Read Chol Salmos 42 Bible Online

Salmos 42 - Chol bible

Salmos 42

¹Che' bajche' an i tiquin ti' me' cha'an mi' jap ja', Che' ja'el an c tiquin ti' yilal cha'an com c Dios.

²Tiquin c ti' yubil cha'an com Dios, jini cuxul bʌ Dios. ¿Baqui ora mi mejlel c ñochtan Dios?

³Cha'an ch'ijiyemon tsac wen cha'le uq'uel ti q'uiñil ti ac'ʌlel. Bele q'uin mi' c'ajtibeñoñob winicob: ¿Baqui an a Dios? lon che'ob.

⁴Che' mic ña'tan iliyi, cabʌl mic mel c pusic'al, Come c'ajal c cha'an bajche' tsac pi'leyob ti xʌmbal jini winicob x'ixicob Che' bʌ tsac pʌyʌyob majlel ti' yotot Dios. Che' tijicña lojon c pusic'al, tsac subu lojon i ñuclel Dios. Cabʌlon lojon tsac mele lojon q'uin.

⁵¿Chucoch ch'ijiyem c pusic'al? ¿Chucoch wulwulña c pusic'al? La' c pijtan Dios, come mach jalix mi caj c suben wocolix i yʌlʌ caj Coltaya Dios.

⁶Ch'ijiyem c pusic'al. Jini cha'an mic ña'tan c Dios wʌ' ba' añon ti' ti' Jordán ja' ti i t'ojol jax bʌ lum ba'an wits Hermón yic'ot Mizar.

⁷Ju'ucña mi' tilel but'ja'. Ti ora ma' but'ben i ch'eñal ja'. Tsa'ix a choco tilel c wocol che' bajche' wʌlʌcña bʌ ja' mu' bʌ i ñumel tic tojlel.

⁸Uts i pusic'al lac Yum. Mi' pʌs i c'uxbiya ti jujump'ejl q'uin. Ti ac'ʌlel mij c'ʌyiben i ñuclel. Mic pejcan Dios mu' bʌ i yʌq'ueñon j cuxtilel.

⁹Mic suben Dios, jini xColtaya c cha'an: ¿Chucoch tsa' ñajʌyiyon ti a pusic'al? ¿Chucoch ma' cʌyon ti' c'ʌb j contra cha'an p'ump'un mi' tic'lañon? Ch'ijiyem c pusic'al, cho'on.

¹⁰Lajalʌch bajche' c'ʌscujemon che' mi' yʌ'leñoñob j contrajob. Ti pejtelel ora mi' subeñoñob: ¿Baqui'an a Dios mu' bʌ i coltañet? lon che'ob.

¹¹¿Chucoch ch'ijiyem c pusic'al? ¿Chucoch wulwulña c pusic'al? La c pijtan Dios, come mi caj c cha' suben wocolix i yʌlʌ. Jiñʌch caj Coltaya Dios.