Read Chol Salmos 18 Bible Online

Salmos 18 - Chol bible

Salmos 18

¹C Yum, mic wen c'uxbiñet. Wen p'ʌtʌlet.

²Lajalʌch lac Yum bajche' ch'entun ba' mi lac puts'el. Jiñʌch ts'ajcʌbil bʌ cotot. Jiñʌch caj Coltaya. C Diosʌch. Lajalʌch bajche' wen xuc'ul bʌ xajlel. Jiñʌch c mʌctʌjib, jini p'ʌtʌl bʌ mu' bʌ i coltañon. Lajalʌch lac Yum bajche' chan bʌ ts'ajc ba' mi cochel.

³Mic pejcan lac Yum come uts'atax. Mi' coltañon ti' tojlel j contrajob.

⁴Che' colel c chʌmel ñup'ulon yubil. Yom i jisañon jini c'ax bʌbʌq'uen bʌ che' bajche' colem ja'.

⁵Che' colel c chʌmel tsa' cʌn chujquiyon yilal, Jini yom bʌ i jisañon tsi' tajayon.

⁶Che' añon ti wocol tsac pejca c Yum. Tsac cha'le oñel ti' tojlel Dios. Tsi' yubibeñon c t'an ya' ti panchan.

⁷Che' jini tsi' ñijca i bʌ jini lum, tsa' tili yujquel lum, Jini wits tac tsa' bujchi. Tsi' ñijca i bʌ cha'an i mich'ajel Dios.

⁸Jusiña i ñi' Dios yilal cha'an i mich'ajel. C'ajc woli bʌ ti lejmel tsa' loq'ui ti' yej yilal, Tsi' tsuc'u xutunte'.

⁹Lac Yum tsi' ju'sa tilel tocal, tsi' pʌsʌ i p'ʌtʌlel. Wen i'ic' ya' ti yebal i yoc.

¹⁰Tsa' wejli tilel yic'ot querubín, Tsa' wejli tilel ti ic'.

¹¹Joyol lac Yum ba' wen pim tocal. Wen i'ic' jax, wen pim jini tocal cuchul bʌ i cha'an ja'al.

¹²Jini chajc tsi' yʌc'ʌ ti tsictiyel i sʌclel lac Yum ba' pim tocal. Tsa' yajli tuñija' yic'ot abʌc woli bʌ ti lejmel.

¹³Lac Yum tsi' yʌq'ue i t'an chajc ya' ti panchan, Jini C'ax Ñuc Bʌ tsi' yʌc'ʌ i t'an. Tsa' yajli tuñija' yic'ot abʌc woli bʌ ti lejmel.

¹⁴Tsi' choco tac tilel chajc, Tsi' yajñesa j contrajob. Cabʌl tsa' tojmi chajc, tsi' pucuyob.

¹⁵Che' jini tsa' tsictiyi i bijlel tac ja'. Tsa' tsictiyi i buchlib tac wits. Che' bʌ tsi' cha'le tic'oñel lac Yum, tsilicña pañimil.

¹⁶Tsa' loq'ui lac Yum ti panchan. Tsi' chucuyon, tsi' loc'oyon ti colem ja' yilal.

¹⁷Tsi' chucuyon loq'uel ti' p'ʌtʌlel j contra, Ti' tojlel jini mu' bʌ i ts'a'leñon. Cabʌl i p'ʌtʌlel j contrajob ñumen bajche' c cha'an bʌ.

¹⁸Tsa' tiliyob i contrajiñon ti' yorajlel c wocol, Pero tsi' xuc'chocoyon lac Yum.

¹⁹Tsi' yʌc'ʌyon ti colel cha'an mi cajñel ti xuc'ul. Tsi' pʌyʌyon loq'uel ti wocol, Come c'ux mi' yubiñon.

²⁰Lac Yum tsi' yʌq'ueyon c chobejtʌbal cha'an tojon, cha'an sʌc c melbal.

²¹Tsa'ix c tsajca majlel i bijlel lac Yum. Ma'anic tsac cha'le mulil, ma'anic tsaj cʌyʌ Dios.

²²Tsa'ix cʌc'ʌ tic pusic'al pejtel i meloñel. Ma'anic tsac juch'teq'ue i mandar.

²³Tsa' ajniyon ti toj ti' tojlel lac Yum. Tsaj cʌnta c bʌ cha'an ma'anic mic cha'len mulil.

²⁴Jini cha'an lac Yum tsi' yʌq'ueyon c chobejtʌbal cha'an tojon, Cha'an toj c melbal ti' wut Dios.

²⁵Ma' pʌsben a wutslel jini uts'at bʌ. Ma' pʌsben i xuc'tilel a pusic'al jini xuc'ul bʌ i pusic'al.

²⁶Jatet wola' wʌq'uen chuqui uts'at jini sʌc bʌ i pusic'al. Pero mich' ma' pʌsben a bʌ jini jontol bʌ.

²⁷Ma' coltan jini tic'lʌbilo' bʌ. Ma' peq'uesan jini chan bʌ mi' mel i bʌ.

²⁸C Yum Dios, ma' wʌq'ueñon j c'ʌc'al che' añon ti ic'ch'ipan bʌ pañimil, Come jatet ma' wʌq'ueñon i ch'ejlel c pusic'al yic'ot c tijicñʌyel.

²⁹Cha'an ti a p'ʌtʌlel mi' mʌjlel c cha'an anquese cabʌl j contrajob. Cha'an ti jatet, c Dios, mi mejlel c tijp'el ñumel ti junwejl ts'ajc.

³⁰Ts'ʌcʌlʌch chuqui ma' mel. Isujmʌch i t'an lac Yum. I mʌctʌjibʌch pejtel mu' bʌ i yʌc'ob i bʌ ti' wenta.

³¹¿Majqui Dios? ¿Mach ba jinic lac Yum? ¿Am ba yambʌ xuc'ul bʌ bajche' Dios?

³²Jiñʌch Dios mu' bʌ i yʌq'ueñon c p'ʌtʌlel. Mi' toj'esañon majlel tic bijlel.

³³Sejb mi' mel coc che' bajche' i yoc me'. Dios mi' cʌntañon ba' bʌbʌq'uen mic yajlel.

³⁴Mi' cʌntesañon cha'an ch'ejl mic cha'len guerra, Cha'an mic sʌts' p'ʌtʌl bʌ jalʌjb.

³⁵C Yum, jatet tsa' coltayon. C mʌctʌjibet. Ma' chucon ti a c'ʌb cha'an ma'anic mic yajlel. Ma' ñuq'uesañon ti' yutslel a pusic'al.

³⁶Tsa' chajpʌbeyon i yajñib coc. Tsa' p'ʌtesa coc.

³⁷Tsa cajñesa j contrajob, tsac tajayob. Ma'anic tsa' sujtiyon jinto tsac laj jisayob.

³⁸Tsac lowoyob. Ma'anic tsa' chʌn mejliyob ti tejchel. Tsa' yajliyob ti' t'ejl coc.

³⁹Tsa' wʌq'ueyon c p'ʌtʌlel ti guerra. Tsa' jats'ʌ jini tsa' bʌ tejchiyob tij contra.

⁴⁰Jatet tsa' wajñesa j contrajob. Tsac jisayob tsa' bʌ i ts'a'leyon.

⁴¹Tsi' lon cha'leyob oñel. Ma'anic majch tsi' coltayob. Tsi' pejcayob lac Yum, pero ma'anic tsi' jac'beyob.

⁴²Tsac bic'tesa j contrajob che' bajche' ts'ubejn mu' bʌ i wujtan letsel ic'. Tsac t'uchtayob che' bajche' i bibi'lel calle.

⁴³Tsa'ix a coltayon loq'uel ti' tojlel jini woliyo' bʌ ti leto. Tsa'ix a wotsayon ti yumʌl ti jujumpejt colem tejclum. Winicob x'ixicob mach bʌ j cʌñʌyobic ti yambʌ ora wolix i melob que'tel.

⁴⁴Che' mi' yubiñob c t'an, ti ora mi caj i jac'beñon. Jini ñajt bʌ ch'oyolob mi caj i yumañon.

⁴⁵Jini ñajt bʌ ch'oyolob mi' cajelob ti bʌq'uen. Tsiltsilña mi' loq'uelob ti tejclum ba' joy ts'ajquibil.

⁴⁶Cuxul lac Yum. Wocolix i yʌlʌ come jiñʌch xuc'ul bʌ xajlel yilal. La' sujbic i ñuclel Dios mu' bʌ i coltañon.

⁴⁷Diosʌch mu' bʌ i q'uextʌbeñob i mul j contrajob. Mi' ju'sʌbeñob i pusic'al cha'an mi' jac'beñoñob.

⁴⁸Jatet mu' bʌ a coltañon loq'uel ti' p'ʌtʌlel j contrajob, Melel ma' loc'sañon ti' tojlelob mu' bʌ i tejchelob tij contra. Tsa' pʌyʌyon loq'uel ti' p'ʌtʌlel jini jontolo' bʌ.

⁴⁹C Yum, mux c sub a ñuclel ya' ti jujumpejt colem tejclum tac, Mi caj j c'ʌyin i ñuclel a c'aba'.

⁵⁰Cha'an ti jatet mi mʌjlel c cha'an, Tsa' wa'chocoyon ti rey. Ma' pʌsbeñon a wutslel, joñon quic'ot c p'olbalob ti pejtelel ora.