Read Chol Job 9 Bible Online

Job 9 - Chol bible

Job 9

¹Job tsa' caji' jac'. Isujmʌch jini woli bʌ a wʌl. Cujilix. Pero ¿bajche' mi caj i q'uejlel ti toj winic ti' tojlel Dios?

³Mi yom Dios i tech t'an yic'ot winic, ¿yujil ba i jac'ol jini winic? Mach yujilic i jac'ol mi junyajlic anquese jal mi' chʌn pejcʌntel.

⁴Come wen cabʌl i pusic'al Dios, wen cabʌl i p'ʌtʌlel. Ti pejtelel ora ma'anic mi juntiquilic tsa' bʌ i contraji tsa' bʌ mʌjli i cha'an.

⁵Dios mi' bʌc' ñijcan colem wits. Ma'anic mi' wʌn subeñonla. Mi' ñucchocon ti' mich'ajel.

⁶Ya' ba' buchul pañimil mi' ñijcuyel.

⁷Ma'anic mi' pasel q'uin mi ec' mi tsi' tiq'ui Dios.

⁸I bajñel tsi' lich'i panchan. Tsi' xʌñʌ majlel colem ja'.

⁹Tsi' mele jini ñoj ec' i c'aba' Osa Mayor yic'ot Orión yic'ot jini wucp'ejl ec' i c'aba' Xʌñʌb, yic'ot jini jochol bʌ panchan ti sur ba' ma'anic tsiquil ec'.

¹⁰Mi' mel ñuc tac bʌ mach bʌ cʌmbilic. Mi' toj sajtel lac pusic'al cha'an i melbal mach bʌ tsicbilic.

¹¹Awilan woli ti ñumel Dios tic tojlel, pero ma'anic mij q'uel. Mi' cha'len xʌmbal ñumel, pero ma'anic mi quilan.

¹²Che' an chuqui mi' chilbeñonla, ¿majqui mi mejlel i mʌctan? ¿Majqui mi' lon ña'tan i tic' cha'an jini mu' bʌ i mel?

¹³Dios mi caj i pʌs pejtel i mich'lel. Mi caj i ju'sʌbeñob i pusic'al jini chaño' bʌ yic'ot i pi'ʌlob ti jontolil.

¹⁴Jixcu joñon, mach ch'ejlonic cha'an mic jac'ben. Anquese lon chajpʌbil c cha'an c t'an, mi caj c ñʌjch'el ti' tojlel.

¹⁵Anquese tojon mach cujilic i jac'ol. Woli jach j c'ajtiben c juez ti wocol t'an cha'an mi' coltañon.

¹⁶Muq'uic i q'uelon ti toj, ¿bajche' mic ña'tan? Muq'uic i jac'beñon c t'an, mic lon ña'tan mach isujmic.

¹⁷Come tsa'ix i yʌq'ueyon wocol che' bajche' p'ʌtʌl bʌ ic'. Anquese ma'anic c mul, tsi' p'ojlesʌbeyon c tsoy.

¹⁸Ma'anic mi' poj cʌyon cha'an mij c'aj co. Cabʌl mi' yʌq'ueñon ch'aj bʌ.

¹⁹Mi woli lac ña'tan i p'ʌtʌlel, isujm an cabʌl i p'ʌtʌlel. Mi woli lac ña'tan meloñel, ¿majqui mi caj i wersa c'ajtiben?

²⁰Tsa'ic cʌ'le tsac taja c mul, anquese ma'anic c mul. Cujil tojon pero mach tojonic tsa'ic c tiq'ui.

²¹Isujm tojon, pero ma'anic wolic p'is c bʌ tic wenta. Mach comix jal'an ti pañimil.

²²Jini jachix com c sub. Junlajal mi' q'uelonla Dios. Lajal mi' jisan jini tojo' bʌ yic'ot jini jontolo' bʌ.

²³Che' mi' bʌc' tilel wocol i jisan winicob, lac Yum mu' jach i tse'tan jini mach bʌ añobic i mul woliyo' bʌ ti wocol.

²⁴Pejtel año' bʌ ti pañimil tsa'ix ajq'uiyob ti' wenta jontolo' bʌ. Dios mi' mʌcbeñob i wut jini juezob. Mach tojic mi' cha'leñob meloñel. Machic i melbal Dios, ¿majqui i melbal che' jini?

²⁵Ti ajñel wolic ñumel ti pañimil che' bajche' caballo yujil bʌ ajñel. Tsa'ix puts'i c jabilel ti cabʌl wocol.

²⁶P'is mi' ñumel c jabilel che' bajche' barco ñajt bʌ mi' cha'len xʌmbal. Wolic majlel che' bajche' xiye' che' mi' jubel i chuc i we'el.

²⁷Mi tsa cʌlʌ: Ma'anix mi caj c sub c wocol. Mi caj c cha'len wersa cha'an tijicña c wut, lon cho'on.

²⁸Che' jini bʌbʌq'uen mi' yʌsʌyel c pusic'al cha'an cabʌl wocol. Cujil ma'anic mi caj a q'uelon ti toj.

²⁹¿Chucoch mic lon cha'len wersa ti a tojlel mi mach tojonic?

³⁰Mi tsac poco c bʌ ti yʌx bʌ ja', mi tsac poco j c'ʌb cha'an wen sʌc, lolom jach.

³¹Mux caj a ts'ajon ti beyoc ja' ba' mic pʌjq'uel ti oc'ol. C pislel mi caj i yʌc'on ti ts'a'lentel.

³²Mach winiquic Dios bajche' joñon cha'an mic pejcan, cha'an temel mi cochel quic'ot ti melobʌjʌl.

³³Ma'anic winic ti' tojlel Dios mu' bʌ i yʌc' i bʌ ti xinlʌpʌl cha'an mi' lajmel i mich'ajel Dios tic tojlel.

³⁴La' i tʌts' i c'ʌb tic tojlel. Mach i chʌn bʌc'tesañon.

³⁵Che' jini mux caj c cha'len t'an ti' ñʌch'tilel c pusic'al che' lajmenix bʌq'uen. Mux c suben ma'anic c mul.