Read Chol Salmos 24 Bible Online

Salmos 24 - Chol bible

Salmos 24

¹Jini pañimil i cha'añʌch lac Yum yic'ot pejtel i bʌl, yic'ot pejtel jini chumulo' bʌ ti pañimil.

²Come lac Yum tsi' yʌc'ʌ lum ti' t'ejl tac colem ñajb. Tsi' yʌc'ʌ ti' t'ejl tac jini colem ja'.

³¿Majqui mi' mejlel ti letsel ti jini bujtʌl ba' chumul lac Yum? ¿Majqui mi' mejlel ti wa'tʌl ya' ti ch'ujul bʌ i yajñib?

⁴Jiñʌch sʌc bʌ i melbal yic'ot sʌc bʌ i pusic'al, Jini mach bʌ anic mi' cha'len lot, Jini mach bʌ anic mi' q'uextan i t'an.

⁵Mi caj i yʌq'uentel i yutslel i t'an lac Yum. Mi caj i yʌq'uentel i tojel ch'oyol bʌ ti Dios mu' bʌ i coltan.

⁶Che'ʌch añob mu' bʌ i sajcañob lac Yum, Jini mu' bʌ i ch'ujutesañob.

⁷La' jajmic jini oñiyix bʌ i puertajlel tac Sion. Mi' caj ti ochel jini Rey am bʌ i ñuclel.

⁸¿Majqui jini Rey am bʌ i ñuclel? Jiñʌch lac Yum jini ch'ejl bʌ, jini p'ʌtʌl bʌ. Jiñʌch lac Yum, p'ʌtʌl bʌ ti guerra.

⁹La' jajmic jini oñiyix bʌ i ti' tac. Mux i yochel jini ñuc bʌ Rey.

¹⁰¿Majqui jini Rey am bʌ i ñuclel? Jiñʌch am bʌ i yumʌntel ti panchan yic'ot ti pañimil. Jiñʌch ñuc bʌ Rey.