Read Chol Salmos 25 Bible Online

Salmos 25 - Chol bible

Salmos 25

¹C Yum, mic ña'tañet ti chan.

²C Dios, tsa'ix c ñopoyet. Mach a wʌc'on ti quisin. Mach a wʌc'on ti' p'ʌtʌlel j contrajob ame mʌjlic i cha'añob.

³Isujm, ma'anic mi' cajel ti quisin jini mu' bʌ i pijtañet. Mi' cajelob ti quisin jini mu' bʌ i ñusañob a t'an.

⁴C Yum, pʌsbeñon bajche' a wom mic mel. Wen cʌntesañon ti a bijlel.

⁵Pʌyʌyon majlel ti' sujmlel a t'an, cʌntesañon. Come c Dioset, caj Coltayajet. Mic pijtañet ti pejtelel q'uin.

⁶C Yum, ña'tañon, p'untañon ti' yutslel a pusic'al, Che' bajche' tsa' p'unta winicob ti wajali. Junlajal uts a pusic'al ti pejtelel ora.

⁷Mach a melon cha'an c mul tsa' bʌ c mele che' ch'itoñon to. Mach a melon cha'an tsac ñusa a mandar. Yom ma' ña'tañon ti a c'uxbiya, ti' yutslel a pusic'al.

⁸Uts'atax lac Yum. Toj ja'el. Jini cha'an mi' pʌsbeñob toj bʌ bij jini xmulilob.

⁹Mi' pʌsben jini utso' bʌ i pusic'al bajche' yom mi' melob. Mi' toj'esan majlel jini pec'o' bʌ ti' bijlel.

¹⁰An i c'uxbiya lac Yum, an i sujmlel. Mi' yʌq'ueñob i cʌn mu' bʌ i jac'beñob i t'an.

¹¹Cha'an ma' wʌc' ti cʌjñel a c'aba', C Yum, ñusʌbeñon c mul come cabʌl.

¹²¿Majqui jini winic mu' bʌ i bʌc'ñan lac Yum? Lac Yum mi caj i cʌntesan majlel ti wen bʌ bij.

¹³Wen chumul mi' caj ti ajñel, tijicña i pusic'al. I p'olbal mi caj i yʌq'uentel i lumal ti' majtan.

¹⁴Jini mu' bʌ i bʌc'ñañob lac Yum mi caj i yajñel yic'ot. Mux i pʌsbeñob jini xuc'ul* bʌ i t'an.

¹⁵Ti pejtelel ora wolic pijtan c Yum, Come mi caj i loc'sʌbeñon coc ti yac.

¹⁶Sutq'uin a bʌ ba' añon. Pʌsbeñon i yutslel a pusic'al, Come añon tic bajñelil. Woli cubin wocol.

¹⁷Lajmesʌbeñon c tsic pusic'al. Loc'sañon tic wocol.

¹⁸Q'uele c tic'lʌntel yic'ot c wocol. Ñusʌbeñon pejtel c mul.

¹⁹Q'uele j contrajob, come cabʌlob. Jontol jax mi' ts'a'leñoñob ti' mich'lel i pusic'al.

²⁰Cʌntañon, coloyon. Mach a wʌc'on ti quisin, Come tsa'ix c ñopoyet.

²¹Cʌntañon come tojon, uts'aton. Mic chʌn pijtañet.

²²Dios, yom ma' mʌn loq'uel israelob Ti pejtelel i wocol.