Read Chol Job 13 Bible Online

Job 13 - Chol bible

Job 13

¹Tsaj q'uele pejtel jini, tsa cubi. Mic ña'tan isujm.

²Che' bajche' la' wujil, cujil ja'el. An c pusic'al ja'el, cujil cʌntesa.

³Muq'uic c taj Dios Mach bʌ Anic i P'isol i P'ʌtʌlel, mi cochel ti t'an quic'ot.

⁴Come woli la' socbeñon c t'an, xlotiyajetla. Lajaletla bajche' sts'ʌcayajob mach bʌ yujilobic ts'ac.

⁵Uts'at muq'uic la' junyajlel ñʌjch'el cha'an ma' wʌc' ti tsictiyel a ña'tibal.

⁶La'ix ubiñon, mux c subeñet chuqui wolic ña'tan. A wocolic ñich'tañon.

⁷¿Chucoch mi la' lon ña'tan a subeñon i t'an Dios che' mach ch'oyolic ti Dios? Woli la' lon otsan la' t'an ti' yej.

⁸Mi la' lon jop'ben i t'an, come mach i winiqueticla. Pero mach uma'ic Dios. Mach yomic i coltʌntel ti winicob.

⁹Tsajaletla ame i q'uel chuqui woli la' cha'len. Mach winiquic Dios cha'an mi' lotintel.

¹⁰Mi caj i ju'sʌbeñet la' pusic'al mi woliyetla ti lot, come woli la' lon ña'tan la' coltan.

¹¹¿Mach ba bʌc'ñʌbilic Dios cha'an i ñuclel? ¿Chucoch che' jini mi la' mel la' bʌ ti ñuc?

¹²Ma'anic i c'ʌjñibal jini tsa' bʌ la' wʌlʌ. Che' mi la' tempan t'an cha'an mi la' coltan Dios, lajal la' t'an bajche' i tʌñil c'ajc. Mux i jilel che' bajche' woch' bʌ mʌctijib yujil bʌ tojp'el.

¹³Ñich'tañon. Anquese mic chʌmel cha'an c t'an, mi caj c sub.

¹⁴¿Chucoch mi cʌc' c bʌ ba' bʌbʌq'uen mic chʌmel cha'an jini c t'an woli bʌ c subeñet?

¹⁵Anquese mi' tsʌnsañon Dios, mi caj c ñop ti xuc'ul, pero mi caj c sub c bʌ ti' tojlel che' mi' melon.

¹⁶Cujil mi caj i coltañon Dios cha'an wolic ñop. Mach pʌjyic ti Dios jini winic mach bʌ i ñopoyic.

¹⁷Ubiñon ti jump'ejl a pusic'al. P'isi ti wenta c t'an.

¹⁸Cujil tojon. Cujil mi caj i q'uelon ti toj.

¹⁹¿Majqui mi' contrajin c t'an? Machic isujm c t'an mic ñʌjch'el. Che'ic jini mic chʌmel.

²⁰C Dios, mic subeñet an cha'chajp com bʌ ma' melbeñon.

²¹Awocolic mach a chʌn tic'lañon. Mach a chʌn bʌctesañon.

²²Subeñon tilel ba' añet. Che' jini ti ora mi caj c jac'. La' c pejcañet mi mach a womic a pʌyon. Yom ma' jac'beñon.

²³Subeñon c mul. Coltañon. Pʌsbeñon c sajtemal.

²⁴¿Chucoch ma' mʌy a bʌ tic tojlel? Ma' q'uelon ti a contra.

²⁵Lajalon bajche' i yopol te' woli bʌ i wejlesan ic'. Lajalon bajche' tiquin bʌ jam mu' bʌ i c'ʌscuyel. ¿Chucoch ma' wajñesañon?

²⁶Ma' wotsan ti jun pejtel chuqui tac mi caj a c'ʌn tij contra. Wen ch'aj jini. Ma' cha' ña'tan pejtel c sajtemal che' ch'itoñon to.

²⁷Ma' wotsañon ti cárcel ba' chucul coc ti fierro yubil. Ma' chʌcʌ q'uel pejtel c bijlel. Ya' jach jaxʌl mic majlel ba' tsa' wʌc'ʌ c mojon.

²⁸Lajalon bajche' xujc'un te' woli bʌ ti oc'mʌl. Lajalon bajche' bujcʌl woli bʌ ti c'uxtʌl ti' chʌñil.