Read Chol Salmos 20 Bible Online

Salmos 20 - Chol bible

Salmos 20

¹La' i ñʌch'tʌbeñet lac Yum che' ti' yorajlel wocol, La' i cʌntañet i Dios Jacob.

²La' i chocbeñet tilel a coltʌntel loq'uem bʌ ti Ch'ujul* bʌ Ajñibʌl ya' ti Sion.

³La' i ña'tan Dios pejtel i majtan tac mu' bʌ a wʌq'uen. La' i q'uel ti uts'at jini pulbil bʌ i majtan mu' bʌ a wʌq'uen.

⁴La' i yʌq'ueñet Dios chuqui yom a pusic'al. La' i ts'ʌctesan pejtel woli bʌ a ña'tan a mel.

⁵La' la cubin tijicña cha'an tsa'ix mʌjli a cha'an. La' tsictiyic lac bandera ti pañimil. Tsictesan cha'an i ñuclel Dios. La' i jac'beñet lac Yum ti pejtelel chuqui ma' c'ajtiben.

⁶Cujilix coltʌbil ti lac Yum jini rey yajcʌbil bʌ i cha'an. Ya' ti ch'ujul bʌ panchan mi' jac'ben. Mi' coltan ti ñuc bʌ i p'ʌtʌlel cha'an mi' mʌjlel i cha'an.

⁷Lamital mi' lon ña'tañob an i coltʌntel ti carreta tac yic'ot caballo, Pero joñonla mi lac ña'tan coltʌbilonla cha'an ti' c'aba' lac Yum Dios.

⁸Yaño' bʌ mi' c'uñ'añob, mi' yajlelob. Joñonla mi lac ch'ojyel, mi lac wa'tʌl.

⁹C Yum, coltan jini rey cha'an mi' mʌjlel i cha'an. Jac'beñon lojon che' mic pejcañet lojon.