Read Chol Salmos 37 Bible Online

Salmos 37 - Chol bible

Salmos 37

¹Mach a cha'len tsic pusic'al cha'an i mul jini mu' bʌ i cha'leñob jontolil. Mach ma' mulʌbeñob i chubʌ'an xmulilob.

²Mach jalic mi caj i jilelob che' bajche' mi' tiquin jam yic'ot pimel.

³Ñopo lac Yum, mele chuqui uts'at. Che' jini xuc'ul mi caj a chumtʌl ti jini lum.

⁴Yom tijicñayet ti lac Yum. Mi caj i yʌq'ueñet chuqui yom a pusic'al.

⁵Ac'ʌ ti' wenta lac Yum pejtelel a melbal. Ñopo lac Yum. Mi caj i jolontesan chuqui ma' ña'tan a mel.

⁶Mi caj i wen tsictiyel toj bʌ a pusic'al che' bajche' i sʌclel pañimil. Dios mi caj i tsictesan che' bajche' i sʌclel pañimil ti xinq'uinil.

⁷Ñʌch'chocon a bʌ ti lac Yum. Pijtan lac Yum ti' xuc'tilel a pusic'al. Mach a cha'len tsic pusic'al che' mi' p'ojlel i chubʌ'an jini mu' bʌ i mel jontolil.

⁸Cʌyʌ a mich'ajel. Mach yomic tsʌytsʌyña a pusic'al. Jini woli bʌ ti mich' mi' tech mulil. Mach che'ic yom ma' mel.

⁹Jini mu' bʌ i cha'leñob jontolil mi caj i chojquelob ti tojmulil. Jini mu' bʌ i chʌn pijtañob lac Yum mi caj i yʌq'uentelob i wenlel.

¹⁰Mach jalix mi caj i jilel jini mach bʌ anic mi' ñop Dios. Che' mi caj a q'uel jini xjontolil mach ya'ix an.

¹¹Jini utso' bʌ i pusic'al mi caj i yʌq'uentelob i wenlel. Tijicña mi caj i yubiñob che' ñʌch'ʌlob i pusic'al.

¹²Jini mach bʌ anic mi' ñop Dios mi' ña'tan bajche' mi caj i tic'lan jini toj bʌ. Cʌlʌx jax mi' mich'len.

¹³Lac Yum mi' tse'tan jini winic. Yujil mach jalix mi' caj ti jilel.

¹⁴Jini jontolo' bʌ mi' loc'sañob i yespada ti' yotot. Mi' sʌts'ob i jalʌjb, Cha'an mi' jisañob jini p'ump'un bʌ, Cha'an mi' tsʌnsañob jini tojo' bʌ.

¹⁵Jini jontolo' bʌ mi caj i wʌlʌc ubiñob i yespada ti' pusic'al. Jini jalʌjb tac mi' caj ti laj c'ʌscujel.

¹⁶Uts'at i chubʌ'an jini xuc'ul bʌ winic anquese mach cabʌlic. Mach uts'atic i chubʌ'an jini xjontolil anquese wen cabʌl.

¹⁷Mi caj i jisʌntel i p'ʌtʌlel jini jontolo' bʌ, Pero lac Yum mi' cʌntan jini tojo' bʌ.

¹⁸Lac Yum mi' q'uel bajche' mi' ñusañob q'uin jini tojo' bʌ. Mach jilic ti pejtelel ora chuqui mi' yʌq'ueñob.

¹⁹Ma'anic mi caj i yubiñob quisin ti' yorajlel wocol. Jasʌl mi caj i c'uxob waj che' ti' yorajlel wi'ñal.

²⁰Pero jini jontolo' bʌ mi caj i jilelob. I contrajob lac Yum mi caj i jilelob che' bajche' aq'uiñʌl. Mi' cajelob ti pulel, mi' cajelob ti jilel che' bajche' buts'.

²¹Jini jontol bʌ mi' c'ajtin ti bet. Ma'anix mi' chʌn tilel i toj. An i yutslel i pusic'al jini toj bʌ. Mi' yʌc' i chubʌ'an.

²²Jini c'uxbibilo' bʌ ti lac Yum mi caj i yʌq'uentelob jini lum. Jini chocbilo' bʌ ti lac Yum mi caj i jisʌntelob.

²³Lac Yum mi' toj'esan majlel jini uts'at bʌ winic Cha'an xuc'ul mi' majlel ti' bijlel. Tijicña mi' q'uel bajche' mi' mel.

²⁴Che' mi' yajlel, ma'anic mi' junyajlel cʌytʌl, Come lac Yum mi' chucben i c'ʌb.

²⁵Ch'itoñon to wajali. Wʌle ñoxonix. C'ʌlʌl wʌle ma'anic q'uelel c cha'an juntiquil toj bʌ tsa' bʌ chojqui. I yalobilob ja'el ma'anic mi' c'ajtiñob ñumel i bʌl i ñʌc'.

²⁶Belel ora uts i pusic'al mi' yʌc' i chubʌ'an. Che' ja'el i yalobilob yujilob coltaya.

²⁷Cʌyʌ jontolil, mele chuqui uts'at. Che' jini mi caj a wajñel ti pejtelel ora.

²⁸Come lac Yum mi' mulan chuqui toj. Ma'anic mi' cʌy i cha'año' bʌ. Mi' cʌntañob ti pejtelel ora. Pero i p'olbal jini jontolo' bʌ mi caj i yʌjq'uel ti jilel.

²⁹Mi caj i yʌq'uentelob jini pañimil jini tojo' bʌ. Mi caj i yajñelob ti pejtelel ora.

³⁰Tsiquil i ña'tibal jini toj bʌ che' mi' cha'len t'an. Tojʌch i t'an.

³¹Mi' chʌn ña'tan ti' pusic'al chuqui yom Dios. Ma'anic mi' cʌy i ñop.

³²Jini xjontolil mi' chijtan jini toj bʌ. Mi' sʌclan bajche' mi mejlel i tsʌnsan.

³³Lac Yum ma'anic mi' yʌc' jini toj bʌ ti' wenta xjontolil. Ma'anic mi' yʌc' ti tajol i mul ya' ti melobʌjʌl.

³⁴Ñopo lac Yum, jac'ben chuqui mi' yʌl. Mi caj i yʌq'ueñet a ñuclel. Mi caj a wʌq'uentel jini pañimil. Mi caj a q'uel che' mi' jisʌntelob jini jontolo' bʌ.

³⁵Tsaj q'uele c'ax jontol juntiquil winic. Ñuc tsi' mele i bʌ bajche' te' mu' bʌ ti wen colel.

³⁶Awilan, majlemix, mach chʌn tsiquilix. Tsac sʌcla jini winic, ma'anic tsac taja.

³⁷Q'uele jini xuc'ul bʌ winic, jini toj bʌ. Tijicña mi' caj ti ajñel jini winic uts bʌ i pusic'al.

³⁸Mi caj i laj jisʌntelob mu' bʌ i ñusʌbeñob i t'an Dios. Mi caj i jisʌntelob jini xjontolilob yic'ot i p'olbalob.

³⁹Ch'oyol ti lac Yum i coltʌntel jini tojo' bʌ. Jiñʌch i p'ʌtʌlel ti' yorajlel wocol.

⁴⁰Lac Yum mi' coltan jini tojo' bʌ mu' bʌ i ñopob. Mi' loc'sañob ba' bʌbʌq'uen mi' jilelob ti' p'ʌtʌlel jini jontolo' bʌ.