Read Chol Salmos 109 Bible Online

Salmos 109 - Chol bible

Salmos 109

¹Dios, mic sub a nuclel. Mach yomic che jach ñʌch'ʌlet.

²Come woli' contrajiñoñob jontol bʌ winicob yic'ot i lot. Mi' jop'ob t'an tij contra.

³Mi' joyoñob ti ts'a'leya. Mi' techob leto anquese ma'anic c mul.

⁴C'ux mi cubiñob. Mic tajob ti oración, pero mi' p'ajoñob.

⁵Che' mic pʌsbeñob cutslel mi' cha' q'uextañob jontolil. Anquese mij c'uxbiñob mi' ts'a'leñoñob.

⁶La' pʌjyic ti meloñel ti' wenta jontol bʌ juez. La' ajnic ti' wenta xjop't'an.

⁷Che' mi' mel i bʌ ba'an juez la' i yʌq'uen i toj i mul. La' q'uejlic ti mulil i yoración.

⁸La' chʌmic che' ma'anic cabʌl i jontolil. La' wa'chocontic yambʌ cha'an mi' ch'ʌmben i ye'tel.

⁹La' cʌlecob ti meba' i yalobilob. La' cʌlec ti meba' i yijñam.

¹⁰La' i cha'leñob pam xʌmbal ñumel i yalobilob. La' i c'ajtiñob ñumel i waj che' chocbilob loq'uel ti' yotot.

¹¹La' tilic x'ac taq'uin i chilben pejtelel i chubʌ'an cha'an i bet. La' tilicob jini mach bʌ cʌmbilobic i cha'an i chilbeñob i c'ajbal.

¹²Mach mi' chʌn pʌsben i yutslel mi juntiquilic. Mach mi' p'untʌntelob jini meba alʌlob i cha'an.

¹³La' jilicob i p'olbal. La' ñajʌyic i c'aba' ti' pusic'al winicob x'ixicob che' woli' colelob i yalobilob i yalobilob.

¹⁴C Yum, ña'tʌben i jontolil i tat. Mach yomic mi' ñajʌyel ti a pusic'al i mul i na'.

¹⁵Yom ma' chʌn ña'tan i mulob ti pejtelel ora. La' jilic i na'tʌntel ili winic ti pañimil.

¹⁶Come ma'anic tsi' pʌsʌ i yutslel. Tsi' chʌn tic'la jini pobrejob yic'ot jini p'ump'uño' bʌ, Yic'ot ch'ijiyemo' bʌ i pusic'al jinto tsa' chʌmiyob.

¹⁷Cabʌl tsi' cha'le p'ajoñel, jini cha'an la' p'ajlec. Ma'anic tsi' c'ajtibe i yutslel Dios. Jini cha'an mach i tajayic i yutslel Dios ti pejtelel ora.

¹⁸Mi' cha'len p'ajoñel che' bajche' mi' xoj i bujc, che' bajche' mi' cha'len we'el uch'el.

¹⁹La' wʌlʌc sujtic ti' tojlel i p'ajoñel i wenta i mosil, i wenta i cajchiñʌc' mu' bʌ i cʌch ti jujump'ejl q'uin.

²⁰Dios, yom ma' wʌq'ueñob i toj i mul jini mu' bʌ i jop'beñon c mul, Yic'ot jini mu' bʌ i p'ajon cha'an mi cʌjq'uel ti chʌmel.

²¹Pero jatet, c Dios, c Yum, p'untañon cha'an ma' wʌc' ti ñuc a c'aba', Coltañon loq'uel ti wocol ti a wutslel come wen awujil c'uxbiya.

²²P'ump'uñon, cabʌl c wocol. Ch'ijiyem c pusic'al.

²³Mi caj j cʌy pañimil che' bajche' mi' majlel axñal ti och'ajel q'uin. Chocbilon che' bajche' mi lac ñijcan majlel jichitin.

²⁴C'unix c pix cha'an wolic bi'len i bʌl c ñʌc'. Jilemix c bʌc'tal, yajyajonix.

²⁵Mi' wajleñoñob winicob. Che' mi' q'ueloñob mi' yʌlob ma'anic c pijtaya.

²⁶Aq'ueñon c p'ʌtʌlel, c Yum Dios. Coltañon yic'ot a wutslel.

²⁷Tsictesan a wutslel cha'an mi' laj ña'tañob Jiñʌch a melbal, c Yum.

²⁸Che' ma' pʌsbeñon i yutslel a t'an, ma'anic mic bʌc'ñan i p'ajoñel. La' i yubiñob quisin jini j contrajob, pero la' ñuc'ac c pusic'al come a winicon.

²⁹La' ts'a'lenticob j contrajob. La' i cha'leñob quisin che' bajche' xojol bʌ i cha'an bibi' bʌ pisil, come tsi' yʌc'ʌyob i bʌ ti jontolil.

³⁰Mi caj c suben wocolix i yʌlʌ lac Yum ti c'am bʌ t'an. Mi caj c sub i ñuclel ti' tojlel jini tempʌbilo' bʌ.

³¹Come wʌ'an lac Yum ti' t'ejl jini p'ump'un bʌ Cha'an mi' yʌc' ti colel ti' p'ʌtʌlel jini yomo' bʌ i jisan.