Read Chol Job 14 Bible Online

Job 14 - Chol bible

Job 14

¹Ma'anic cabʌl i q'uiñilel winic ch'oyol bʌ ti x'ixic. Cabʌl mi' taj wocol.

²Jumuc' jach poj an i t'ojlʌwel che' bajche' i nich pimel. Mi' bʌc' tiquin. Lajalʌch bajche' i yʌxñʌlel tocal. Poj jumuc' tsiquil.

³¿Chucoch ma' lon q'uelon che' jini? Ma' wersa pʌyon ti meloñel ti a tojlel.

⁴Uts'at anic juntiquil toj bʌ, pero ma'anic. ¿Ch'oyol ba jini sʌc bʌ ti jini mach bʌ sʌquic?

⁵Wʌn ña'tʌbil a cha'an jayp'ejl to q'uin ma' wʌq'ueñob i cuxtʌlel winicob ti jujuntiquilob. Ora tac jax mi' joloñel i q'uiñilel.

⁶Cʌyʌx a q'uelon jumuc' cha'an mic poj c'aj co ts'ita' che' bajche' tojbil bʌ x'e'tel che' mi' jolontesan i ye'tel.

⁷Mi tsa' sejq'ui jubel te', mach i jilibalic. An i tajol mi' loq'uel i buts.

⁸Anquese ñoxix i wi' ti lum, anquese wolix ti oc'mʌl i yebal, mi' loq'uel i buts che' mi' taj ja'. Mi' cha' cajel ti nich.

¹⁰Mach che'ic winic che' mi' chʌmel. Mi' ñolchocontel, mi' jujch'el. ¿Baqui mi' majlel i ch'ujlel?

¹¹Che' bajche' mi' tiquin pa' ti' yorajlel jajmel,

¹²che' ja'el mi' junyajlel ñoltʌl winic che' mi' chʌmel. Mach chʌn ch'ojyix jinto mi' sʌc jilel panchan. Ma'anix majch mi' ñijcan ch'ojyel.

¹³Uts'at muq'uic a mucon yic'ot jini chʌmeño' bʌ ba' ma'anic c tic'lʌntel jinto mi' lajmel a mich'ajel. Wʌn ña'tibil a cha'an baqui ora a wom a cha' pʌyon. Che' bʌ tsa'ix tili i yorajlel, cha' pʌyʌyonix.

¹⁴Che' mic chʌmel lojon, ¿mu' ba caj c cha' cuxtiyel? Mi che'ʌch, mi mejlel j cuch wocol c'ʌlʌl mi' joloñel anquese jal to mi' c'otel i yorajlel.

¹⁵Mi che'ʌch, mi caj c jac' ba' ora ma' pʌyon, come ti' yutslel a pusic'al mi caj a c'ajtesan a winic tsa' bʌ a mele.

¹⁶Pero mach che'ic mi cʌl, come wola' chʌcʌ q'uelon yic'ot pejtel chuqui mic cha'len. Ma'anic ma' wis ñusan c mul.

¹⁷Uts'at tsa'ic a wotsa pejtel c mul ti jump'ejl coxtal ñup'bil bʌ cha'an mach chʌn tsiquilix c jontolil.

¹⁸Che' bajche' mi' yejmel wits, che' bajche' mi' ñijcʌntel loq'uel colem xajlel ti' yajñib,

¹⁹che' bajche' mi' c'unte' yʌsan xajlel jini ja', mi' cuch majlel lum ja'el, che' ja'el ma' wʌc' ti jilel winicob yic'ot pejtel i pijtaya.

²⁰Ma' junyajlel jisʌbeñob i p'ʌtʌlel. Che' jini mi' cʌyob pañimil. Ma' yʌñ'esʌbeñob i wut. Ma' chocob majlel.

²¹Che' mi' tajob i ñuclel i yalobilob, mach yujilic i tatob. Che' mi' peq'uesʌntelob, ma'anic mi' yilan.

²²I bajñel mi' ñusan wocol. Jini jach wocol mi' yubin yic'ot ch'ijiyem bʌ i pusic'al. Tsa' ujti ti t'an Job.