Read Chol Salmos 22 Bible Online

Salmos 22 - Chol bible

Salmos 22

¹C Dios, c Dios, ¿chucoch tsa' cʌyʌyon? ¿Chucoch ñajt añet? ¿Chucoch ma'anic ma' tilel a coltañon? Ma'anic ma' wubiñon che' ajacñayon.

²C Dios, c'am mic pejcañet ti q'uiñil yic'ot ti ac'ʌlel, Ma'anic wola' jac'beñon. Mach ñʌch'ʌlic c pusic'al.

³Ch'ujulet ya' ba' buchulet ti a yumʌntel. Mi' subob a ñuclel jini israelob.

⁴C ñojte'el lojon tsi' ñopoyetob. Tsi' ñopoyetob. Tsa' coltayob loq'uel ti wocol.

⁵C'am tsi' pejcayetob. Tsa' coltayob loq'uel ti wocol. Tsi' ñopoyetob. Ma'anic tsa' ñusayob.

⁶Pero t'uchtʌbilon che' bajche' motso'. Mach winiconix yilal. Wajlebilon cha'an winicob x'ixicob. Mi' ts'a'leñoñob.

⁷Pejtel mu' bʌ i q'uelon mi' tse'tañon. Mi' wajleñon, mi' jʌmts'un i jol.

⁸Mi' lon alob: Tsi' ñopo lac Yum. La' i coltan, la' i col loq'uel ti wocol mi c'ux mi' yubin, che'ob.

⁹Jatet tsa' wʌq'ueyon j q'uel pañimil che' cʌntʌbilon to cha'an c ña'. Jatet tsa' cʌntayon ya' ti' tajn c ña'.

¹⁰Tsa' lotoyon che' bʌ tsa quila pañimil. C Dioset c'ʌlʌl che' cʌntʌbilon to tic ña'.

¹¹Mach ma' tʌts' a bʌ tic tojlel Come woliyon ti wocol. Ma'anic majch mi' coltañon.

¹²Woli' joyoñob cabʌl bʌbʌq'uen bʌ j contrajob, lajal bajche' tat wacax ch'oyol bʌ ti Basán.

¹³Yomob i jisañon che' bajche' bajlum mu' bʌ i cawbeñon i yej, Che' bajche' wen wi'ña bʌ bajlum woli bʌ ti c'am bʌ t'an.

¹⁴Woli' jilel c wersa che' bajche' ja' mu' bʌ i sajp'el. Pejtel c bʌquel tsa'ix c'ojqui loq'uel. Lajalʌch c pusic'al yubil bajche' nichim woli bʌ ti ulmʌl.

¹⁵Jilemix c p'ʌtʌlel che' bajche' i xejt'il p'ejt tsa' bʌ i wen tiqui. Mi' ñottʌl cac' cha'an tiquin c ti'. Wola' ñolchocoñon ti mucoñibʌl.

¹⁶Mi' joyoñob jontol bʌ winicob che' bajche' ts'i'. Tsi' jec'beyoñob j c'ʌb yic'ot coc.

¹⁷Mi mejlel c tsic pejtel c bʌquel. Mi' ch'ujch'uj q'ueloñob, mi' tse'tañoñob.

¹⁸Mi' pucob c pislel. Mi' cha'leñob alas cha'an mi' tsictiyel majqui mi' ch'ʌm c bujc.

¹⁹C Yum, mach yomic ma' cʌyon. Jatet, c P'ʌtʌlel, la' ti ora cha'an ma' coltañon.

²⁰Coltañon ba' ma'anic mi' tajon espada, Ame i tsʌnsañoñob jontol bʌ winicob.

²¹Coltañon loq'uel ti' yej bajlum, Ti' xulub jontol bʌ tat wacax.

²²Mi caj c subeñob c pi'ʌlob p'ʌtʌlet. Mi caj c sub a ñuclel ti' yojlil jini mu' bʌ i tempañob i bʌ.

²³Jatetla mu' bʌ la' bʌc'ñan lac Yum, subula i ñuclel. Pejtel i p'olbalet bʌ la Jacob, subula i ñuclel. Bʌc'ñanla lac Yum, pejtel israelet bʌ la.

²⁴Ma'anic tsi' ts'a'le c wocol. Ma'anic tsi' yʌ'leyon, ma'anic tsi' mʌyʌ i wut. Tsi' yubi lac Yum che' c'am tsac pejca.

²⁵Jini cha'an mic sub i ñuclel c Yum ti' tojlel jini mu' bʌ i tempañob i bʌ. Ya' ti' tojlel winicob mu' bʌ i ch'ujutesañob Dios mi caj c mel ti ts'ʌcʌl bajche' tsac wʌn subeyet.

²⁶Jini mu' bʌ i yubiñob wocol mi' cajelob ti we'el. Mi caj i ñaj'añob, Jini mu' bʌ i sajcañob lac Yum, mi caj i ch'ujutesañob. La' ajnicob ti pejtelel ora jini mu' bʌ i sajcañob.

²⁷Ti pejtelel pañimil mi caj i ña'tañob lac Yum. Mi caj i sutq'uiñob i bʌ ba'an lac Yum. Pejtel winicob ti mojt ti mojt Mi caj i ch'ujutesañob ti' tojel i wut.

²⁸Come i cha'añʌch lac Yum i yumʌntel. Mi' yumʌntel ti jujumpejt tejclum.

²⁹Pejtel winicob x'ixicob yujilo' bʌ chʌmel, jini wen chumulo' yic'ot jini p'ump'uño' bʌ ja'el, Mi caj i wersa ch'ujutesañob lac Yum.

³⁰Lac p'olbal mi caj i yʌc'ob i bʌ cha'an i ye'tel lac Yum. Mi caj i subeñob i yalobilob i t'an lac Yum c'ʌlʌl ti pejtelel ora.

³¹Mi caj i subob toj i melbal lac Yum. Jini max to bʌ anic tsi' yilayob pañimil mi caj i subentelob i melbal lac Yum.