Read Chol Salmos 17 Bible Online

Salmos 17 - Chol bible

Salmos 17

¹C Yum, yom ma' wubin chuqui toj. Jac'beñon coñel. Jac'beñon coración come mach cujilic lot.

²Meleyon ya' ti chan. La' tsictiyic c tojel come tojet.

³Tsa'ix a wilʌbeyon c pusic'al. Tsa' wʌc'ʌyon ti prueba ti ac'ʌlel. Tsa' q'uele ma'anic jontolil tic pusic'al. Ma'anic jontol bʌ c t'an.

⁴Tsac jac'beyet a t'an. Ma'anic tsac xʌñʌ majlel i bijlel jini jontolo' bʌ.

⁵Tsac tsajcayet majlel ba' tsa' pʌsbeyon. Ma'anic tsa' jʌjli coc ti a bijlel.

⁶Tsa'ix c pejcayet, come mi caj a jac'beñon, c Dios. Yom ma' bej tilel cha'an ma' wen ubibeñon c t'an.

⁷Pʌsʌ jini ñuc tac bʌ a wutslel Jatet mu' bʌ a coltan jini mu' bʌ i ñopet ti' tojlel i contra.

⁸Yom ma' cʌntañon che' bajche' i santojlel a wut. Mosoyon ti a p'ʌtʌlel che' bajche' mi' luts' i yal i ña'al mut,

⁹Ame i jisañon jini jontolo' bʌ, Ame' i jomojtañon cha'an mi' tsʌnsañon.

¹⁰Ma'anic mi' p'untañob i pi'ʌlob. Mi' chañ'esañob i bʌ ti' t'an.

¹¹Baqui jach mic majlel joyolon i cha'añob. Yomob i chocon jubel ti lum.

¹²Lajalobʌch bajche' bajlum yom bʌ i c'ux we'elʌl. Lajalobʌch bajche' alʌ bajlum woli bʌ i chijtan i bʌl i ñʌc'.

¹³C Yum, yom ma' wa'tʌl, ch'ejl yom ma' pʌs a bʌ ti' contra. Wit'choco jini jontol bʌ. Ac'ʌyon ti colel ti' p'ʌtʌlel jini jontolo' bʌ ti pañimil.

¹⁴Woli' tajob i chubʌ'an ti pañimil. On wola' wʌq'ueñob i chubʌ'an ti pañimil. Wen chumulob i yalobilob. Mi' yʌq'ueñob i yalobilob i colobal i chubʌ'an.

¹⁵Jixcu joñon, mi caj j q'uel a wut cha'an tsa' wʌq'ueyon a tojel. Tijicña mi caj cubin che' mic cha' ch'ojyel, come mi caj j q'uel a wut.