Read Chol Salmos 10 Bible Online

Salmos 10 - Chol bible

Salmos 10

¹C Yum, ¿chucoch ma'anic ma' p'ison ti a wenta? ¿Chucoch wola' mʌy a wut che' ti' yorajlel wocol?

²Chan mi' melob i bʌ jini jontolo' bʌ. Mi' tic'lanob jini p'ump'un bʌ. La' to cha' wʌlʌc chujquicob ti jini jach bʌ i maña tsa' bʌ i ña'tayob i mel.

³Jini jontol bʌ mi' chañ'esan i bʌ che' an chuqui yom ti' pusic'al. Jini xujch' mi' cha'len p'ajoñel, mi' ts'a'len Dios.

⁴Jini jontol bʌ ma'anic mi' sʌclan Dios come mi' chañ'esan i bʌ, Mi' lon al ti' pusic'al ma'anic Dios.

⁵Mi' chʌn xoy i bijlel bajche' jach yom i pusic'al. Ma'anic mi' wis c'otel ti' pusic'al bajche' mi cajel a mel. Mi' tse'tan i contrajob.

⁶Mi' yʌl ti' pusic'al: Ma'anic mi caj c mel c pusic'al. Ti pejtelel ora ma'anic mi caj cubin wocol, lon che'en.

⁷But'ul i yej ti p'ajoñel yic'ot lot, yic'ot jontolil. Che' mi' cha'len t'an an i maña. Yomix i tech mulil.

⁸Yujil i chijtan winicob. Mi' mucul tsʌnsan jini mach bʌ anic i mul. Mi' chijtan jini p'ump'un bʌ.

⁹Mi' muc i bʌ che' bajche' bajlum ti' ch'en cha'an mi' cha'len chijt. Mi' chijtan jini p'ump'un bʌ cha'an mi' chuque'. Mi' chuc jini p'ump'un bʌ che' bajche' ti yac.

¹⁰Tembil jini p'ump'un bʌ, mi' yajlel. Mi' mʌjlel i cha'an jini jontol bʌ.

¹¹Mi' lon al ti' pusic'al: Tsa'ix ñajiyi ti' pusic'al Dios, woli' mʌy i wut. Ma'anic mi caj i wis q'uel ti pejtelel ora, che'en.

¹²C Yum, yom ma' wa'tʌl. Dios, pʌsʌ a p'ʌtʌlel. Mach yomic mi' ñajiyel ti a pusic'al jini p'ump'un bʌ.

¹³¿Chucoch mi' ts'a'len Dios jini jontol bʌ? ¿Chucoch mi' lon al jini jontol bʌ ti' pusic'al: Ma'anic mi caj i melon Dios? che'en.

¹⁴Tsa'ix a q'uele, come ma' wotsan ti a pusic'al jini wocol yic'ot c'oj'ol cha'an ma' q'uextan. Jini p'ump'un bʌ mi yʌc' i bʌ ti a wenta. Xcoltayajet i cha'an meba' alʌlob.

¹⁵C'ʌsben i c'ʌb jini jontol bʌ. Laj tsictesan i mul xjontolil. Mach ma' wis ñusʌben i mul.

¹⁶Lac Yum Reyʌch ti pejtelel ora. Jini mach bʌ i cha'añobic Dios mi caj i laj jilelob ti' lumal lac Yum.

¹⁷C Yum, tsa'ix a wubi chuqui yom jini uts bʌ. Wola' xuc'chocoben i pusic'al. Wola' wen ubiben i t'an.

¹⁸Toj mi caj a mel jini meba' alʌlob yic'ot jini tic'lʌbilo' bʌ Cha'an ma'anix majch mi' chʌn mejlel i bʌc'tesañob ti pañimil.