Read Chol Job 19 Bible Online

Job 19 - Chol bible

Job 19

¹Job tsa' caji ti t'an: ¿Jala to ba ma' tic'lañon? Ma' ju'sañon ti a t'an.

³Lujunyajlix tsa' wajleyon. Mach a wujilic quisin che' ma' pʌc'on ti mulil.

⁴Mi an c sajtemal maxto anic tsa' tsictesa.

⁵Chan ma' pʌs a bʌ tic tojlel che' ma' wʌ'leñon cha'an c wocol.

⁶Ña'tan Diosʌch tsa' bʌ i chocoyon jubel. Tsi' chucuyon che' bajche' chimo' chʌy.

⁷Mic cha'len oñel cha'an chuculon ti wocol. Ma'anic majqui mi' p'is ti wenta. Mic cha'len t'an cha'an com j coltʌntel, pero ma'anic xmeloñel mu' bʌ i melon.

⁸Mʌctʌbil c bijlel. Tsʌts ñet'el jax ba' añon ti ic'ch'ipan bʌ pañimil.

⁹Dios tsi' jisʌbeyon c ñuclel ti' tojlel winicob. Tsi' jochbeyon jini corona am bʌ tic jol yilal.

¹⁰Tsi' laj jisʌbeyon c chubʌ'an yic'ot c wersa. Tsi' chocoyon jubel ba' ma'anic j coltʌntel. Tsi' yʌc'ʌ ti jilel c pijtaya che' bajche' mi lac boc te'.

¹¹Woli' wen cha'len mich' tic tojlel. Mi' lon q'uelon ti' contra.

¹²Motocña mi' tilelob i winicob i contrajiñon. Mi' joyoñob ba' chumulon.

¹³Tsi' ñajti choco majlel cʌscun yic'ot quijts'in yic'ot j cʌñʌyo' bʌ. Mach i cʌñʌyoñobix.

¹⁴Cʌybilon i cha'an c pi'ʌlob yic'ot j cʌñʌyo' bʌ. Tsa' ñajʌyiyon i cha'añob.

¹⁵Jini chumulo' bʌ ti cotot, c winicob yic'ot xch'oc bʌ x'e'telob, mi' ñajti q'ueloñob. Mach i cʌñʌyoñobix yubil.

¹⁶Mic pʌy c winic. Mach talic. Mij c'ajtiben ti wocol t'an.

¹⁷Mach yomic i ñochtañon quijñam, come tuw i yiq'uilel quej. Leco mi' q'ueloñob quijts'iñob cha'an i tsoyel c bʌc'tal.

¹⁸Ch'itoñob ja'el mi' ts'a'leñoñob. Che' mic loq'uel mi' bi'leñoñob.

¹⁹Mi' xoyob i bij jini j cʌñʌyo' bʌ ame i tajoñob. Jini c'uxbibilo' bʌ c cha'an woli' contrajiñoñob.

²⁰Ma'anix c bʌc'tal. Colelix c chʌmel.

²¹P'untañon, la' wocolic p'untañon, c pi'ʌlob, come Dios tsi' yʌc'ʌyon ti wocol.

²²¿Chucoch mi la' tic'lañon jatetla che' bajche' Dios? ¿Mach ba jasʌlic woli cubin wocol?

²³Uts'at muq'uic mejlel c ts'ijban c t'an cha'an mi cotsan ti jun.

²⁴Uts'at muq'uic c ts'ijban ti xajlel yic'ot fierro jay bʌ i ñi'. Yom bujt'ic ti plomo ya' ba' ts'ijbubil cha'an mi' yajñel ti pejtelel ora.

²⁵Cujil cuxul jini tsa' bʌ i mʌñʌyon loq'uel ti' wenta j contra. Jini mi' caj ti wa'tʌl ti pañimil ti wi'il bʌ q'uin.

²⁶Cujil che' bʌ tsa'ix oc'mi c bʌc'tal mi caj j q'uel Dios anquese ma'anix c bʌc'tal.

²⁷Mu'cu caj j q'uel tic wut. Jini jachi, mach yambʌyic. Mi' ñoj ñuc'an c pusic'al che' mic pijtan.

²⁸Jini cha'an cʌyʌx la' chʌn tic'lañon, come mach cha'anic c mul woli cubin wocol.

²⁹Isujm mic subeñetla, tsajaletla ame ajq'uiquetla ti toj mulil cha'an tsa' la' ña'ta la' melon. Ña'tanla muc'ʌch i meletla Dios. Tsa' ujti ti t'an Job.