñet, che'en.

²⁰Tsa' wa'le Job. Tsi' tsili i bujc. Tsi' set'e i jol cha'an ch'ijiyem i pusic'al. Tsi' choco i bʌ ti lum. Tsi' ch'ujutesa Dios.

²¹Tsi' yʌlʌ: Ma'anic c chubʌ'an tsaj q'uele pañimil, ma'anic c chubʌ'an mic cha' sujtel ti lum. Dios tsi' yʌq'ueyon, Dios tsi' cha' chili. Ch'ujul i c'aba', che'en.

²²Che' jini ma'anic tsi' cha'le mulil Job. Ma'anic tsi' p'aja Dios.