Read Chol Salmos 34 Bible Online

Salmos 34 - Chol bible

Salmos 34

¹[4] Mi caj c ch'ujutesan lac Yum ti pejtelel ora. Mi caj c chʌn sub i ñuclel c Yum.

²Mi caj i ñuc'an c pusic'al cha'an c Yum. Tijicña mi caj i yubiñob jini utso' bʌ.

³Conla c sub i ñuclel lac Yum. La' lac tem ñuq'uesʌben i c'aba'.

⁴Tsac sajca lac Yum. Tsi' yubiyon. Tsi' loc'sʌbeyon pejtelel c bʌq'uen.

⁵Tsi' jac'beyob lac Yum jini winicob. Tsiquil ti' wut, tijicñayob. Ma'anic tsa' ajq'uiyob ti quisin.

⁶Che' bʌ tsi' cha'le uq'uel ili p'ump'un bʌ, Lac Yum tsi' yubi. Tsi' colta loq'uel ti pejtelel i wocol.

⁷I yAngel lac Yum mi' joy mʌctan jini mu' bʌ i bʌc'ñañob lac Yum. Mi' coltañob.

⁸Ñopola uts'at lac Yum. Ña'tanla, tijicña jini mu' bʌ i taj i coltʌntel ti lac Yum.

⁹Bʌc'ñan lac Yum jatetla i cha'añet bʌ la, Come ma'anic chuqui an to yom i cha'añob mu' bʌ i bʌc'ñañob lac Yum.

¹⁰Jini alʌ bajlum mi' yubin wi'ñal. Mach che'ic jini mu' bʌ i sajcan lac Yum. Mi caj i taj pejtel chuqui tac wen.

¹¹La'la, calobilob, ubibeñonla c t'an. Mi caj j cʌntesañetla bajche' yom mi la' bʌc'ñan lac Yum.

¹²¿Majqui yom jalijel ti pañimil cha'an mi' taj tijicña bʌ? ¿Mach ba jatetic?

¹³Cʌntan a wac' ame ma' wʌl chuqui jontol. Cʌntan a wej ame ma' cha'len lot.

¹⁴Cʌyʌ jontolil, mele chuqui uts'at. Tsajcan majlel i ñʌch'tilel a pusic'al.

¹⁵Lac Yum mi' q'uel jini tojo' bʌ. Lac Yum mi' ñich'tʌbeñob i yuq'uel.

¹⁶Pero mi' ts'a'len jini mu' bʌ i cha'leñob jontolil. Mi caj i jisañob cha'an ma'anic mi' chʌn ña'tʌntelob ti pañimil.

¹⁷Jini tojo' bʌ mi' c'ajtibeñob lac Yum i coltʌntel. Lac Yum mi' yubiñob. Mi' yʌc' ti ñumel pejtel i wocol.

¹⁸Lʌc'ʌl an lac Yum ba'an ch'ijiyemo' bʌ i pusic'al. Mi' coltan jini woli bʌ i melob i pusic'al.

¹⁹Mi' taj cabʌl wocol jini toj bʌ. Lac Yum mi' yʌc' ti colel ti pejtelel i wocol.

²⁰Mi' cʌntʌben pejtel i bʌquel. Ma'anic mi' c'ʌscujel mi junts'ijtic.

²¹Jini jontol bʌ mi caj i yubin cabʌl wocol. Jini mu' bʌ i ts'a'leñob jini toj bʌ mi caj i tojob i mul.

²²Lac Yum mi caj i mʌn i winicob cha'an mi' yʌc'ob ti colel, Ma'anic mi caj i yʌjq'uelob ti toj mulil jini mu' bʌ i tajob i coltʌntel ti lac Yum.