Read Chol Job 33 Bible Online

Job 33 - Chol bible

Job 33

¹Ubibeñon c t'an, Job. Ñich'tan pejtel chuqui mic subeñet.

²Awilan tsa'ix c chajpa c bʌ. Comix c cha'len t'an.

³Jini woli bʌ c subeñet, mic sub ti pejtelel c pusic'al.

⁴I yEspíritu Dios tsi' meleyon. Ya' ch'oyol j cuxtilel ti' yiq'uilel i yej jini P'ʌtʌl Bʌ.

⁵Subeñon mi a wujilʌch jac'ol. Chajpan a t'an. La' c'ajtibeñon.

⁶Awilan, lajalon bajche' jatet ti' tojlel Dios. Lajal melbilonla ti lum.

⁷Mach a bʌc'ñañon. Mach a cha'len quisin. Ma'anic wolic xic'beñet.

⁸Tsa'ix a cha'le t'an. Tsa'ix cubi. Tsac ñich'tʌbeyet a t'an. Tsa' wʌlʌ:

⁹“Tojon, ma'anic c mul.

¹⁰Pero Dios mi' wersa taj leco tac bʌ tic tojlel mu' bʌ i mich'len. Mi' q'uelon che' bajche' i contra.

¹¹Mi' ñet'beñon coc ti tocol bʌ te'. Mi' chʌcʌ q'uel pejtel chuqui mic cha'len”, lon che'et.

¹²Wolix c jac'beñet. Mach isujmic bajche' wola' wʌl. Wen ñuc Dios. Mach ñuquic winic.

¹³¿Chucoch ma' lon al ma'anic mi' jac'beñet che' woliyet ti wocol?

¹⁴Che' mi' cha'len t'an Dios, jasʌl junyajl mi' yʌl. Mach wersajix i cha'yajlel cha'an mi lac ña'tan isujm. Muq'uic lac ñusʌben i t'an mi' chʌn pejcañonla.

¹⁵Che' woliyonla ti ñajal yic'ot che' an chuqui mi laj q'uel ti ac'ʌlel,

¹⁶Dios mi' yʌq'ueñonla lac cha' ñich'tan lac tic'ol. Mi' yʌq'ueñonla lac tsic pusic'al ame i tajonla wocol. Mi' cha' toj'esañonla.

¹⁷Mi' mʌctʌbeñonla lac bijlel che' mach tojic cha'an mi' ju'sʌbeñonla lac pusic'al

¹⁸ame jiliconla ti espada, ame chojquiconla ba' mi lac chʌmel.

¹⁹Mi' cʌntesañonla ja'el che' c'amonla. Che' wen c'ux i p'aquel winic che' ñolol ti' wʌyib,

²⁰mi' ts'a'len i bʌl i ñʌc'. Mach chʌn yomix i c'ux waj.

²¹Mi' tiquin i bʌc'tal. Yajyajix, tsiquilix i bʌquel.

²²Cabʌl mi' jal'an ti' ti' i yajñib chʌmeño' bʌ. Colel i chʌmel. Mi' yutsi c'uñ'an pañimil.

²³Ti jini jach bʌ ora mi tsa' tili ángel loq'uem bʌ ti' tojlel bajc'ʌl i pi'ʌlob ti panchan cha'an mi' toj'esan majlel ba' uts'atax,

²⁴che'ic jini, uts mi' pʌs i bʌ Dios ti' tojlel jini winic. Mi' yʌl: La'ix colic. Ma'anic mi' caj ti chʌmel. Tsa'ix c tojo cha'an mi' colel.

²⁵Cha'an tsi' cʌyʌ i mul jini winic, jini cha'an mi caj i cha' wen'an. Lajal mi caj i sujtel i bʌc'tal bajche' ch'iton, wen ch'ejl bʌ, che'en Dios.

²⁶Dios mi' jac' ti uts'at che' mi' pejcan jini winic. Che' mi' q'uelben i wut Dios tijicña jini winic. Mi cha' cajel ti cuxtiyel che' bajche' ti yambʌ ora.

²⁷Mi caj i suben i pi'ʌlob bajche' tsa' coltʌnti ti Dios. Tijicña i pusic'al mi' cha'len c'ay. Mi' yʌl: “Tsa'ix c cha'le mulil. Tsac xoyo c bijlel, pero ma'anic tsi' yʌq'ueyon c toj c mul. Tsi' p'untayon Dios.

²⁸Tsi' mʌñʌyon cha'an mi' coltañon. Jini cha'an ma'anic tsa' sajtiyon ba'an chʌmeño' bʌ. Cha' anix wen bʌ c pusic'al”, che'en jini winic.

²⁹Pejtelel iliyi mi' mel Dios ti' tojlel winicob. Mach junyajlic jach. I cha'yajlel yic'ot i yuxyajlel mi' mel

³⁰cha'an mi' sutq'uiñob i bʌ winicob ame majlicob ba'an chʌmeño' bʌ. Che' jini mi' pʌsbeñob bajche' yom mi' melob. Mi' yʌq'ueñob i cuxtʌlel.

³¹P'isi ti wenta, Job. Ñich'tʌbeñon. Yom ñʌch'ʌlet che' mic chʌn pejcañet.

³²Mi tsa' ña'ta bajche' mi caj a coltan a bʌ, subeñon, come tijicñayon mi tsa' mejli c pʌset ti toj.

³³Mi mach a womix a cha'len t'an, ubiñon. Yom chʌn ñʌch'ʌlet cha'an mij cʌntesañet bajche' yom mi' mel jini am bʌ i pusic'al, che'en Eliú.