Read Chol Salmos 102 Bible Online

Salmos 102 - Chol bible

Salmos 102

¹C Yum, ubibeñon coración. La' c'otic c t'an ba' añet.

²Mach ma' mʌybeñon a wut come woli cubin wocol. Ñich'tʌbeñon c t'an. Che' mic pejcañet yom ma' bʌc' jac'beñon.

³Tomocña mi' sʌc jilel j q'uiñilel che' bajche' buts'. Woli' jilel c bʌc'tal che' bajche' xutunte' woli bʌ ti pulel.

⁴C'unix pañimil. Tsa'ix wen tiqui c pusic'al che' bajche' tiquin bʌ jam. Mach chʌn comix waj cha'an ch'ijiyem c pusic'al.

⁵Ma'anix c bʌc'tal, to'ol c bʌquel jax yic'ot c pʌchʌlel, cha'an cabʌl tsic pusic'al.

⁶Añon tic bajñelil che' bajche' te'lemut mu' bʌ i yajñel ti jochol bʌ lum. Lajalon bajche' xcuj t'uchul bʌ ti' jol joch otot.

⁷Mach mejlicon ti wʌyel. Lajalon bajche' xpuruwoc t'uchul bʌ ti' jol otot ti' bajñelil.

⁸Ti jujump'ejl q'uin mi' wajleñoñob jini j contrajob. Mi' p'ajoñob jini mu' bʌ i mich'leñoñob.

⁹Wolij c'ux i tʌñil c'ajc yubil, i wenta c waj. Xʌbʌl wolic jap yic'ot i ya'lel c wut.

¹⁰Come wen mich'et. Tsa' techeyon, tsa' cha' chocoyon jubel.

¹¹Ora jach mi' ñumel j q'uiñilel. Mi' tam'an axñal tic pusic'al yilal che' bajche' ti och'ajel q'uin.

¹²C Yum buchulet ti a yumʌntel ti pejtelel ora. Mi caj i chʌn sujbel a ñuclel ti pejtelel ora.

¹³Mi caj a ch'ojyel a p'untan Sion, jini ch'ujul bʌ tejclum. Come i yorajlelix ma' pʌsben a wutslel. Isujm tsa'ix juli i yorajlel wʌn ña'tʌbil bʌ a cha'an.

¹⁴A winicob mi' c'uxbiñob i xajlelal Sion. Ch'ijiyemob i pusic'al cha'an i ts'ubeñal jini jejmen tac bʌ otot.

¹⁵Che' ma' p'untan Sion mi caj i bʌc'ñañob i c'aba' lac Yum jini mach bʌ i cha'añobic Dios. Pejtel jini yumʌlob ti pañimil mi caj i bʌc'ñañetob cha'an a ñuclel.

¹⁶Lac Yum mi caj i cha' mel Sion. Mi caj i pʌs i bʌ yic'ot i ñuclel.

¹⁷Mi' jac'beñob i yoración jini p'ump'uño' bʌ, Ma'anic mi' ñusʌbeñob i t'an.

¹⁸La' ochic ti jun iliyi cha'an mi' q'uelob la calobilob. Jini maxto bʌ anic tsi' yilayob pañimil mi caj i subob i ñuclel lac Yum.

¹⁹Lac Yum am bʌ ti ch'ujul bʌ i yajñib ti panchan tsi' q'uele winicob x'ixicob ti pañimil.

²⁰Tsa'ix i yubibeyob i yajcʌn jini ñup'ulo' bʌ. Tsa'ix i ña'ta i yʌc'ob ti libre jini woli bʌ i chʌmelob.

²¹Winicob x'ixicob mi caj i tsictesañob i ñuclel lac Yum ya' ti Sion. Mi caj i subob i ñuclel lac Yum ya' ti Jerusalén

²²Che' tempʌbilob tilel jini loq'uemo' bʌ ti cabʌl tejclum tac Cha'an mi' ch'ujutesañob lac Yum.

²³Lac Yum tsi' jisa c p'ʌtʌlel ti ojlil bij yubil. Tsa'ix i com'esʌbeyon j q'uiñilel.

²⁴Tsac sube: C Dios, mach a pʌyon majlel che' maxto ñoxonic. Cuxulet ti pejtelel ora. Junlajalet ti' tojlel calobilob lojon yic'ot i yalobilob ti lajm ti lajm.

²⁵Ti oñiyi tsa' wa'choco jini pañimil, Jini panchan i melbalʌch a c'ʌb.

²⁶Mi caj i jilel pero chʌn cuxulet. Mi' caj ti tsuculiyel che' bajche' bujcʌl. Mi caj i q'uextiyel che' bajche' mi laj q'uextan lac bujc. Mi' caj ti yʌjñel.

²⁷Mach che'iquet, mach a wujilic ñox'an. Mach jiliquet ti pejtelel ora.

²⁸Xuc'ul mi' cajelob ti chumtʌl i yalobilob a winicob. Mi caj a coltañob.