Read Chol Job 36 Bible Online

Job 36 - Chol bible

Job 36

¹Eliú tsi' yʌlʌ ja'el: Anto yom ma' wubiñon. Mi caj j cʌntesañet. Come cabʌlto yom mic subeñet ti' wenta Dios.

³Tsajniyon ti ñajtʌl cha'an mic taj tilel c ña'tibal. Mi caj c pʌsbeñet tojch Dios. Tojʌch tsa' bʌ i meleyon.

⁴Isujmʌch c t'an. Mach c lotic. Cujil chuqui mic subeñet. Cabʌl c ña'tibal.

⁵P'ʌtʌlʌch Dios, wen cabʌl i ña'tibal, pero ma'anic mi' ts'a'len winicob mi juntiquilic. Mi' laj ch'ʌm ti' wenta.

⁶Ma'anic mi' jaltesʌben i jabilel jini xjontolil. Dios mi caj i mel ti uts'at jini tic'lʌbil bʌ.

⁷Ma'anic mi' wis cʌy i q'uel jini tojo' bʌ. Mi' wa'chocoñob yic'ot reyob am bʌ i yumʌntel. Che' jini mi' tajob i ñuclel.

⁸Mi tsa' cʌjchiyob ti ñujp'ibʌl, mi tsi' yubiyob cabʌl wocol,

⁹Dios mi' yʌq'ueñob i ña'tan i mul. Mi' pʌsbeñob i chanlel i pusic'al.

¹⁰Mi' jambeñob i chiquin cha'an mi' yubiñob i tic'ol. Mi' subeñob cha'an mi' cʌyob i mul.

¹¹Mi tsi' yubibeyob i t'an, mi tsi' jac'beyob, che' jini mi caj i ñajt'an i jabilel ti pañimil c'ʌlʌl che' ñoxobix, tijicñayob i pusic'al.

¹²Pero mi ma'anic tsi' ch'ujbibeyob i t'an, tsiquil che' jini ma'anic i ña'tibal. Mi' cajelob ti chʌmel ti espada.

¹³Pero jini mu' bʌ i lon pʌsob i bʌ ti toj che' mach tojobic muq'uix i tajob i mich'lel Dios. Ma'anic mi' sutq'uiñob i bʌ che' mi' tic'ob.

¹⁴Mi' chʌmelob che' ch'itoñob to. Mi' lon jisañob i bʌ ti' ts'i'lel.

¹⁵Pero Dios mi caj i p'untan jini tic'lʌbilo' bʌ woliyo' bʌ ti wocol. Mi' jambeñob i chiquin cha'an mi' ñich'tañob che' woliyob ti wocol.

¹⁶Yom to Dios i pʌyet loq'uel ti wocol cha'an ma' taj ñuc bʌ a wajñib ba' tijicñayet. Yom i chapʌbeñet a mesa yic'ot pejtel chuqui tac wen.

¹⁷Pero wersa tsi' yʌq'ueyet wocol cha'an a melbal, come junlajalet yic'ot xjontolilob. Wolix i melet cha'an a mul. Jini cha'an woliyet ti wocol.

¹⁸Tsajaletme ame cajiquet ti a'leya che' wola' wubiben i mich'ajel. Mach a mich'len Dios cha'an sajtem a chubʌ'an.

¹⁹Anic to a chubʌ'an, ¿chuqui i ye'tel? Mach mejlic i coltañet. Mach mejlic i lajmesʌbeñet a wocol cha'an ma' cha' c'oc'an.

²⁰Mach a lon pijtan ac'ʌlel, come mi' p'ojlel wocol che' mach yʌxʌlic la co.

²¹Tsajaletme ame a ñop jontolil, come cha'añʌch a jontolil tsa' tili ili wocol i yilʌbeñet a pusic'al.

²²Awilan, wen chan Dios, cabʌl i p'ʌtʌlel. ¿Majqui yujil cʌntesa che' bajche' Dios?

²³¿Mejl ba lac pʌsben bajche' yom i mel? ¿Yom ba mi lac p'ajben i ye'tel? Mach yomic.

²⁴Yom ma' ñuq'uesan cha'an ñuc tac bʌ i melbal. Cʌñʌl i melbal ti pejtelel pañimil.

²⁵Q'uelel lac cha'an ti pejtelonla, anquese winicon jach la mu' bʌ caj lac chʌmel. Pero mi lac yʌxña q'uelben i melbal Dios.

²⁶Awilan, wen ñuc Dios. Mach lac lu' cʌmbeyic i pusic'al. Mach tsicbilic i jabilel.

²⁷Mi' yʌc' ti letsel i yowix ja'. Mi' sujtel ti ja'al ti chʌjc' ti chʌjc'.

²⁸I yowix colem ñajb mi' cha' ch'ujyel letsel ti tocal. Jini tocal mi yʌc' ja'al ti lum. Mi' yʌch'esañonla.

²⁹Ma'anic majqui mi' ch'ʌmben isujm bajche' mi' pam puc i bʌ tocal mi bajche' mi' cajel ti t'an chajc loq'uem bʌ ti' pam tocal ba' buchul Dios.

³⁰Awilan, mi' pʌs i c'ʌc'al chajc am bʌ ti' joytilel. Mi' tsictesan i jol wits.

³¹Dios mi' pʌsbeñonla i p'ʌtʌlel ti pañimil che' mi' melonla yic'ot che' mi' yʌq'ueñonla i bʌl lac ñʌc'.

³²Mi' chuc jini chajc ti cha'ts'ijt i c'ʌb. Toj jach mi' choc tilel ba' mi' mel i ye'tel ti pañimil.

³³I t'an chajc mi' subeñonla lʌc'ʌl Dios. Jini bʌte'el mi' p'is ti wenta che' tal ja'al.