Read Chol Job 37 Bible Online

Job 37 - Chol bible

Job 37

¹Tsiltsilña c pusic'al mi cubin, tʌp'tʌp'ña ti bʌq'uen.

²Ubiben i t'an Dios. Che'ʌch yubil bajche' i t'an chajc.

³Mi' pam ñumel ti yebal panchan. Mi' tsictiyel i c'ʌc'al chajc c'ʌlʌl ti' ti' pañimil.

⁴Wi'il mi' yubintel i t'an. Wen c'am mu' ti t'an. Mi' c'ʌlʌ ubintel ti ñajt bʌ pañimil. Ma'anic majqui mi mejlel i tic'.

⁵Mi' cha'len t'an Dios che' bajche' mi' cha'len t'an chajc. Mi' mel ñuc tac bʌ mach bʌ anic mi lac ch'ʌmben isujm.

⁶Cha'an ti' caj i mandar mi' jubel ti pañimil i ña'al tsʌñal. Mi' choc tilel ja'al jini musmusña bʌ yic'ot chalacña bʌ che' ti' yorajlel.

⁷Mi' ñup'onla ti la cotot ti pejtelel pañimil cha'an mi' lac ña'tan jiñʌch i melbal Dios.

⁸Jini jontolo' bʌ bʌte'el mi' sujtelob ti ch'en ba' mi' wʌyelob.

⁹Loq'uem ti sur mi' tilel sutujt ic'. Loq'uem ti norte mi' tilel tsʌñal.

¹⁰Dios mi' wujtan jini colem ja', mi' sujtel ti tuñija'. Tsʌts i pam.

¹¹Isujm mi' lʌtschocon tocal am bʌ i ya'lel. Ya' ti tocal mi' mel chajc. Mi' choc tilel.

¹²Ti chajp ti chajp an ti' wenta Dios. Ti' caj i mandar Dios mi' joy ñumel ti pejtelel pañimil. Mi' cha'len bajche' jach subebil.

¹³An i tajol mi' choc tilel cha'an mi' toj'esañonla. An i tajol mi' pʌsbeñonla i yutslel. Jiñʌch Dios mu' bʌ i yʌq'uen i ye'tel.

¹⁴Ubin, Job, yom ñʌch'ʌlet cha'an ma' ñich'tan c t'an. P'isi ti wenta jini ñuc bʌ i melbal Dios.

¹⁵¿Awujil ba bajche' mi' yʌq'uen i c'ʌjñibal pejtel i melbal? ¿Bajche' mi' yʌc' ti lejmel i c'ʌc'al chajc ti tocal?

¹⁶¿Bajche' mi' p'isulan i yalel tocal che' bajche' ti balanza? Jiñʌch ñuc bʌ i melbal Dios, ts'ʌcʌl bʌ i ña'tʌbal.

¹⁷¿Awujil ba chucoch ma' cha'len bu'lich che' ñʌch'ʌl pañimil, che' ya jach ti sur woli' tejchel tilel ic'?

¹⁸Dios tsi' lich'i panchan che' bajche' colem espejo. Jixcu jatet, ¿awujil ba lich'ol?

¹⁹Mi cabʌlʌch a ñatibal, subeñon lojon bajche' yom mic pejcan lojon Dios, come tontojon lojon. Ma'anic lojon c pusic'al.

²⁰¿Yom ba mi lac wersa suben Dios cha'an mi' pejcañonla? ¿Mach ba muq'uic i mich'leñonla che' jini?

²¹Ma'anic mi laj q'uel che' mʌcʌl pañimil. Ma'anic mi laj q'uel i c'ʌc'al q'uin, pero ya' jach an ti pam tocal ba' tsi' yʌc'ʌ Dios. Jinto mi' tilel ic' i wets' majlel tocal mi' caj ti jajmel.

²²Che' ja'el mach mejlic laj q'uel Dios che' mi' jubel tilel ti lac tojlel. Jini jach mi laj q'uel i c'ʌc'al i pislel jini mucul bʌ woli bʌ ti yumʌntel.

²³Mach laj cʌmbeyic pejtel i p'ʌtʌlel jini P'ʌtʌl bʌ Mach bʌ Anic i P'isol i P'ʌtʌlel. Anquese toj mi' cha'len meloñel, pero uts i pusic'al ja'el. Ma'anic mi' jisan toj bʌ.

²⁴Jini cha'an winicob mi' ch'ujutesañob. Pero Dios ma'anic mi' p'is ti wenta jini chan bʌ i pusic'al. Tsa' ujti ti t'an Eliú.