Read Chol Job 21 Bible Online

Job 21 - Chol bible

Job 21

¹Tsa' caji i yʌl Job: Ñich'tʌbeñon c t'an. Ubin jach, mi a wom a ñuq'uesʌbeñon c pusic'al.

³Pʌsbeñon i yutslel a pusic'al che' woliyon ti t'an. Jinto che' mi cujtel, wajleñon mi a wom.

⁴Cujil jiñʌch Dios mu' bʌ i yʌc'on ti wocol. Jini cha'an ch'ijiyemon.

⁵Q'uelela bajche' añon. Cha'lenla bʌq'uen. La'to sajtic la' pusic'al.

⁶Che' mic ña'tan bajche' añon, mic cha'len bʌq'uen. Tesuñayon cha'an uq'uel.

⁷¿Chucoch tijicña i pusic'al mi' jal'añob ti pañimil jini jontolo' bʌ? C'ʌlʌl c'oc'ob to che' ñoxobix. Añʌch i ñuclel yic'ot i p'ʌtʌlel.

⁸Tijicña mi' q'uelob i yalobilob. Wen chumulob che' ñucobix. Tijicñayob i pi'ʌlob yic'ot i p'olbalob.

⁹Añobʌch i yotot yic'ot i lum. Mach yujilobic bʌq'uen. Dios ma'anic mi' ju'sʌbeñob i pusic'al. Ma'anic mi' melob.

¹⁰C'oc'ʌch i yʌlac'. Jini tat wacax mi' p'ojlel. Jini ña' wacax ma'anic mi' to'ol ñusan i yal.

¹¹I yalobilob mi' loq'uelob ti alas che' bajche' tiñʌme'. Jini bic'talob mi' cha'leñob tijp'el, mi' cha'leñob son.

¹²Ñucob i pusic'al cha'an tsinlaw bʌ taq'uin yic'ot arpa. Tse'tse'ña jax mi' yubiñob jini flauta.

¹³Wen chumulob che' cuxulob to. Ñʌch'ʌl i pusic'al mi' chʌmelob, mi' mujquelob. Mi' subeñob Dios: “La' to bajña ajnicon lojon.

¹⁴Mach comic c ñop lojon a bijlel.

¹⁵¿Majqui jini P'ʌtʌl bʌ Mach bʌ Anic I P'isol I P'ʌtʌlel? ¿Chucoch yom mic ch'ujutesan lojon? ¿Chuqui mi caj lac taj ti Dios?” che'ob.

¹⁶Pero tilem ti Dios pejtel chuqui mi' taj ti pañimil jini xjontolil. Leco bajche' mi' bajñel ña'tan. Mach che'ic mic ña'tan joñon.

¹⁷Casʌ mi' bʌc' yajpel i c'ʌc'al. Casʌ mi' bʌc' tilel wocol ti' tojlelob. ¿Bacan tsiquil mi woli' yubiñob wocol cha'an i mich'lel Dios?

¹⁸¿Mu' ba i chojquel jini winic che' bajche' jam ti ic', che' bajche' misʌjelʌl ti sutujt ic'?

¹⁹Mux caj la' jac': “Isujm ma'anic woli' toj jini winic, pero mux caj i tojbeñob i bet i yalobilob”, che'etla. Pero mach che'ic yom. La' i toj ti ts'ʌcʌl jini am bʌ i mul. La' i bajñel taj wocol cha'an i mul.

²⁰La' i bajñel ubin jini wocol mu' bʌ i tilel i jisan. La' i yubin ti ts'ʌcʌl i mich'ajel Dios Mach bʌ Anic i P'isol i P'ʌtʌlel.

²¹Che' yujilix lʌc'ʌl i yorajlel chʌmel, mach chʌn tijicñayix i pusic'al.

²²¿Mejl ba laj cʌntesan Dios? Diosʌch mu' bʌ i melonla. Dios mi' mel ja'el año' bʌ ti panchan.

²³An winic mu' bʌ i chʌmel che' cabʌl i ñuclel yic'ot cabʌl i chubʌ'an, che' wen chumul, che' ma'anic bʌq'uen,

²⁴che' c'oc' to i bʌc'tal, bʌjñel to i p'ʌtʌlel.

²⁵Yambʌ mi' chʌmel che' wen woli ti wocol. Mach tijicñayic i bʌc'tal ti pejtelel ora.

²⁶Temel mi' mujquelob ti mucoñibʌl. Jini motso' mi' pam ñumel ba' ts'ʌl ñololob.

²⁷Cujil chuqui woli la' lon ña'tan. Woli la' tem la' t'an tij contra.

²⁸Cujil mi caj la' c'ajtibeñon: “¿Baqui an wʌle i yotot jini winic am bʌ i ñuclel ti oñiyi? ¿Chuqui tsa' tumbenti i yotot jini xjontolil?” che'etla.

²⁹¿Mach ba anic tsa' la' pejca jini ñajt bʌ ch'oyolob? ¿Mach ba anic tsi' pʌsbeyonla?

³⁰Che' mi' tilel wocol mach jilicob jini jontolo' bʌ. Mi' pʌjyelob majlel ba' tijicñayob. Mach i tajayic i mich'ajel Dios.

³¹Ma'anic majqui mi' tsictesʌben i mul. Ma'anic majqui mi' yʌq'uen i toj.

³²Che' mi' chʌmel, mi' q'uechob majlel ti mucoñibʌl. Pejtel winicob x'ixicob mi' joy cʌntañob majlel. Uts'at jini lum ba' mi' mucob. Cabʌlob mi' cha'leñob q'ueloñel ti' mujquibʌl.

³⁴Jini cha'an mi la' lon pejcañon. Ma'anic mi la' ñʌch'chocobeñon c pusic'al. Mach isujmic chuqui woli la' wʌl, che'en Job.