Read Chol Job 22 Bible Online

Job 22 - Chol bible

Job 22

¹Tsa' caji ti t'an Elifaz ch'oyol bʌ ti Teman.

²Winiconla. ¿Mejl ba laj coltan Dios? Anquese cabʌl lac pusic'al, ¿bajche' mi caj laj coltan? Mach mejliconla. Jini am bʌ i pusic'al mi' coltan i bʌ.

³Mi tojet, ¿woli ba a coltan Dios che' jini? Che' toj a bijlel, ma'anic wola' coltan Dios.

⁴¿Chucoch woli' yʌq'uet ti toj mulil? ¿Chucoch woli' yʌ'leñet? ¿Cha'an ba tojet?

⁵¿Mach ba cha'anic cabʌl a mul? Mi cʌl ma'anic i p'isol a jontolil.

⁶Tsa' wersa c'ajtibeyob prenda a pi'ʌlob. Tsa' chilbeyob i pislel jini p'ump'uño' bʌ.

⁷Ma'anic tsa' wʌq'ueyob ja' jini año' bʌ i tiquin ti'. Tsa' chilbeyob i bʌl i ñʌc' jini wi'ñayo' bʌ.

⁸Jini año' bʌ i ye'tel tsi' ch'ʌmbeyob i lum. Jini ñuco' bʌ tsi' ch'ʌmbeyob i chumlib.

⁹Che jach meq'uel i c'ʌb tsa' choco majlel meba' x'ixic. Tsa' tic'la meba' alʌlob mach bʌ anobic i coltʌntel.

¹⁰Jini cha'an wola' q'uel bʌbʌq'uen bʌ ti a joytilel. Tsiltsilñayet ti bʌq'uen.

¹¹Tsa'ix yajpi a c'ʌc'al. Mach c'otix a wut. Mi' tilel a wocol che' bajche' but'ja' cha'an mi' sʌc jisañet.

¹²¿Mach ba chumulic Dios ti panchan? Q'uele jini ñajt bʌ ec'. ¿Mach ba chanic?

¹³Pero ma' wʌl: “¿Yujil ba Dios? ¿Mejl ba i c'otel i wut ba'an ic'ch'ipan bʌ pañimil?

¹⁴Wen pim jini tocal. Mi' mosben i wut cha'an ma'anic mi' q'uel. Che' jach mi' cha'len xʌmbal ñumel ti' pamlel panchan”, lon che'et.

¹⁵¿A wom to ba cʌytʌl ti jini jach bʌ bij tsa' bʌ i xʌñʌyob xjontolilob ti oñiyi?

¹⁶Tsa' bʌc' jiliyob che' ch'itoñob to. Tsa' ñumi but'ja' i wets' majlel lum ti yebal i yoc.

¹⁷Tsi' subeyob Dios: “La' ajnicon lojon. ¿Chuqui mi caj lac taj ti Dios?” lon che'ob.

¹⁸Mach i ña'tayic mi jiñʌch Dios tsa' bʌ i yʌq'ueyob i chubʌ'an. Leco bajche' tsi' lon ña'tayob, pero ña'tʌbilix i cha'an Dios chuqui woli' mel ajñel.

¹⁹Tijicñayob mi' cʌytʌlob jini tojo' bʌ. Mi caj i q'uelob i jilibal jini xjontolilob. Jini alʌlob maxto bʌ añobic i pusic'al mi' wajleñob xjontolilob.

²⁰Mi' yʌlob: “Wets'bilix majlel i chubʌ'an che' bajche' misujelʌl. Laj pulbil ti c'ajc i colojbal”, che'ob.

²¹La', cʌñʌ lac Yum. Mux a taj i ñʌch'tilel a pusic'al. Che' jini uts'atax chuqui mi caj a taj.

²²Jac'ben i t'an mu' bʌ i cʌntesañet. Lotben i t'an ti a pusic'al.

²³Mi mux a cha' sujtel tilel ti lac Yum ti jump'ejl a pusic'al, mux a taj a coltʌntel. Yom jach ma' junyajlel cʌy a jontolil.

²⁴Mach a q'uel ti ñuc taq'uin. Lajal jach yom ma' q'uel bajche' ts'ubejn. Yom junlajal ma' q'uel jini oro a cha'an bajche' xajlel am bʌ ti pa'.

²⁵Che' jini mi caj a q'uel jini P'ʌtʌl Bʌ am bʌ ti chan che' bajche' oro yic'ot plata.

²⁶Che' jini mux a taj i tijicñʌyel a pusic'al ti jini P'ʌtʌl bʌ Dios. Mux a letsan a wut a pejcan Dios.

²⁷Che' ma' pejcan, mi caj i yubiñet. Mi caj a ts'ʌctesan a t'an tsa' bʌ a wʌc'ʌ.

²⁸Che' ma' ña'tan chuqui yom melol, muq'uix i yujtel bajche' tsa' ña'ta. Mach yajpic c'ajc mu' bʌ i pʌsbeñet a bijlel ti pejtelel ora.

²⁹Come Dios mi' ju'sʌben i pusic'al jini chaño' bʌ yic'ot p'ʌtʌlo' bʌ. Pero mi' yʌq'uen i ñuclel jini uts bʌ i pusic'al. Dios mi caj i coltan.

³⁰Muc'ʌch i coltan ja'el jini am bʌ i mul. Muq'uix i yʌq'uet ti colel che' ñusʌbilix a mul. Che' tsa' ujti ti t'an Elifaz.