Read Chol Job 6 Bible Online

Job 6 - Chol bible

Job 6

¹Tsa' caji ti t'an Job: La' ajq'uic ti balanza pejtel c wocol yic'ot c ch'ijiyemlel.

³Come wen alatax. Ñumen ti p'isol bajche' pejtel jini ji' am bʌ ti' ti' colem ñajb. Jini cha'an cʌlʌx jax tsac cha'le t'an.

⁴Come lac Yum tsi' juluyon ti' te'el i jalʌjb yubil. Tsa' wen ochi tic pusic'al i ñi' te' bombil bʌ ti veneno. Dios mi' p'ojlesan wocol tic tojlel. Mi' tempan bʌbʌq'uen bʌ cha'an mi' jisañon.

⁵Ch'ijiyem mi' cha'len oñel jini tat wacax che' ma'anic i buc'bal. Jini burro mach bʌ anix i yum mi' cha'len uq'uel che' ma'anix jam.

⁶Che' ja'el winicob mi' cajelob ti a'leya che' sup i bʌl i ñʌc'. Wersa yom i yʌts'mil i sʌquel tumut. Machiqui la com lac xejtan che' mi lac mʌc'.

⁷Wersa wolij c'ux jini tsa' bʌ c ts'a'le ti ñaxan.

⁸Ti pejtelel c pusic'al com mi' jac'beñon c Yum cha'an jini woli bʌ j c'ajtiben. Com mi' yʌc'on ti chʌmel cha'an mic loq'uel ba' tsʌts chuculon ti wocol.

¹⁰Anquese cabʌl c wocol, tijicña c pusic'al cha'an ma'anic tsac ts'a'libe i t'an jini ch'ujul bʌ Dios.

¹¹¿Chucoch anto j cuxtilel che' comix chʌmel? Mach chʌn cujchix c cha'an wocol mi jal to mic chʌmel.

¹²Mach lajalonic bajche' xajlel mach bʌ mi' yubin wocol. Mach lajalic c bʌc'tal bajche' tsucu taq'uin.

¹³Come ma'anix c p'ʌtʌlel mi ts'ita'ix. Ma'anic j coltʌntel. Ma'anix chubʌ mic pijtan.

¹⁴Jini mach bʌ anic mi' p'untan i cʌñʌ bʌ wolix bʌ ti jujuc chʌmel ma'anic mi' bʌc'ñan lac Yum.

¹⁵Quermanujob, lajaletla bajche' pa' mu' bʌ i wajlen jini am bʌ i tiquin ti'.

¹⁶Mi' bujt'el pa' che' ti' yorajlel tsʌñal,

¹⁷pero ti' yorajlel ticwal mi' tiquin.

¹⁸Jini xñumelob mi' cʌyob bij cha'an mi' tajob ja', pero lolom jach mi' sʌclañob. Mi' sajtelob cha'an tiquin ti'.

¹⁹Che' talob i japob ja' jini ch'oyolo' bʌ ti Temán yic'ot ti Sabá, ma'anic chuqui mi' tajob.

²⁰Che'ʌch añon ti la' tojlel bajche' jini am bʌ i tiquin ti'. Mach c tajayic chuqui tsac pijta. Ma'anic mi la' ñuq'uesʌbeñon c pusic'al. Mi la' sutq'uin la' bʌ cha'an bʌq'uen. Ma'anic mi la' coltañon.

²²¿Tsa' ba j c'ajtibeyetla c majtan? ¿Tsa' ba c subeyetla cha'an mi la' wʌq'uen Dios i majtan loq'uem bʌ ti a wʌlac' cha'an mi' lajmesañonla?

²³Ma'anic tsaj c'ajtibeyetla j coltʌntel cha'an mij colel ti' cʌb xtic'laya. Ma'anic tsac subeyetla: Mʌñʌyon loq'uel ti' c'ʌb jini motol bʌ xujch'ob. Ma'anic, cho'on.

²⁴Cʌntesañon. Ñʌch'ʌlon wolic ñich'tañetla. ¿Baqui an c sajtemal? Pʌsbeñon.

²⁵I t'an jini toj bʌ wen yujil jec'ol. Pero ¿baqui an c mul? Lolom jach mi la' wʌ'leñon.

²⁶¿Yom ba mi la' socbeñon c t'an cha'an mi la' junyajlel chilbeñon c pijtaya?

²⁷Lajaletla bajche' jini mu' bʌ i tic'lañob meba' alʌlob. Lajaletla bajche' winicob mu' bʌ i ñopob i chon ti jubem bʌ i tojol jini amigo i cha'an.

²⁸Wʌle q'ueleyon. Subeñon mi woliyon ti lot.

²⁹La' wocolic, mele la' pusic'al. Cha'lenla meloñel ti toj. Cha' ña'tanla c t'an. Ma'anic c mul.

³⁰¿Mach ba tojic c t'an? ¿Mach ba cujilic chuqui toj?