Read Chol Salmos 139 Bible Online

Salmos 139 - Chol bible

Salmos 139

¹C Yum, tsa' wen q'ueleyon. Cʌmbiloñʌch a cha'an.

²Awujil che' mic buchtʌl yic'ot che' mic wa'tʌl. Ma' lu' cʌmbeñon c pusic'al che' ñajt añon.

³Ma' q'uelon che' mic majlel ti bij yic'ot che' mij c'aj co tic wʌyib. Cʌñʌl a cha'an pejtel c melbal.

⁴Che' max to loquemic c t'an ti quej, a wujilix chuqui mi caj c sub.

⁵Joyolon a cha'an. Ma' tic'on, ma' coltañon. Cʌntʌbilon ti a p'ʌtʌlel.

⁶Ma'anic i p'isol j coltʌntel. Mach mejlic c laj cʌn. Wen ñuc, mach mejlic c ch'ʌmben isujm.

⁷¿Mejl ba c majlel ba' mach i tajayonic a wEspíritu? ¿Mejl ba c puts'tañet?

⁸Mi com letsel majlel ti panchan, ya' añet. Mi com wʌyel ti' yajñib chʌmeño' bʌ, ya' añet ja'el.

⁹Mi com wejlel majlel ti ñajtʌl ba' mi' pasel q'uin Cha'an mic chumtʌl ya' ti junwejl ñajb

¹⁰Mi caj a toj'esañon majlel ya'i. Mi caj a chucon ti p'ʌtʌl bʌ a c'ʌb.

¹¹Mi tsac lon alʌ: Tsa'ix ochiyon ti ic'yoch'an bʌ pañimil, Mach i q'ueleyonic ti ac'ʌlel, cho'on, c lotʌch, come ma' q'uelon ti ac'ʌlel.

¹²Jini ic'yoch'an bʌ pañimil ma'anic mi' mʌctʌbeñet a wut. Lajal ma' q'uel ac'ʌlel che' bajche' q'uiñil. Lajal mi' c'otel a wut ti ic'yoch'an bʌ che' bajche' ti q'uiñil.

¹³Pejtel chuqui tac an tic malil a melbalʌch. Tsa' meleyon che' añon to ti' ñʌc' c ña'.

¹⁴Mic sub a ñuclel come bʌc'ñʌbilet. Uts'atax tsa' meleyon. Uts'atax a melbal. Cʌñʌlʌch c cha'an iliyi.

¹⁵Mach mʌcbilic c bʌquel ti a wut, che' cʌntʌbilon i cha'an c ña'. Cha'an ti cabʌl a ña'tʌbal tsa' techeyon ti colel ti mucul jach.

¹⁶Tsa' wʌn ña'ta bajche' an quejtal che' maxto añonic. Ts'ijbubilix ti a jun jayp'ejl to tsic mi caj cajñel ti pañimil.

¹⁷Wen uts'atax bajche' ma' ña'tañon, c Dios. Mach tsicbilic jayyajl ma' ña'tañon ti jujump'ejl q'uin.

¹⁸Mi tsac ñopo c tsic ñumen on ti tsic bajche' jini ji'. Che' mic ch'ojyel ti wʌyel, añon a wic'ot.

¹⁹Muq'uic a tsʌñsan jini jontolo' bʌ, Mux i puts'elob tic tojlel jini yujilo' bʌ tsʌnsa.

²⁰Jini mu' bʌ i contrajiñet ti maña jax bʌ t'an, Mi' lon chañ'esan i bʌ.

²¹¿Mach ba yomic mic ts'a'len jini mu' bʌ i ts'a'leñet c Yum? ¿Mach ba ch'ijiyemic c pusic'al che' mi' ñusañet?

²²Mic ts'a'len ti pejtelel c pusic'al. J contrajobʌch jini a contrajob.

²³Tsajiñon, Dios. Q'uelbeñon c pusic'al. Cʌmbeñon c pensar.

²⁴Q'uele mi an c sajtemal. Pʌyʌyon majlel ti' bijlel j cuxtʌlel mach bʌ anic mi' jilel.