Read Chol Salmos 119 Bible Online

Salmos 119 - Chol bible

Salmos 119

¹Tijicñayob jini tojo' bʌ mu' bʌ i cha'leñob xʌmbal che' bajche' ts'ijbubil ti' cʌntesʌbal lac Yum.

²Tijicñayob jini mu' bʌ i jac'ob a t'an, mu' bʌ i sʌclañet c Yum, ti pejtelel i pusic'al.

³Ma'anic mi' cha'leñob jontolil. Mi' cha'leñob xʌmbal ti a bijlel c Yum.

⁴Tsa'ix a wʌc'ʌ a ley cha'an mic wen jac' lojon.

⁵La' xuc'lecon cha'an mic cha'len chuqui uts'at Che' bajche' ts'ijbubil.

⁶Che' jini ma'anic mi caj cʌjq'uel ti quisin, Come mic wen q'uel pejtelel a mandar.

⁷Mi caj c subeñet wocolix a wʌlʌ ti xuc'tilel c pusic'al Che' mi cubin c toj'esʌntel.

⁸Mi caj c jac'. Mach ma' junyajlel cʌyon.

⁹¿Bajche' mi mejlel i cʌntan i bʌ cha'an sʌc mi' yajñel jini ch'iton winic? Mi' cʌntan i bʌ che' mi' jac' a t'an.

¹⁰Mic sʌclañet ti pejtelel c pusic'al. Cʌntesañon a mandar ame mij cʌy a bijlel.

¹¹Tsa'ix cotsa a t'an tic pusic'al Cha'an ma'anic mic cha'len mulil ti a contra.

¹²Uts'atet c Yum, cʌntesañon ti a mandar.

¹³A cha'añʌch jini quej cha'an mic laj sub chubʌ tsa' wʌlʌ.

¹⁴Tijicñayon che' bajche' wen chumul bʌ Che' mic jac' a t'an.

¹⁵Mi caj c p'is tic wenta chuqui tsa' tsictesa. Mi caj j q'uel ti ñuc a melbal.

¹⁶Tijicñayon cha'an a ts'ijbujel. Ma'anic mi' ñajʌyel a t'an tic pusic'al.

¹⁷A winicon. Aq'ueñon chuqui wen ti' yutslel a pusic'al, Cha'an mic chʌn jac' a t'an.

¹⁸Cambeñon c wut cha'an mij q'uel jini ñuc tac bʌ a cʌntesʌbal.

¹⁹Xñumelon ti pañimil. Mach ma' mʌcbeñon a mandar.

²⁰Ti jujump'ejl q'uin wersa com cubin j cʌntesʌntel ti pejtelel c pusic'al.

²¹Tsa'ix a tiq'ui jini chan bʌ mi' melob i bʌ. Chocbilob ti a tojlel cha'an tsi' cʌyʌyob a mandar.

²²Mach ma' wʌc'on ti a'lentel yic'ot ts'a'lentel Come wolic jac' a t'an.

²³Anquese mi' tempañob i bʌ yumʌlob cha'an mi' temob i t'an tij contra, Joñon mi caj c chʌn ña'tan c mel chuqui a wom, come a winicon.

²⁴Isujm, tijicña c pusic'al cha'an a t'an, Come mi' pʌsbeñon bajche' yom mic mel.

²⁵Wen ch'ijiyemon, pʌcʌlon ti ts'ubejn yilal. Cha' ch'ejl'esʌbeñon c pusic'al yic'ot a t'an.

²⁶Tsa'ix c subeyet c sajtemal, tsa'ix a wubiyon. Cʌntesañon ti a mandar.

²⁷Aq'ueñon c ch'ʌmben i sujm. Che' jini mi caj cotsan tic pusic'al jini ñuc tac bʌ a melbal.

²⁸Mi' c'uñ'an c pusic'al cha'an wocol. P'ʌtesañon ti a t'an.

²⁹Cʌntañon ame mic ñopben i melbal jini payxo bʌ. Cʌntesañon ti' yutslel a pusic'al.

³⁰Tsa'ix c yajca jini isujm bʌ bij. Mij q'uel ti ñuc pejtel chuqui tsa' wʌlʌ.

³¹Mi cʌc' c bʌ ti' jac'ol. C Yum, mach ma' wʌc'on ti quisin.

³²Mi caj c bʌc' jac'beñet a mandar che' cʌntesʌbilon Cha'an mi cutsi ch'ʌmben isujm.

³³C Yum, cʌntesañon ti' sujmlel jini ts'ijbubil bʌ a t'an cha'an mic chʌn jac' ti pejtelel ora.

³⁴Aq'ueñon c ch'ʌmben isujm, cha'an mic jac'beñet a cʌntesa ti jump'ejl c pusic'al.

³⁵Toj'esañon majlel ti a bijlel, Come tijicña mi cubin a mandar.

³⁶Yom ma' wʌc' c pusic'al ti jini tsa' bʌ a wʌlʌ, Ame mi cʌc' c pusic'al ti' mulʌntel taq'uin.

³⁷Mʌybeñon c wut ame mic chʌn q'uel jini lolom jach bʌ. Ch'ejlesañon ti a bijlel.

³⁸Xuc'chocoñon che' bajche' tsa' subeyon, Cha'an mi' tajob i wenlel jini mu' bʌ i bʌc'ñañet.

³⁹Mic bʌc'ñan c wajlentel che' mic mel chuqui uts'at Che' bajche' tsa' cʌntesayon.

⁴⁰Wersa com c ñop a t'an. Cha' ch'ejlesañon come toj a pusic'al.

⁴¹C Yum, pʌsbeñon i yutslel a pusic'al. Coltañon che' bajche' tsa' subu.

⁴²Che' jini mi caj c toj'esan majlel jini mu' bʌ i wajleñoñob, Come wolic ñop a t'an.

⁴³Mach sajtic a t'an tic pusic'al, come isujmʌch. Wolic pijtan i ts'ʌctesʌntel.

⁴⁴Mi caj c jac'beñet a cʌntesa wʌle yic'ot ti pejtelel ora.

⁴⁵Tijicña mi caj cajñel ti a bijlel come librejonix, Come tsa'ix c wen ñopo a t'an.

⁴⁶Mi caj c sub a ña'tʌbal ti' tojlel reyob. Ma'anic majch mi caj i yʌc'on ti quisin.

⁴⁷Tijicñayon cha'an a mandar, Come c'ux mi cubin.

⁴⁸Mic ch'ujutesan a mandar mu' bʌ j c'uxbin. Mi caj c chʌn ña'tan tic pusic'al.

⁴⁹Yom chʌn c'ajal a cha'an jini t'an tsa' bʌ a sube a winic, Tsa' bʌ i techbeyon c pijtaya.

⁵⁰Mi' ñuq'uesʌbeñon c pusic'al che' woliyon ti wocol. Jini tsa' bʌ a wʌlʌ mi' ch'ejlesʌbeñon c pusic'al.

⁵¹Jini chan bʌ mi' melob i bʌ cabʌl mi' wajleñoñob. Pero ma'anic mij cʌy c ñopet.

⁵²Che' mij c'ajtesan a melbal ti wajali, Mi' ñuc'an c pusic'al, c Yum.

⁵³Cabʌl mic mich'len jini jontolo' bʌ mu' bʌ i ñusañob a t'an.

⁵⁴Wolij c'ʌyin salmo tac che' poj wʌ' añon ti pañimil.

⁵⁵C Yum mic ña'tan a c'aba' ti ac'ʌlel. Mic jac'beñet a cʌntesa.

⁵⁶Jiñʌch c wenlel mu' bʌ i ñuq'uesan c pusic'al. Wolic jac'beñet a t'an.

⁵⁷C Yum i wentajet c lum yic'ot c chubʌ'an. Tsa cʌc'ʌ c bʌ ti' jac'ol a t'an.

⁵⁸Ti pejtelel c pusic'al mij c'ajtibeñet, Pʌsbeñon a wutslel che' bajche' tsa' wʌlʌ.

⁵⁹Tsac ña'ta bajche' añon. Tsac sutq'ui c bʌ cha'an mic cha' tsajcan jini tsa' bʌ a wʌlʌ.

⁶⁰Tsac se'ñu c bʌ cha'an mic jac'beñet a mandar.

⁶¹Anquese mi' chucoñob jini jontolo' bʌ che' bajche' ti yac, Ma'anic mi' ñajʌyel tic pusic'al a cʌntesa.

⁶²Ti yojlil ac'ʌlel mic ch'ojyel cha'an mic subeñet wocolix a wʌlʌ Come toj bajche' ma' mel.

⁶³I pi'ʌlon pejtel mu' bʌ i bʌc'ñañet. I pi'ʌlon jini mu' bʌ i jac'ob a cʌntesa.

⁶⁴C Yum, pam pujquem a wutslel ti pañimil. Cʌntesañon ti a ts'ijbujel.

⁶⁵Uts'at bajche' tsa' mele ti' tojlel a winic, Che' bajche' tsa' wʌlʌ, c Yum.

⁶⁶Aq'ueñon c ña'tʌbal cha'an mic ch'ʌmben isujm, Come mi cʌc' ti ñuc a mandar.

⁶⁷Che' maxto anic tsa cubi wocol tsac xoyo c bijlel. Wʌle wolix c jac'beñet a t'an.

⁶⁸Uts'atet, uts'at chuqui wola' mel. Cʌntesañon ti a ts'ijbujel.

⁶⁹Jini chan bʌ mi' melob i bʌ woli' jop'ob t'an tij contra. Pero joñon wolic jac' a mandar ti pejtelel c pusic'al.

⁷⁰Mach mejlicob i ch'ʌmbeñob isujm a t'an, Pero joñon tijicñayon cha'an a mandar.

⁷¹Uts'at tsa' ju'sʌbeyon c pusic'al yic'ot wocol Cha'an mic p'is tic wenta a ts'ijbujel.

⁷²Ñumen uts'at mij q'uel a cʌntesa Bajche' cabʌl oro yic'ot sʌsʌc taq'uin.

⁷³I melbalon a c'ʌb. Tsa' meleyon che' bajche' yom a pusic'al. Aq'ueñon c ch'ʌmben isujm cha'an mic jac' a mandar.

⁷⁴Jini mu' bʌ i bʌc'ñañet tijicña mi caj i q'uelon, Come mic pijtan i ts'ʌctesʌntel.

⁷⁵Cujil toj ma' cha'len meloñel, c Yum. Tsa' wʌq'ueyon wocol ti' xuc'tilel a pusic'al cha'an ma' ju'sʌbeñon c pusic'al.

⁷⁶Awocolic ñuq'uesʌbeñon c pusic'al ti a wutslel Che' bajche' tsa' wʌn sube a winic.

⁷⁷Yom ma' p'untañon cha'an cuxul mic chʌn ajñel, Come tijicña mi cubin cha'an a cʌntesa.

⁷⁸La' i yubiñob quisin jini chan bʌ mi' melob i bʌ, Come tsi' jop'oyob c mul. Pero joñon mic chʌn ña'tan a t'an.

⁷⁹Jini mu' bʌ i bʌc'ñañet la' tilic quic'ot. Mi caj j cʌntesan ti a t'an.

⁸⁰La' c mel ti jump'ejl c pusic'al bajche' ts'ijbubil. Che' jini ma'anic mi caj cubin quisin.

⁸¹C'uñatax pañimil come jal wolic pijtañet jinto ma' coltañon, Pero xuc'ul to c pusic'al ti a t'an mu' bʌ caj ti ts'ʌctiyel.

⁸²Mij c'uñ'an cha'an jal mic pijtañet jinto ma' ts'ʌctesan a t'an. ¿Baqui ora mi caj a ñuq'uesan c pusic'al?

⁸³Lajalon bajche' pʌchi woli bʌ ti woch'an ti' buts'il c'ajc. Pero ma'anic mi' ñajiyel c cha'an chuqui ts'ijbubil.

⁸⁴¿Jayp'ejl to q'uin mic jalijel ti pañimil? A winicon. ¿Baqui ora mi caj a wʌc'ob ti toj mulil jini mu' bʌ i tic'lañoñob?

⁸⁵Chan mi' melob i bʌ mu' bʌ i ñusañob a mandar. Yomob i chucon ti yac yilal.

⁸⁶Xuc'ul pejtel a mandar. Winicob mi' lon jop'ob c mul. Coltañon.

⁸⁷Colel tsi' yʌlʌ i jisayoñob pero ma'anic tsaj cʌyʌ c jac' a t'an.

⁸⁸Ch'ejlesʌbeñon c pusic'al, come c'ux wola' wubiñon. Che' jini mi caj c chʌn jac'beñet a t'an.

⁸⁹Ti pejtelel ora tsʌts xuc'ul a t'an ti panchan.

⁹⁰C Yum, mi caj a pʌsbeñob i xuc'tilel a pusic'al calobilob ti lajm ti lajm. A wa'chocobal jini pañimil c'ʌlʌl wʌle.

⁹¹Anto i ye'tel. Mi' jac' a t'an. Pejtelel melbil tac bʌ mi' yumañet.

⁹²Machic tsac taja c tijicñʌyel ti a t'an, Tsa' jiliyon cha'an cabʌl c wocol.

⁹³Ti pejtelel ora ma'anic mi caj i ñajʌyel tic pusic'al a t'an. Chʌn cuxulon to come tsa' ch'ejlesayon ti a t'an.

⁹⁴A cha'añonix, coltañon come tsa cʌc'ʌ c bʌ Cha'an mic mel chuqui awom.

⁹⁵Jini jontolo' bʌ woli' chijtañoñob cha'an yomob i jisañon, Pero joñon wolic chʌn ac' tic wenta chuqui tsa' wʌlʌ.

⁹⁶Tsa'ix j q'uele ba' jaxʌl i mojonlel pejtel chuqui tac an ti pañimil, Pero ma'anic i p'isol a mandar.

⁹⁷Cabʌl mij c'uxbin a t'an. Mic chʌn ña'tan c'ʌlʌl mi' sʌc'an c'ʌlʌl mi' yic'an.

⁹⁸Ñumen an c na'tʌbal bajche' j contrajob, Come joñon mic chʌn ña'tan a mandar ti pejtelel ora.

⁹⁹Ñumen cabʌl mic ch'ʌmben isujm bajche' pejtel mu' bʌ i cʌntesañoñob, Come mi cotsan tic pusic'al jini tsa' bʌ a wʌlʌ.

¹⁰⁰Ts'ita jach mi' ch'ʌmbeñob isujm jini ñoxobix bʌ, Pero cabʌl mic ch'ʌmben isujm cha'an ti' jac'ol a t'an.

¹⁰¹Ma'anic tsac jac'ʌ c pʌyol ti mulil Cha'an com c jac'beñet a t'an.

¹⁰²Ma'anic tsaj cʌyʌ jini bij tsa bʌ a pʌsbeyon, Come cʌntesʌbilon a cha'an.

¹⁰³Tsajatax mi cubin a t'an. Ñumen tsaj bajche' chab.

¹⁰⁴Ya' tilem c ña'tʌbal cha'an jini tsa' bʌ a tsictesa. Jini cha'an mic ts'a'len pejtel chuqui tac mach isujmic.

¹⁰⁵Jini a t'an lajalʌch bajche' lámpara* cha'an coc. I sʌclelʌch c bijlel.

¹⁰⁶Tsa'ix cʌc'ʌ c t'an. Mi caj c jac'beñet, come toj ma' cha'len meloñel.

¹⁰⁷C'ax cabʌl woli cubin wocol. C Yum, cha' ch'ejlesʌbeñon c pusic'al yic'ot a t'an.

¹⁰⁸Ch'ʌmʌ c t'an che' bajche' a majtan che' mic subeñet wocolix a wʌlʌ ti pejtelel c pusic'al, c Yum. Cʌntesañon chuqui awom.

¹⁰⁹Bele q'uin bʌbʌq'uen mic chʌmel, Pero mach ñajʌyic tic pusic'al a t'an.

¹¹⁰Tsi' chajpayob yac jini jontolo' bʌ cha'an mi' chucoñob, Pero xuc'ulon ti a t'an.

¹¹¹Mach jilic tic pusic'al ti pejtelel ora jini tsa' bʌ a tsictesa. I tijicñʌyelʌch c pusic'al.

¹¹²Tsa'ix cʌc'ʌ c pusic'al cha'an mic jac'beñet a mandar ti pejtelel ora, c'ʌlʌl mic chʌmel.

¹¹³Mic ts'a'len jini cha'p'ejax bʌ i pusic'al, Pero c'ux mi cubin a t'an.

¹¹⁴C puts'ibet, c mʌctʌjibet. Xuc'ul c pusic'al cha'an a t'an mu' bʌ caj i ts'ʌctiyel.

¹¹⁵Jatetla mu' bʌ la' mel jontolil, tʌts'ʌ la' bʌ ba' añon Cha'an mi mejlel c jac'ben i mandar c Dios.

¹¹⁶C Yum, cʌntañon che' bajche' tsa' wʌlʌ cha'an cuxul mi cajñel. Wolic pijtañet. Mach a wʌc'on ti quisin.

¹¹⁷P'ʌtesañon cha'an xuc'ul mic chʌn ajñel, Cha'an mic jac' a mandar ti pejtelel ora.

¹¹⁸Ma' ts'a'len pejtel mu' bʌ i cʌyob a mandar. Mi' wʌlʌc lotiñob i bʌ che' mi' cha'leñob lot.

¹¹⁹Chocbilob a cha'an pejtel jini jontolo' bʌ ti pañimil Che' bajche' i sujl trigo. Jini cha'an mij c'uxbin a t'an.

¹²⁰Tsiltsilñayon come mic bʌc'ñañet. Mic bʌc'ñañet che' ma' cha'len meloñel.

¹²¹Tsa'ix c mele chuqui tac toj chuqui tac wen. Mach a wʌc'on ti' wenta jini mu' bʌ i tic'lañon.

¹²²Yom ma' ch'ʌmon ti a wenta cha'an ma' wʌq'ueñon c wenlel. Mach a wʌc'on ti' wenta mu' bʌ i chañ'esañob i bʌ.

¹²³Wolic lujb'an c pijtan j coltʌntel. Cujil mi caj i wersa ts'ʌctiyel a t'an.

¹²⁴A winicon, pʌsbeñon i yutslel a pusic'al. Cʌntesañon cha'an mic jac' a mandar che' bajche' ts'ijbubil.

¹²⁵A winicon, aq'ueñon c ch'ʌmben isujm a t'an Cha'an mic mel che' bajche' tsa' wʌlʌ.

¹²⁶C Yum i yorajlelix ma' cha'len meloñel, Come tsa'ix i ñusayob a ley.

¹²⁷Jini cha'an ñumen c'ux mi cubin a mandar bajche' oro. Isujm, ñumen c'ux mi cubin bajche' i t'ojol jax bʌ oro.

¹²⁸Jini cha'an mic sub toj pejtel a t'an. Mic ts'a'len pejtelel chuqui tac mach isujmic.

¹²⁹Uts'atax a t'an. Jini cha'an mic jac' ti pejtelel c pusic'al.

¹³⁰Che' mi' tsictesʌntel a t'an ma' wʌq'ueñon lojon c ch'ʌmben isujm. Ma' wʌq'uen i ña'tan pañimil jini uts bʌ i pusic'al.

¹³¹Wen cabʌl jax c wi'ñal Cha'an com cubin a mandar ti pejtelel c pusic'al.

¹³²Sutq'uin a bʌ ba' añon. Pʌsbeñon a wutslel, Come i tilelʌch che'ʌch ma' melbeñob mu' bʌ i c'uxbiñob a c'aba'.

¹³³Toj'esañon majlel cha'an a t'an. Mach ma' wʌc'on ti yajlel ti mulil.

¹³⁴Loc'sañon ti' p'ʌtʌlel jini mu' bʌ i tic'lañon, Cha'an mic jac'beñet che' bajche' tsa' cʌntesayon.

¹³⁵Yom tijicña a wut ma' q'uelon. Cʌntesañon ti pejtelel a mandar.

¹³⁶Woli ti wen loq'uel i ya'lel c wut cha'an i mul winicob x'ixicob Come ma'anic mi' jac'ob a t'an.

¹³⁷Tojet c Yum, toj ma' cha'len meloñel.

¹³⁸Mach jelchojquic a t'an tsa' bʌ a wʌlʌ. Wen xuc'ul.

¹³⁹Jisʌbilon cha'an c bʌxlel ti a we'tel, Come tsa' ñajʌyi a t'an ti' pusic'al j contrajob.

¹⁴⁰Tsa' wʌc'ʌ ti tsictiyel i sʌclel a t'an. A winicon, mij c'uxbin a t'an.

¹⁴¹Wolij q'uejlel ti ch'o'ch'oc. Wolic ts'a'lentel. Pero mach ñajʌyic tic pusic'al a t'an.

¹⁴²Tojet ti pejtelel ora, isujm a cʌntesʌbal.

¹⁴³Chuculonix ti wocol yic'ot tsic pusic'al, Pero tijicña c pusic'al cha'an a mandar.

¹⁴⁴Toj ti pejtelel ora jini tsa' bʌ a wʌlʌ. Aq'ueñon c ch'ʌmben isujm cha'an cuxul mic chʌn ajñel.

¹⁴⁵Ti wocol t'an mij c'ajtibeñet, C Yum, jac'beñon. Mi caj c jac'beñet a mandar.

¹⁴⁶C'am mic pejcañet. Coltañon come mic jac'beñet a t'an.

¹⁴⁷Ti wen seb to mic pejcañet. Mic xuc'chocon c pusic'al ti a t'an mu' bʌ caj i ts'ʌctiyel.

¹⁴⁸Cañal c wut ti ac'ʌlel Cha'an mij c'ajtesan a t'an tic pusic'al.

¹⁴⁹Jac'beñon c t'an ti' yutslel a pusic'al. C Yum, cha' ch'ejlesʌbeñon c pusic'al yic'ot a t'an.

¹⁵⁰Lʌc'ʌl añob jini jontolo' bʌ tic t'ejl cha'an mi' tic'lañon. Ñajt añob ba' añet come ma'anic mi' jac'ob a mandar.

¹⁵¹Pero jatet c Yum, lʌc'ʌlet. Pejtel a mandar puro isujm.

¹⁵²C'ʌlʌl ti wajali ña'tʌbil c cha'an jini tsa' bʌ a wʌlʌ. Cujil tsa' wʌc'ʌ a t'an cha'an mi' yajñel ti pejtelel ora.

¹⁵³Q'uele c wocol, loc'sʌbeñon. Come ma'anic mi' ñajʌyel tic pusic'al a t'an.

¹⁵⁴Tsictesañon ti toj, coltañon. Cha' ch'ejlesʌbeñon c pusic'al yic'ot a t'an.

¹⁵⁵Mach i tajayobic i coltʌntel jini jontolo' bʌ, Come mach yomobic i jac'ob a mandar.

¹⁵⁶C Yum, wen awujil p'untaya. Cha' ch'ejlesañon yic'ot a t'an.

¹⁵⁷Cabʌlob j contrajob woli bʌ i tic'lañon. Pero ma'anic tsac wis cʌyʌ jini tsa' bʌ a wʌlʌ.

¹⁵⁸Mich' mij q'uel jini xñusa t'añob. Mic ts'a'leñob, Come ma'anic mi' jac'ob a t'an.

¹⁵⁹Q'ueleyon come c'ux mi cubin a t'an. C Yum, cha' ch'ejlesañon yic'ot a wutslel.

¹⁶⁰Junsujm jach a t'an ti pejtelel. Toj ti pejtelel ora pejtel mu' bʌ a sub.

¹⁶¹Anquese ma'anic c mul mi' tic'lañoñob yumʌlob, Pero mij q'uel ti ñuc a t'an.

¹⁶²Wen tijicñayon cha'an a t'an, Che' bajche' jini mu' bʌ i taj cabʌl chubʌ'añʌl.

¹⁶³Mic ts'a'len lot, Pero mij c'uxbin a t'an.

¹⁶⁴Ti jujumuc' mic sub a ñuclel ti jujump'ejl q'uin, Come toj chuqui ma' wʌl.

¹⁶⁵Cabʌl i ñʌch'tilel i pusic'al jini mu' bʌ i c'uxbiñob a t'an. Ma'anic mi' jats'ob i yoc che' mi' cha'leñob xʌmbal majlel.

¹⁶⁶Wolic pijtan j coltʌntel ti a tojlel, c Yum. Mic jac'beñet a mandar.

¹⁶⁷Mic jac'beñet a ley ti jump'ejl c pusic'al, Mic wen c'uxbin.

¹⁶⁸Mic jac'beñet a t'an yic'ot a cʌntesa Come wen q'uelbil a cha'an pejtel chuqui mic mel.

¹⁶⁹C Yum, ubin chuqui wolij c'ajtibeñet ti wocol t'an. Aq'ueñon c ch'ʌmben isujm chuqui a wom.

¹⁷⁰La' c'otic ba' añet jini woli bʌ j c'ajtibeñet. Loc'sañon ti wocol che' bajche' tsa' wʌlʌ.

¹⁷¹Mi caj c sub a ñuclel, Come wola' cʌntesañon ti a ts'ijbujel.

¹⁷²La' j c'ʌyibeñet a t'an, Come toj pejtel a mandar.

¹⁷³Yom lʌc'ʌl ma' wa'tʌl cha'an ma' coltañon Come tsac ñopo c mel che' bajche' tsa' cʌntesayon.

¹⁷⁴C Yum, ti pejtelel c pusic'al, com ma' coltañon. Mic tijicñesan c pusic'al ti a t'an.

¹⁷⁵La' to ajnicon ti pañimil cha'an mic sub a ñuclel. La' c taj j coltʌntel ti a t'an.

¹⁷⁶Tsa' sajtiyon bajche' tiñʌme' mu' bʌ i cʌy i yum. Sajcan a winic come ma'anic tsa' ñajʌyi tic pusic'al a mandar.