Read Chol Salmos 31 Bible Online

Salmos 31 - Chol bible

Salmos 31

¹C Yum, tsa'ix cʌc'ʌ c bʌ ti a wenta. Mach a wʌc'on ti quisin ti pejtelel ora. Coltañon ti toj bʌ a pusic'al.

²Yom ma' p'ison ti a wenta, coltañon ti ora. C Xajlelet ba' mic taj i xuc'tilel c pusic'al. Mi cʌc' c bʌ ti a wenta che' bajche' mic mʌc c bʌ ti chan bʌ xajlel.

³Come jatet c Xajlelet ba' mic taj i xuc'tilel c pusic'al. Lajalet bajche' ts'ajcʌbil bʌ cotot. Pʌyʌyon majlel cha'an ma' wʌc' ti cʌjñel a c'aba'. Pʌsbeñon jini bij ba' yom mic majlel.

⁴Chiliyon loq'uel ti uts'at ba' mi' yʌcoñob, Come xuc'ul bʌ cototet.

⁵Mi cʌq'ueñet c ch'ujlel ti a c'ʌb. Tsa'ix a mʌñʌyon, c Yum Dios, isujmetʌch.

⁶Ts'a' ma' q'uel jini mu' bʌ i ch'ujutesañob dioste'. Joñon mic ñopet, c Yum.

⁷Mi caj c wen ubin tijicña cha'an a c'uxbiya, Come tsa' q'ueleyon ti wocol. Tsa' cʌmbeyon c pusic'al ti wocol.

⁸Ma'anic tsa' wʌc'ʌyon ti' c'ʌb j contra. Tsa' wʌc'ʌyon ti libre.

⁹P'untañon c Yum, come añon ti wocol. Woli' yajpel c wut ti uq'uel. Woli ti c'un'an c pusic'al yic'ot j cuctal cha'an ch'ijiyem c pusic'al.

¹⁰Come woli' jisañon i ch'ijiyemlel c pusic'al. Woliyon ti uq'uel ti pejtelel ora. Woli' jilel c p'ʌtʌlel cha'an c mul. Laj jilemix c wersa.

¹¹Ts'a'lebilon ti pejtelel j contrajob. Ñumen mi' ts'a'leñoñob c pi'ʌlob ti chumtʌl. Jini j cʌñʌyo' bʌ mi' bʌc'ñañoñob. Jini mu' bʌ i q'ueloñob ti bij mi' puts'tañoñob.

¹²Mi' sʌtoñob ti' pusic'al che' bajche' winic tsa'ix bʌ chʌmi. Lajalon bajche' i xejt'il p'ejt.

¹³Tsa'ix cubi c ts'a'lentel ti cabʌlob. An bʌq'uen ti jujunwejl. Che' mi' temob i t'an tij contra, Yomob i tsʌnsañon.

¹⁴C Yum, wolic ñopet. Tsa cʌlʌ: C Dioset.

¹⁵Tilem ti a tojlel chuqui tac jach mi' tajon. Loc'sañon ti' c'ʌb j contrajob, ti' tojlel jini mu' bʌ i tic'lañon.

¹⁶A winicon, yom tijicña ma' q'uelon. Coltañon come c'ux ma' wubiñon.

¹⁷C Yum, mach a wʌc'on ti quisin come tsa'ix c pejcayet. La' i yubiñob quisin jini jontolo' bʌ. Mi caj i ñʌjch'elob ya' ti' yajñib chʌmeño' bʌ.

¹⁸La' ñʌjch'icob jini yujilo' bʌ lot, Mu' bʌ i chañ'esañob i bʌ ti tsʌts bʌ t'an. Mi' ts'a'leñob jini tojo' bʌ.

¹⁹Wen ñuc i yutslel a pusic'al mu' bʌ caj a pʌsben jini mu' bʌ i bʌc'ñañet. Chajpʌbilet cha'an ma' pʌsben a wutslel jini mu' bʌ i ñopet ti' tojlel i pi'ʌlob.

²⁰Ma' wotsañob ti xuc'ul ba' mach i tajayobic i contrajob. Mi caj a cʌntañob ti a wotot ba' ma'anic mi' yubiñob a'leya.

²¹La' c ch'ujutesañet c Yum, Come tsa' pʌsbeyon ñuc bʌ a wutslel ya' ba' woli' joy contrajiñoñob.

²²Come tsa cʌlʌ che' añon ti wocol: Chocbilonix ti a wut, cho'on. Pero tsa' wubibeyon che' bʌ tsac pejcayet ti oración, Che' bʌ tsac cha'le uq'uel ti a tojlel.

²³C'uxbinla lac Yum pejtel i cha'añet bʌ la, Come lac Yum mi' cʌntan jini mu' bʌ i ñopob. Mi' yʌq'uen i toj i mul jini mu' bʌ i chañ'esan i bʌ.

²⁴La' ñuc'ac la' pusic'al. Yom ch'ejletla. Mi caj i p'ʌtesʌbeñetla la' pusic'al pejtel mu' bʌ la' pijtan lac Yum.