Read Chol Job 35 Bible Online

Job 35 - Chol bible

Job 35

¹Eliú tsi' chʌn cha'le t'an: ¿Yomto ba ma' chʌn sub a bʌ ti toj? ¿Mu' ba a lon ñop mach tojic Dios?

³Wola' wʌl: “¿Chuqui mi lac taj ti' tojlel Dios cha'an tojonla? ¿Mach ba lajalic mi' coltan xmulilob?” lon che'et.

⁴Mi caj c subeñet yic'ot a pi'ʌlob,

⁵letsan la' wut ti chan. Q'uelela. Ñejñanla jini tocal am bʌ ti chan.

⁶Mi an a mul, ¿mu' ba caj ti yʌjñel i pusic'al Dios cha'an jini? Mi cʌlʌxix a mul, ¿mu' ba caj i yʌsiyel i pusic'al?

⁷Mi tojet ¿woli ba a coltan Dios? ¿Mu' ba caj i ch'ʌm i majtan ti a c'ʌb?

⁸Pero mi an a mul ma' bajñel ac' a bʌ ti wocol cha'an a mul. Mi tojet ma' coltan winicob.

⁹Che' cabʌl mi' yubiñob wocol winicob cha'an i tic'lʌntel, c'am mi' cha'leñob oñel cha'an yomob loq'uel ti' c'ʌbob jini xtic'layajob.

¹⁰Ma'anic majqui mi' yʌl: “¿Baqui an Dios tsa' bʌ i meleyon, mu' bʌ i yʌc'on ti c'ay ti ac'ʌlel?”

¹¹Dios mi' yʌq'ueñonla lac pusic'al yic'ot lac ña'tibal ñumen bajche' bʌte'el yic'ot te'lemut am bʌ ti pañimil.

¹²Mi' lon pejcañob Dios jini xjontolilob chan bʌ mi' melob i bʌ.

¹³Dios ma'anic mi' ñich'tʌbeñob i t'an jini mach bʌ i cha'añobic. Jini C'ax P'ʌtʌl Bʌ ma'anic mi' p'isob ti wenta.

¹⁴Jini cha'an ma'anic mi' p'iset ti wenta come ma'anic wola' p'is Dios. Anquese jal ma' pijtan, ma'anic woli' pʌs i bʌ. Ma'anic woli' melet che' bajche' tsa' wʌlʌ.

¹⁵Isujm ma'anic mi' tilel i jula'tañet Dios come mich'. Che jach mi' ñusañet come ts'a' mi' q'uel a mul.

¹⁶Jini cha'an, Job, wola' lon letsan a t'an. Anquese cabʌl a t'an ma'anic a ña'tibal, che'en.