Read Chol Job 30 Bible Online

Job 30 - Chol bible

Job 30

¹Mach che'ix wʌleyi. Mi' wajleñoñob winicob yic'ot ja'el ch'itoñob. Ti yambʌ ora tsa'ic i c'ajtibeyoñob e'tel i tatob, ma'anic tsa cʌq'ueyob mi jinic jach cha'an mi' pi'leñob ti e'tel c ts'i' woli bʌ i cʌntan c tiñʌme'.

²Tsa'ic cʌq'ueyob i ye'tel, ma'añobic i c'ʌjñibal, come tsa'ix i jisayob i p'ʌtʌlel ti mulil.

³Yajyajob cha'an wi'ñal. Chocbilob majlel ti jochol bʌ lum ba' ma'anic chuqui mi' colel.

⁴Mi' tuc'ob chapʌy yic'ot i yopol xc'ʌn'ej yic'ot i buts. Mi' c'uxob i ña'al ch'ib.

⁵Chocbilob loq'uel ti tejclum. Jini xchumtʌlob ts'a' mi' q'uelob che' bajche' xujch'.

⁶Wersa mi' majlelob ti chumtʌl ti' jajp wits yic'ot ti' jajp xajlel.

⁷Muculob ti yebal tsu'um te' mi' cha'leñob oñel. Ya' ba'an ch'ixol cotcotña mi' ñumelob.

⁸Che' bajche' i tatob che'ʌch ja'el i yalobilob. Ma'añobic i pusic'al. Chocbilob loq'uel ti' tojlel xchumtʌlob.

⁹Wʌle mi' c'ʌyiñoñob ti wajleya. Mi' wajleñoñob ti c'ay.

¹⁰Ts'a' mi' q'ueloñob. Mach yomobic i ñochtañon. Chan mi' melob i bʌ. Mi' tujbañob c wut.

¹¹Dios tsi' jultesʌbeyon c pusic'al. Ma'anix c p'ʌtʌlel cha'an mic tic'ob. Jini cha'an ma'anix i frenojlel. Mi' melob bajche' jach yomob. Mach yujilobic quisin.

¹²Mi' xit chocoñoñob tic ñoj cha'an mic yajlel. Mi' yʌc'ob yac tic bijlel.

¹³Mi' tujc'añob lazo cha'an mi' chucob coc che' woliyon ti ñumel. Yujilob ma'anic caj coltaya.

¹⁴Ti ajñel mi' tilelob i chucon ya' ba' jembil pajc'. Mi' ñolchocoñoñob.

¹⁵Wʌle cujilix bʌq'uen. Ma'anix c ñuclel ti' tojlel winicob. Mach yujilobic p'untaya. Majlemix c wenlel che' bajche' tocal.

¹⁶Wʌle woli' c'uñ'an c pusic'al. Jujump'ejl q'uin chuculon ti wocol mach bʌ yujilic lajmel.

¹⁷Ti ac'ʌlel c'ux c bʌc'tal c'ʌlʌl mi' taj c bʌquel. Ma'anic mi' yʌq'ueñon c'aj co. Tsʌc'tsʌc'ña i c'uxel.

¹⁸Bʌlʌcñayon tic wʌyib cha'an wocol. Mic ts'ot c bʌ tic pislel. Tsʌts chuculon yubil che' bajche' ti' bic' bujcʌl.

¹⁹Dios tsi' chocoyon jubel ti oc'ol. Tsa'ix sujtiyon ti ts'ubejn yubil che' bajche' i tʌñil c'ajc.

²⁰Mic pejcañet ti wocol t'an, Dios, pero ma'anic ma' jac'. Wa'alon ti a tojlel, pero ma'anic ma' q'uelon.

²¹Jontol a pusic'al tic tojlel. Ma'anic ma' p'untañon. Ma' letsan a c'ʌb a contrajiñon ti cabʌl a p'ʌtʌlel.

²²Ma' ch'uyon letsel ti sutujt ic' yilal. Mi' wejlesañon majlel.

²³Cujil ti isujm mux caj a pʌyon ti chʌmel ya' ba' tsa' wʌn ña'ta a pʌy majlel pejtel cuxulo' bʌ.

²⁴Jini woli bʌ ti yajlel, ¿mach ba' anic mi' sʌts' i c'ʌb? Jini woli bʌ ti wocol, ¿mach ba muq'uic i c'ajtin i coltʌntel?

²⁵Cujil uq'uel joñon cha'an jini p'ump'un bʌ. Cabʌl tsac tsiqui c pusic'al cha'an jini woli bʌ ti wocol.

²⁶Jini cha'an tsa cʌlʌ mux caj a p'untañon. Pero lolom jach tsac pijta j coltʌntel. Tsa' p'ojli c wocol. Tsac lon pijta i sʌclel pañimil. Tsa' ic'a pañimil.

²⁷Wen c'ux c pusic'al. Mach c'ajix co. Jini jach wocol mi cubin ti jujump'ej q'uin.

²⁸Meba'on yubil. Wen ch'ijiyem c pusic'al. Che' mic wa'tʌl ba' tempʌbilob winicob, mu' jach j c'ajtibeñob j coltʌntel.

²⁹Che'ʌch mi' q'ueloñob bajche' i pi'ʌl jontol bʌ ts'i' yic'ot i pi'ʌl jini xcuj.

³⁰Iq'uix c pʌchʌlel cha'an c'amʌjel. Mi' sujliñiyel. Tiquinix c bʌc'tal cha'an c'ajc.

³¹Ma'anix tijicña bʌ tic tojlel. Jini arpa yic'ot amʌy mi cha'leñob uq'uel. Mi yuc'tañoñob cha'an wen ch'ijiyem c pusic'al.