Read Chol Salmos 144 Bible Online

Salmos 144 - Chol bible

Salmos 144

¹La' ch'ujutesʌntic lac Yum. Jiñʌch Xajlel yilal ba' mic taj i xuc'tilel c pusic'al. Mi' tojesʌbeñon j c'ʌb ti guerra. Mi' cʌntesʌbeñon i yal j c'ʌb cha'an mi' mʌjlel c cha'an.

²Jiñʌch mu' bʌ i p'untañon. Jiñʌch ts'ajquibil bʌ cotot yilal ba' mic cha'len puts'el. Jiñʌch chan bʌ ts'ajc ba' mi cochel. Caj coltayajʌch. C mʌctʌjibʌch ba' mic taj j coltʌntel. Mi' ñijcʌbeñob i pusic'al winicob x'ixicob cha'an mi' yumañoñob.

³Winicon lojon, c Yum. ¿Chuqui que'tel lojon cha'an ma' ña'tañon lojon? ¿Chuqui i ye'tel i yalobil winic cha'an ma' cʌntan?

⁴Ora jach mi' ñumelob ti pañimil winicob che' bajche' mi' ñumel ic'. Lajalob bajche' axñal mu' bʌ i ñumel.

⁵C Yum, la' jubic panchan. La' ti pañimil. Jats'ʌ jini wits tac cha'an mi' loq'uel i buts'il.

⁶Choco tilel chajc che' bajche' i te'el jalʌjb Cha'an mi' pam pujquelob j contrajob. Ajñesañob.

⁷Pʌsʌ a p'ʌtʌlel ya' ti chan. Coloyon. Chucuyon loq'uel ti colem ja'. La' loq'uicon ti' p'ʌtʌlel jini mach bʌ cʌmbilobic c cha'an,

⁸Mu' bʌ i cha'leñob lot. Cha'p'ejlob i pusic'al. Leco i melbalob.

⁹Dios, mi caj j c'ʌyibeñet tsiji' bʌ c'ay. Mi caj j c'ʌyibeñet salmo tac yic'ot arpa am bʌ lujunt'ujm i ch'ajñal.

¹⁰Ma' wʌq'ueñob i p'ʌtʌlel reyob cha'an mi' t'uchtañob i contrajob. Tsa' pʌyʌ loq'uel a winic David ti wocol.

¹¹Coloyon, pʌyʌyon loq'uel ti' c'ʌb jini mach bʌ cʌmbilobic c cha'an, mu' bʌ i cha'leñob lot. Cha'p'ejlob i pusic'al. Leco i melbalob.

¹²Che' añet tic tojlel lojon c Yum, Lajalob ch'iton bʌ calobilob lojon che' bajche' pʌc'ʌbʌl uts'at bʌ mi' colel. Lajalob jini xch'oc bʌ calobilob che' bajche' i t'ojol jax bʌ i yoyel i yotot rey.

¹³But'ul cotot lojon ti' bʌl lojon c ñʌc' ti chajp ti chajp. Mi' p'ojlel tiñʌme' c cha'an lojon ti bajc' ti bajc' ya' ba' cʌntʌbil ti jamil.

¹⁴Cabʌl i cuch tat wacax. Ma'anic chuqui leco ti calle tac ba' chumulon lojon. Ma'anic wʌlwʌl t'an mi uq'uel.

¹⁵Tijicña mi' yajñelob jini winicob x'ixicob. Tijicñayob come i cha'añob Dios, lac Yum.