Read Chol Salmos 135 Bible Online

Salmos 135 - Chol bible

Salmos 135

¹Subula i ñuclel lac Yum. I winiquet bʌ la, c'uxbibenla i c'aba' lac Yum.

²C'uxbinla jatetla mu' bʌ la' c'otel ti wa'tʌl ti' yotot lac Yum.

³Subula i ñuclel Dios, come uts'at lac Yum. C'ʌyibenla i c'aba', come i t'ojol jax.

⁴Come lac Yum tsi' yajca Jacob cha'an che' yom i pusic'al, Tsi' yajca israelob cha'an mi' yochelob ti' cha'an bʌ.

⁵Cujil wen ñuc lac Yum. Cujil ma'anic ñuc bʌ che' bajche' lac Yum ti' tojlel pejtel jini diosob.

⁶Lac Yum mi' mel pejtel chuqui yom i pusic'al Ti panchan yic'ot ti pañimil, ti ñajb yic'ot ti aban.

⁷Lac Yum mi' ch'uy letsel tocal c'ʌlʌl ti junwejl pañimil. Mi' choc tilel chajc yic'ot ja'al. Mi' loc'san ic' ti' yotlel ba' lotol i ye'tijib.

⁸Tsi' jisa jini ascuñʌl bʌ winicob año' bʌ ti Egipto, Yic'ot ñaxan bʌ i yal alʌc'ʌl.

⁹Tsi' pʌsʌ i yejtal tac i p'ʌtʌlel yic'ot bʌbʌq'uen bʌ i melbal ya' ti Egipto, Cha'an mi' contrajin Faraón yic'ot pejtel i winicob.

¹⁰Tsi' jisa cabʌl tejclumob ti mojt ti mojt yic'ot i reyob cabʌl bʌ i p'ʌtʌlel,

¹¹Sehón i rey amorreojob yic'ot Og jini rey am bʌ ti Basán, Yic'ot pejtel jini reyob año' bʌ ti Canaán.

¹²Lac Yum tsi' yʌq'ueyob i lum israelob cha'an mi' yochelob ti' yum ti pejtelel ora.

¹³C Yum, mach jilic a c'aba ti pejtelel ora. C Yum, mi caj i sujbel a ñuclel ti' tojlel calobilob lojon ti lajm ti lajm.

¹⁴Come lac Yum mi caj i melob ti toj i cha'año' bʌ. Mi caj i p'untan jini mu' bʌ i tsajcañob.

¹⁵I diosob jini sajtemo' bʌ melbilob jach ti sʌsʌc taq'uin yic'ot oro, I melbal tac i c'ʌb winicob.

¹⁶Anquese an i yej, mach yujilic t'an. Anquese an i wut, ma'anic chuqui mi' q'uel.

¹⁷Anquese an i chiquin, ma'anic mi' yubin t'an. Ma'anic mi' jap ic'.

¹⁸Lajalob jini winicob mu' bʌ i melob. Pejtelel mu' bʌ i ñopob junlajalob yic'ot.

¹⁹Israelob, ch'ujutesanla lac Yum. Motomajob, i p'olbalet bʌ la Aarón, ch'ujutesanla lac Yum.

²⁰I yalobilet bʌ la Leví ch'ujutesanla lac Yum. Pejteletla mu' bʌ la' bʌc'ñan lac Yum, ch'ujutesanla lac Yum.

²¹La' ch'ujultesʌntic lac Yum wʌ' ti Sion Come wʌ' chumul ti Jerusalén. ¡Aleluya!