Read Chol Job 24 Bible Online

Job 24 - Chol bible

Job 24

¹Jini P'ʌtʌl bʌ Mach bʌ Anic i P'isol i P'ʌtʌlel mi' wʌn ña'tan baqui ora mi caj i cha'len meloñel. ¿Chucoch mach yujilobic i cʌñʌyo' bʌ?

²Jini xjontolilob mi' loc'sañob jini mojon ba' jaxʌl i lum i pi'ʌlob. Mi' xujch'iñob majlel i yʌlac'. Mi' yotsañob ba' mi' cʌntañob.

³Mi' wets'ob majlel jini burro i cha'an meba' alʌlob. Mi' chilbeñob i wacax meba' x'ixic i wenta prenda.

⁴Mi' pʌn ñusañob ti bij jini año' bʌ i wi'ñal. Jini p'ump'uño' bʌ ti pañimil mi' tʌts'ob i bʌ ti bij. Mi' wutschocoñob i bʌ ame q'uejlicob.

⁵Mi' seb majlelob ti e'tel che' bajche' burro mach bʌ anic i yum. Mi' sʌclañob wen tac bʌ pimel ti mate'el cha'an mi' we'sañob i yalobilob.

⁶Mi' majlelob ti ts'usubil cha'an mi' lotbeñob i colobal i c'ajbal xjontolilob.

⁷P'ump'un mi' ñusañob ac'ʌlel. Ma'anic i mʌjquilob. Ma'anic ba' mi' yochelob ti wʌyel che' i yorajlel tsʌñal.

⁸Jini ja'al mu' bʌ i tilel ti wits mi' yʌch'esañob ti pejtelel i bʌc'tal. Mi' mʌcob i bʌ ti' lejch' xajlel.

⁹Jini xjontolilob mi' chilbeñob i yalobilob meba' x'ixicob yic'ot ja'el jini alʌlob woliyo' bʌ ti chu'. Ma'anix mi' chʌn sutq'uibeñob i ña' cha'an i bet.

¹⁰Tocol ech'el i pislel, mi' majlelob ti e'tel. Wersa mi' cuchob tilel ixim che' wi'ñayob.

¹¹Ya' ti' yʌxñilel olivojil mi' pets'ob loq'uel aceite ti olivo. Mi' pets'ob loq'uel i ya'lel ts'usub che' tiquiñob i ti'.

¹²Ya' ti colem tejclum woliyob ti ajcʌn lajal bajche' woli' cajelob ti chʌmel. Jini lojwemo' bʌ mi' c'ajtiñob i coltʌntel ti wocol t'an, pero Dios ma'anic mi' coltañob.

¹³An jontolo' bʌ ts'a' bʌ mi' q'uelob q'uiñil. Mach i cʌñʌyobic i bijlel Dios. Ma'anic mi' pʌsob i bʌ ti q'uiñil.

¹⁴Jini stsʌnsa mi' bʌc' ch'ojyel che' ic'to pañimil. Mi' tsʌnsan jini p'ump'un bʌ mach bʌ anic i coltʌntel. Che' ac'ʌlelix mi' cha'len xujch'.

¹⁵Jini sts'i'lel bʌ winic mi' pijtan jinto mi' bʌjlel q'uin. Mi' mos i wut. Mi' yʌl: “Mach i q'ueleyonic”, lon che'en.

¹⁶Che' iq'uix mi' picob lum ti yebal pajc' bʌ otot ba' yomob ochel. Ti q'uiñil ñup'ulob. Ma'anic mi' pʌsob i bʌ ti' sʌclel pañimil.

¹⁷Mi' cajelob ti ch'ojyel ti ojlil ac'ʌlel, come wen ñʌmʌlob ti ic'ch'ipan bʌ pañimil.

¹⁸Lajalob ili winicob bajche' i lumil lojc ja'. Yambʌ xchumtʌlob ts'a' mi' q'uelbeñob i jamil. Jini x'e'telob ma'anic mi' jac'ob i pʌyol ti e'tel ya' ti' ts'usubil.

¹⁹Che' bajche' mi' chʌy ja' jini tiquin lum ti' yorajlel ticwal, che' ja'el jini mucoñibʌl mi' jam i ti' cha'an mi' chuc xmulilob.

²⁰Mi' sajtelob ti' tojlel i ña'. Jini jach i motso'lel mi' q'uelob ti uts'at. Ma'anic mi' wis ña'tʌntelob ti pañimil. Mi' junyajlel lajmel i jontolil che' bajche' mi' c'ʌscuyel i c'ʌb te'.

²¹Jontol tsi' melbeyob jochol bʌ x'ixicob mach bʌ anic i yalobil. Ma'anic tsi' coltayob meba' x'ixicob.

²²Pero Dios mi' tam'esʌbeñob i jabilel jini p'ʌtʌlo' bʌ. Mi' coltañob che' colel i chʌmel.

²³Mi' cha' p'ʌtesañob. Mi' cha' ch'ejl'añob. Pero Dios woli' chʌcʌ q'uelbeñob i bijlel.

²⁴Poj jumuc' jach mi' tajob i ñuclel. Mi' sʌc jilelob. Mi' yajlelob che' bajche' i yopol wʌyem ch'ix. Mi' tsejpelob loq'uel che' bajche' i te'el ixim.

²⁵Machic isujm bajche' wolic sub, subula che' jini. ¿Majqui mi caj i sub mach isujmic c t'an? che'en Job.