Read Chol Job 29 Bible Online

Job 29 - Chol bible

Job 29

¹Tsa' cha' caji ti t'an Job: Uts'atax tsi' cʌntayon Dios ti yambʌ ora. Uts'at muq'uic i cha' cʌntañon. Wen tijicñayon

³che' bʌ tsi' pʌsbeyon i c'ʌc'al ti ac'ʌlel. Tsac cha'le xʌmbal ti' c'ʌc'al.

⁴Wen ch'ejlon che' jini. Tsa' jal'a Dios ti cotot. Tsi' pʌsbeyon i c'uxbiya.

⁵Che' bʌ cuxulob to calobilob tic joytilel, che' lʌc'ʌl an jini mach bʌ anic i p'isol i p'ʌtʌlel,

⁶pejtel chuqui tsac cha'le tsa' loq'ui ti uts'at. Jini xajlelol ti lʌc'ʌl tsi' yʌq'ueyon aceite lajal bʌ i yonlel bajche' pa'.

⁷Tsajniyon ti' ti' tejclum. Tsa' buchleyon ti meloñel ya' ti' t'ejl ñoj bij.

⁸Jini ch'itoñob tsi' q'ueleyoñob ti ñuc. Jini ñoxobix bʌ tsa' ch'ojyiyob. Wa'alob tsi' pijtayoñob.

⁹I yalobilob rey tsa' ñʌjch'iyob ti t'an che' bʌ tsa' c'otiyon. Tsi' pʌsʌyob i c'ʌb ti' yej cha'an mi' laj ñʌjch'elob.

¹⁰Jini ñuco' bʌ año' bʌ i ye'tel tsi' cʌyʌyob t'an. Tsi' pijtayoñob.

¹¹Tijicñayob jini tsa' bʌ i yubibeyon c t'an. Uts'at tsi' q'ueleyoñob.

¹²Come tsa cʌc'ʌ ti colel jini p'ump'un bʌ tsa' bʌ i c'ajti i coltʌntel. Tsaj colta meba' alʌlob yic'ot pejtel año' bʌ i wocol mach bʌ añobic i yaj coltaya.

¹³Tsaj colta jini colel bʌ i chʌmel. Tsac ñuq'uesʌbe i pusic'al meba' x'ixic. Tsa' cajiyob ti c'ay cha'an tijicñayob i pusic'al.

¹⁴Toj pejtel chuqui tsac cha'le. Tsac t'ojlʌtesa c bʌ ti toj bʌ c melbal che' bajche' winicob mu' bʌ i lʌpob i bujc yic'ot i pixol.

¹⁵Joñon i wentajon i wut xpots'. Tsaj c'ʌñʌ coc cha'an mij coltan jini mach bʌ weñobic i yoc.

¹⁶I wentajon i tat jini pobre. Tsaj colta ja'el jini mach bʌ j cʌñʌyobic che' bʌ tsi' meleyob i bʌ.

¹⁷Tsac jisʌbeyob i p'ʌtʌlel jini jontolo' bʌ cha'an mi' wersa cʌyob i tic'lan winicob.

¹⁸Tsac lon ña'ta tijicña mi caj c ñox'an ti' tojlel calobilob. Ñʌch'ʌlon mi caj c chʌmel che' cabʌlix c jabilel.

¹⁹Lajalon, lon cho'on, bajche' te' chucul bʌ i wi' ti' ti' ja', yic'ot i yopol te' am bʌ i ye'eb ti ac'ʌlel.

²⁰Jini c pi'ʌlob ma'anic mi caj i cʌyob i pʌsbeñon i c'uxbiya. Mux i yutsi p'ojlel c wersa ti pejtelel que'tel, lon cho'on.

²¹C pi'ʌlob ñʌch'ʌlob tsi' yubibeyon c t'an. Tsi' pijtayoñob jinto tsac ñaxan ac'ʌ c t'an.

²²Che' bʌ tsi' yubiyob, ma'anix majqui tsi' yotsa i t'an. Ma'anic tsi' contrajiyoñob.

²³Che' bajche' mi lac pijtan ja'al ti' yorajlel jajmel che' tiquin lac ti', che'i tsi' pijtayoñob.

²⁴Tsa' toj ñuc'ayob i pusic'al jini año' bʌ i wocol che' bʌ tsac jula'tayob.

²⁵Tsac subeyob bajche' yom mi' cha'leñob. Che'ʌch añon ti' tojlelob bajche' ñuc bʌ yumʌl mu' bʌ i coltan i winicob. Tsac ñuq'uesʌbeyob i pusic'al jini ch'ijiyemo' bʌ.