Read Chol Salmos 40 Bible Online

Salmos 40 - Chol bible

Salmos 40

¹Jal tsac pijta c Yum ti' xuc'tilel c pusic'al. Tsi' ña'tayon, tsi' yubibeyon c t'an.

²Tsi' loc'sayon ti ch'en yilal ba' bʌbʌq'uen mic jilel ti tam bʌ oc'lel. Tsi' wa'chocoyon ti pam xajlel. Tsi' xuc'chocoyon ti xʌmbal.

³Tsi' yʌq'ueyon tsiji' bʌ c'ay Cha'an mij c'ʌyiben i ñuclel lac Dios. Cabʌl c pi'ʌlob mi caj i q'uelob. Mi caj i bʌc'ñañob lac Yum. Mi caj i ñopob.

⁴Tijicña jini winic mu' bʌ i ñop lac Yum. Ma'anic mi' tsajcan majlel jini chan bʌ mi' q'uelob i bʌ, mu' bʌ i cʌyob isujm bʌ t'an.

⁵C Yum Dios, tsa'ix a p'ojlesa jini ñuc tac bʌ a melbal tic tojlel lojon. Wola' chʌn ña'tan lojon. Ma'anic yambʌ bajche' jatet. Aniqui, tsac subu. Mach mejlic ti tsijquel a melbal.

⁶Ma'anic ma' mulan tsʌnsʌbil bʌ a majtan yic'ot ofrenda. Ma'anic tsa' c'ajtibeyon pulbil bʌ a majtan yic'ot majtañʌl cha'an i tojol c mul. Pero tsa' wʌq'ueyon c ch'ujbin a t'an.

⁷Tsac subeyet talon, cho'on, Che' bajche' ts'ijbubil ti a jun.

⁸C Dios tijicña wolic mel chuqui a wom. Lotol a mandar tic pusic'al.

⁹Tsac subu jini wen t'an ba' tempʌbilob cabʌl winicob x'ixicob. C Yum, mic wen sub a t'an. Wen a wujil mach mʌcʌlic quej.

¹⁰Tsac tsictesayet ba' mi' tempañob i bʌ. Ma'anic tsac mucuyet ti' tojlelob. Tsac subu ti jamʌl xuc'ulet. Uts'at ma' cha'len coltaya. Cabʌlʌch i yutslel a pusic'al. Isujmet.

¹¹C Yum, mach ma' chʌclibeñon a p'untaya. Cʌntañon ti a c'uxbiya ti' isujmlel a t'an.

¹²Tsa' wen p'ojli wocol tic tojlel. Jini c jontolil tsi' yʌc'ʌyon ti wocol. Mach cujilix chuqui yom mic mel. Ñumen on c mul ti tsicol bajche' i tsutsel c jol. Tsiltsilña c pusic'al.

¹³C Yum, poj loc'sañon ti ili wocol ti' yutslel a pusic'al. C Yum, coltañon ti ora.

¹⁴La' i cha'leñob quisin jini yomo' bʌ i tic'lañon. La' toj sajticob i pusic'al. La' yʌsʌnticob jini yomo' bʌ i jisañon.

¹⁵La' toj sajticob i pusic'al mu' bʌ i subeñon: Jajaja, jajaja, che'ob. La' i cha'leñob quisin cha'an i mul.

¹⁶La' i yubiñob i tijicñʌyel i pusic'al pejtel mu' bʌ i sajcañet. La' ñʌch'lecob i pusic'al. La' i yʌlob ti pejtelel ora: ¡Ñucʌch lac Yum! La' i yʌlob pejtelelob mu' bʌ i c'uxbiñet woli bʌ i pijtañob i coltʌntel ti a tojlel.

¹⁷Jixcu joñon, p'ump'uñon. Anto yom c wenlel, pero lac Yum woli' ña'tʌbeñon ti' pusic'al. C Yum, xcʌntayajet c cha'an, la' ba' añon ti ora. Coltayajet c cha'an, C Dios, mach yomic ma' jalijel.