Read Chol Salmos 33 Bible Online

Salmos 33 - Chol bible

Salmos 33

¹Jatetla tojet bʌ la, yom tijicñayetla ti lac Yum. Come i t'ojol jax jini tojo' bʌ che' mi' subob i ñuclel Dios.

²Subula i ñuclel lac Yum ti arpa. C'ʌyinla lac Yum yic'ot música am bʌ lujunt'ujm i ch'ajñal.

³C'ʌyinla lac Yum ti tsiji' bʌ c'ay. Wen ñijcanla música. Yom tijicña mi' cha'len t'an.

⁴Come tojʌch i t'an lac Yum, xuc'ulʌch pejtel i melbal.

⁵Mi' c'uxbin toj bʌ lac melbal yic'ot toj bʌ meloñel. Wen p'ojlemix i yutslel lac Yum ti pañimil.

⁶Tsa' mejli jini panchan cha'an ti' t'an lac Yum, Tsa' mejli pejtel ec' tac cha'an i yiq'uilel i yej.

⁷Tsi' tempa jini ja' am bʌ ti ñajb, Tsi' tajbe i yajñib jini tam tac bʌ ja'.

⁸La' i bʌc'ñañob lac Yum pejtel chumulo' bʌ ti pañimil.

⁹Che' bʌ tsi' cha'le t'an, tsa' mejli chuqui tsi' yʌlʌ. Tsi' cha'le mandar, xuc'ulʌch tsa' cʌle.

¹⁰Lolom jach mi' temob i t'an jini gentilob, come lac Yum mi' contrajiñob. Lac Yum mi' yʌc' ti jilel chuqui mi' lon ña'tañob i mel winicob x'ixicob.

¹¹Chʌn xuc'ul i t'an lac Yum ti pejtelel ora. Chuqui tac mi' ña'tan lac Yum ti' pusic'al mi' ts'ʌctesʌbeñonla yic'ot lac p'olbal ti pejtelel ora.

¹²Tijicñayob mu' bʌ i yumañob Dios, Tijicñayob jini yajcʌbilo' bʌ mu' bʌ i yochelob ti' cha'an Dios.

¹³Lac Yum am bʌ ti panchan mi' q'uel pejtel pañimil. Mi' q'uel pejtel winicob x'ixicob.

¹⁴Ya' ti' chumlib mi' q'uel pejtel chumulo' bʌ ti pañimil.

¹⁵Dios tsi' yʌq'ueyob i pusic'al. Mi' tsajin pejtel i melbal winicob.

¹⁶Mach cha'anic cabʌl soldadojob mi' coltʌntel rey. Mach cha'anic i bajñel p'ʌtʌlel mi' coltʌntel soldado.

¹⁷Lolom jach caballo, mach mejlic i coltañonla. Mach ti' p'ʌtʌlelic caballo mi laj colel.

¹⁸Awilan, lac Yum woli' cʌntan jini woli bʌ i bʌc'ñañob, Woli bʌ i pijtañob i coltʌntel ti lac Yum.

¹⁹Lac Yum mi caj i coltañob ti' yutslel. Ma'anic mi caj i yʌc'ob ti chʌmel. Mi caj i cʌntañob ti' yorajlel wi'ñal.

²⁰Ti pejtelel lac pusic'al woli lac pijtan lac Yum. Jiñʌch la caj cʌntaya, jiñʌch lac mʌctʌjib.

²¹Mi caj la cubin tijicña ti lac pusic'al, Come ñopol lac cha'an ch'ujul bʌ i c'aba'.

²²C Yum, pʌsbeñon lojon i yutslel a pusic'al. Come wolic pijtañet lojon.