Read Chol Salmos 113 Bible Online

Salmos 113 - Chol bible

Salmos 113

¹¡Aleluya! Subula nuc lac Yum, i winiquet bʌ la. Subula nuc i c'aba' lac Yum.

²La' sujbic i nuclel i c'aba' lac Yum wʌle yic'ot ti pejtelel ora.

³Ya' ti' pasibal q'uin c'ʌlʌl ti' bʌjlibal q'uin la' sujbic i nuclel i c'aba' lac Yum.

⁴Ñumen ñuc lac Yum bajche' pejtelel winicob x'ixicob ti pejtelel lum. Tsiquil i ñuclel ya' ti panchan.

⁵¿Majqui lajal bajche' lac Yum Dios? Ma'anic yambʌ. Buchul lac Yum ti' ye'tel ya' ti chan.

⁶Mi' ju'san i wut cha'an mi' q'uel panchan yic'ot pañimil.

⁷Mi' loc'san pobre ba' c'ax p'ump'un. Mi' tech ch'ojyel p'ump'un bʌ ba' chocbil,

⁸Cha'an mi' buchchocon ti' tojlel yumʌlob c'uxbibilo' bʌ i cha'an winicob x'ixicob.

⁹Mi' yʌq'uen i cʌntan i yalobil jini to'ol wa'al jach bʌ x'ixic. Tijicña i pusic'al mi' mec' i yalobilob. ¡Aleluya!