Read Chol Salmos 19 Bible Online

Salmos 19 - Chol bible

Salmos 19

¹Jini panchan mi' pʌs i ñuclel Dios, Mi' tsictesan i melbal i c'ʌb.

²Jini pañimil mi' cha'len t'an yilal ti jujump'ejl q'uin, Ti jujump'ejl ac'ʌlel mi' pʌs a ña'tʌbal.

³Ma'anic chuqui mi' yʌl, ma'anic i t'an. Ma'anic majch mi' yubiben i t'an.

⁴Ti pejtelel pañimil woli' pujquel majlel chuqui mi' pʌs. Woli' pujquel majlel chuqui mi' sub c'ʌlʌl ti' junwejl pañimil. Dios tsi' wa'chocobe i yajñib q'uin ya' ti panchan.

⁵Lajal jini q'uin che' bajche' winic tsa' bʌ ujti ti ñujpuñel, woli bʌ ti loq'uel ti' wʌyibʌl. Tijicña jini q'uin yilal bajche' p'ʌtʌl bʌ winic mu' bʌ i cha'len wersa ajñel.

⁶Mi' pasel q'uin ti' junwejl panchan, Mi' ñumel c'ʌlʌl ti yambʌ junwejl panchan. Ma'anic majch mi mejlel i puts'tan i ticwʌlel.

⁷Ma'anic i sajtemal i cʌntesʌbal lac Yum. Mi' p'ʌtesʌbeñonla lac pusic'al. Isujmʌch i t'an lac Yum, Mi' cʌntesan jini mach bʌ anic i pusic'al.

⁸Tojʌch i cʌntesa lac Yum. Mi' yʌq'ueñonla i tijicñʌyel lac pusic'al. Tsiquil i sujmlel i mandar lac Yum. Mi' yʌq'ueñonla lac ch'ʌmben isujm.

⁹Sʌcʌch i t'an lac Yum. Mi' yajñel ti pejtelel ora, junlajal toj.

¹⁰Yom ñumen ma' mulan i t'an lac Yum bajche' oro, Ñumen tsaj bajche' i ya'lel chab chʌyʌcña bʌ mi' jubel.

¹¹Mic taj j cʌntesʌntel ti a t'an come a winicon. An cabʌl c chobejtʌbal ti' jac'ol a t'an.

¹²¿Majqui mi mejlel i cʌn pejtel i sajtemal? Ñusʌbeñon c sajtemal mach bʌ cʌmbilic c cha'an.

¹³Tiq'uiyon ame mic cha'len mulil cha'an i tsʌtslel c pusic'al. Mach yomic mic yuman mulil. Che' jini toj mi caj cajñel. Ma'anic c mul ti' tojlel ñuc bʌ a mandar.

¹⁴Q'uele ti uts'at jini t'an woli bʌ c subeñet, Yic'ot jini woli bʌ c ña'tan tic pusic'al. C Yum, p'ʌtʌl bʌ xajlelet c cha'an, caj Coltayajet.