Read Chol Salmos 105 Bible Online

Salmos 105 - Chol bible

Salmos 105

¹Subenla wocolix i yʌlʌ lac Yum. Pejcanla ti' c'aba'. Pucbenla i melbal lac Yum ya' ti' tojlel pejtel winicob x'ixicob.

²Cha'lenla c'ay ti' tojlel lac Yum. C'ʌyibenla i ñuclel. Subula pejtel jini ñuc bʌ i melbal.

³Ñuq'uesan la' pusic'al cha'an ch'ujul i c'aba' lac Yum. Yom tijicña mi' yubiñob jini mu' bʌ i ch'ujutesañob lac Yum.

⁴Sajcan lac Yum ba' tilem lac p'ʌtʌlel. Ajñenla ti' tojlel ti pejtelel ora.

⁵Ña'tʌbenla i yejtal tac i p'ʌtʌlel tsa' bʌ i pʌsʌ, Jini bʌbʌq'uen tac bʌ i melbal che' bʌ tsi' yʌc'ʌ i t'an ti' contra egiptojob.

⁶Jatetla i p'olbaletla Abraham i winic lac Yum. I yalobiletla Jacob, i yajcʌbaletla Dios.

⁷Lac Yum jiñʌch Dios. Mi' mel winicob x'ixicob ti pejtelel pañimil.

⁸Ti pejtelel ora ña'tibilix i cha'an jini xuc'ul bʌ i t'an Tsa' bʌ i subeyob winicob x'ixicob yic'ot i yalobilob ti lajm ti lajm cha'an mi' chʌn ña'tañob ti pejtelel ora.

⁹Jiñʌch xuc'ul bʌ t'an tsa' bʌ i yʌq'ue Abraham, Jini xuc'ul bʌ t'an tsa' bʌ i yʌq'ue Isaac,

¹⁰Jini jach bʌ t'an tsa' bʌ i yʌq'ue Jacob ti mandar. Mach jilic ti pejtelel ora jini xuc'ul bʌ i t'an ti' tojlel Israel.

¹¹Tsi' yʌlʌ lac Yum: Mi caj cʌq'ueñet i lumal Canaán cha'an a cha'anʌch, che'en.

¹²Che' maxto cabʌlobic lac pi'ʌlob, Che' ñumel jach tsa' ñumiyob come mach i cha'añobic jini lum,

¹³Tsi' cha'leyob xʌmbal ñumel ti jujump'ejl lum. Tsa' loq'uiyob ti jump'ejl lum, tsa' ochiyob ti yambʌ i yum.

¹⁴Lac Yum Dios ma'anic tsi' yʌc'ʌyob ti tic'lʌntel. Tsi' tiq'ui reyob tsa' bʌ i tic'layob.

¹⁵Tsi' yʌlʌ: Mach mi la' mʌctan jini yajcʌbilo' bʌ c cha'an. Mach mi la' tic'lan jini x'alt'añob c cha'an, che'en.

¹⁶Tsi' choco tilel wi'ñal ti pañimil. Tsi' yʌc'ʌ ti jilel i bʌl ñʌc'ʌl.

¹⁷Lac Yum tsi' choco majlel winic ti' tojlel i yalobilob Jacob cha'an mi' coltañob. Tsa' chojni José cha'an mi' yochel ti majtan e'tel ti' wenta i yum.

¹⁸Tsi' cʌchbeyob i yoc ti cadena tac. Cʌchʌl tsa' cʌle.

¹⁹Jinto tsa' ts'ʌctiyi i t'an lac Yum, tsa' q'uejli ti toj.

²⁰Jini rey tsi' cha'le mandar cha'an mi' yʌc' ti colel. Jini ñuc bʌ yumʌl ti' tojlel cabʌl winicob x'ixicob tsi' colo.

²¹Tsi' wa'choco José cha'an mi' yumañob i winicob ti' yotot rey. Tsi' yotsa ti' wenta pejtel i chubʌ'an.

²²Tsi' yʌq'ue i p'ʌtʌlel cha'an mi' cʌchob yumʌlob che' yom. Tsi' yʌq'ue i ye'tel ti' tojlel ancianojob cha'an mi' cʌntesañob.

²³Tsa' c'oti Israel ya' ti Egipto. Tsa' chumle Jacob ti' lumal Cam.

²⁴Lac Yum tsi' yʌc'ʌ ti p'ojlel i yalobilob. Che' wen cabʌlobix ñumen an i p'ʌtʌlel bajche' i contrajob.

²⁵Dios tsi' q'uextʌbeyob i pusic'al egiptojob cha'an mi' ts'a'leñob i cha'año' bʌ, Cha'an mi' lotiñob.

²⁶Tsi' choco tilel Moisés, i winic, Yic'ot Aarón, yajcʌbil bʌ i cha'an.

²⁷Tsi' pʌsʌyob i yejtal i p'ʌtʌlel lac Yum, yic'ot ñuc tac bʌ i p'ʌtʌlel lac Yum ya' ti' lumal Egipto.

²⁸Tsi' yʌc'ʌ ic'yoch'an bʌ pañimil, tsa' ic'a. Pero jini egiptojob tsi' chʌn ñusayob Dios.

²⁹Tsi' pʌntesa ja' ti ch'ich'. Tsi' tsʌnsa jini chʌy am bʌ ti Egipto.

³⁰Tsi' wen p'ojlesa xpequejc ti lum. Tsa' ochi ti jujump'ejl i mal i yotot rey.

³¹Tsi' yʌc'ʌ mandar lac Yum, tsa' wen caji ti p'ojlel us ti' ti' ja', Yic'ot uch' ti pejtelel i lumal Egipto.

³²Tsi' choco jubel tuñija' i wenta ja'al, Yic'ot chajc mu' bʌ ti lejmel ti pañimil.

³³Tsi' jisa jini ac' yic'ot higuerate'. Tsi' buchu jubel jini te'el am bʌ ti lum.

³⁴Tsi' yʌc'ʌ i t'an cha'an mi' p'ojlel sajc', Yic'ot cabʌl chʌñil pañimil.

³⁵Jini sajc' tsi' jisa pejtelel jini pimel ti' lumal Egipto. Tsi' laj c'uxbe i wut pʌc'ʌbʌl ti pejtelel jini lum.

³⁶Lac Yum tsi' tsʌnsa pejtelel ascuñʌlo' bʌ ti' lumal, Jini ñaxan bʌ i yalobilob.

³⁷Tsi' pʌyʌ loq'uel israelob, cuchulob i cha'an plata yic'ot oro. Ma'anic majqui tsa' c'un'a ti bij ti pejtelel yalobilob Israel.

³⁸Tijicñayob tsi' yubiyob egiptojob che' bʌ tsa' loq'uiyob, Come cabʌl woliyob ti bʌq'uen.

³⁹Lac Yum tsi' lich'ye'e jini tocal cha'an mi' mosob ti q'uiñil, Yic'ot c'ajc cha'an mi' yʌc' i sʌclel pañimil ti ac'ʌlel.

⁴⁰Jini israelob tsi' c'ajtibeyob Dios we'elʌl, tsi' yʌq'ueyob cox. Tsa' ñaj'ayob ti waj tilem bʌ ti panchan.

⁴¹Tsi' top'o xajlel, on tsa' loq'ui ja'. Tsi' mele pa' ya' ti tiquin bʌ lum.

⁴²Come tsi' ña'ta jini ch'ujul bʌ i t'an Tsa' bʌ i sube Abraham i winic.

⁴³Tsi' pʌyʌ loq'uel i cha'año' bʌ. Tijicñayob i pusic'al tsa' loq'uiyob. Jini yajcʌbilo' bʌ i cha'an tsi' cha'leyob c'ay.

⁴⁴Lac Yum tsi' yʌq'ueyob i lum israelob, jini lum tsa' bʌ chilbentiyob jini sajtemo' bʌ. Tsi' yʌq'ueyob i wut i pʌc'ʌb yaño' bʌ,

⁴⁵Cha'an mi' jac'beñob i mandar Dios yic'ot i cʌntesa ti pejtelel i pusic'al. ¡Aleluya!